NCA Thu Ki Lung Himawh

NCA Thu Ki Lung Himawh

NCA vai Zomi te’n a awlmawh khollo ding kasak leh a awlmawh tampi na om a tusawng teng diakdiak bang dotna tampi hong lut ciang in tawm cik ka theih sunsun ong hawmsawn ing.

NCA Akhiatna

NCA ih cih pen Gambup Kikaptuah Nawnlohna Ding Thukimna (Nationwide Ceasefire Agreement = NCA) hi. 2015 kum October 15 ni in cnf leh adang pawlkhat akigawm pawl 8 in NCA ah thukimna suaikai uh hi. Tua pen Thein Sein’ hunlai hi. Tu’n Daw ASSK’ hun in pawl 2 in thukimna suai kaih beh hi. Tua akaih beh nihte pen New Mon State Party (NMSP) leh Lahu Democratic Party (LDU) te hi a tukum Februay 13 ni in suai kai uh hi.

NCA Muhzia Tuamtuam

Cnf te’ pu Salai Lian Hmung Sakhong in “Panglong thukimnate agahsuahna ding in NCA pen lampi hoihpen hi” ci.

Kawlgambup a kawlte khit teh minam thautawi alianpen ahi UWSA te’ makai Pauk Yu Chan in “Hih NCA pen Panglong thukimna teng phiatmaina ding hi” ci.

NCA sung a kihel Shan leh Karen te’n “Kawlgalkap te’n NCA thukimnate palsat uh hi” ci’n awngkhia mun mahmah uh hi.

NCA Kei’ Muhna

2010 kum October 24 ni in Kawlpi pan in ZNC makai in “Kalay Declaration” cih min tawh “Panglong nihna khawmpi bek tawh kawlgam buaina vengzo ding” cih ih tangkona tungtawn in hih NCA hong piangkhia ahi hi.

Ahi zong Panglong Thukimna anuntak kik ding bel kawlte khempeuh in deihlo uh hi. Mitphial hong lak uh ahi hi.

ASSK in NCA tungtawn in 2008 thukhun akikhel zawh khak leh cihna tawh NCA nakpi in thapia hi. Kawl galkap lam te’n zong tua lampi akhaktan theih tawp in khaktan uh hi.

Ataktak in bel NCA pen 2008 thukhun nuai ah om veve ahih man in Salai Lian Hmung i gen sang in Pauk Yu Chan i gen bel dikzaw mahmah hi.

NCA Dalna

Tulaitak kawl galkapte akihtalo, NCA ah akihello thautawi pawl 7 te in Union Political Dialogue Negotiation Committee (UPDNC) cih committee thupi khat 2017 kum April kha in phuan khin uh hi. Hih pen gamvai ah kipawl khopna khat hi a NCA lampi tawnlo ding ci’n siangtak in gen khin uh hi. Hih UPDNC pen Wa te’n makaih hi.

Tua UPDNC sung a kihel pawl khat in kawltawh kikapna ah akisap hunhun a apangkhawm ding in Galvai Kipawlna khat Northern Alliance cih min tawh nei uh hi. Hih pen Kachin te’n makaih hi.

Thukhupna

Tukha ni 1 ni in Sen te’ vaihawmsakna tawh Kachin galkap makaite leh kawl galkap makai te Sen gam ah kimu uh hi. Tua lai ah kawl galkap palai te’n Kachin te’ kiang ah;

• 1. Wa tawh kizom kei un
• 2. NSCN (K) te tawh kizom kei un
• 3. Na galkapte sung vuah minam dangte omsak kei un
• 5. Na galkap len tuate tuate na hemkhia un
• 6. Na batallion thakte uh hong sansak zo kei ung

cih khawng gen uh ahih man in tomkaih leng;

Kawlte leh Kachinte kua mizol siam zaw cih tungtawn in NCA gahsuah ding maw gahsuahlo ding cih kitel ding hi.

NCA agahsuah leh bel kawlte’ deihna atangtung ding ahi hi.

Thein Sein in pawl 8 nangah khin a tu’n ASSK in pawl 2 ngah beh ahih man in tu’n kawl te’n pawl 10 angahta uh ahi hi. Tua 10 lak ah Karente lobuang a utut un peiizo ding uh hi.

Kachin in bel Wa te galsung ah akihelna ding ahanciamciam lai ahi hi. Wa te Northern Alliance ah ong kihel leh bel kawlte tavai tuam mahmah ding hi. Aizong Wa te kihelnop tuak nailo uh hi.

Tuni tua ciang ciphot ni. Lai nong simsak lungdam ing.

Nong-it

(Mung Laan Thang)
Zangkong