USA, South Carolina ah Amtrak te meileng tuahsia, mi 2 si, 116 liam
USA, South Carolina ah Amtrak te ii Passenger apua meileng khatleh vanpuakna Freight Train khat Sunday ni in kinawkkha ahih manin, mi 2 in sihlawh a, adangzong mi 116 bang liamgawp uh cih Reuters pan kiza hi.
Vanpuakna meileng “Freight Train” pen meileng lampi geiah akhawl hi a, Passenger apua Amtrak meileng in aphukha, anawkkha kici hi. Asi mi 2 tepen Amtrak sungah meileng nasemte hi uh a, anawkkhak Freight Train sungah tuahun laitak in kuamah omlo cihi.
Amtrak Train 91 meileng tungah khualzinmi Passenger akigawm in mi 136 atuang uh hi a, tuaban ah meileng sungah nasem Crew Member zong mi 9 atuangkhawm uh ahihi. Hih Amtrak meileng pen New York panin Miami zuanin apailaitak, meileng lampigei “Side Track” ah akhawl CSX Corp Freight Train khat Sunday zingsanglam 2:35am hunpawl in anawkkha ahihi.
U.S. National Transportation Board panin Chairman asemlaitak ahi Robert Sumwalt in agenna ah hih meileng tuahsiatna meileng lampi pen CSX Corp te vaihawmna mun hi a, Amtrak Train pen alampi Track aki laihna Switch panin akipelh hiding cihi.
Meileng sungah nasem asi mi 2 tepen kum 54 aphakhin Amtrak engineer Michael Kempf leh kum 36 aphakhin Conductor Michael Cella te ahihi ci’n Lexington County Coroner Margaret Fisher in genkhia hi.
Aliam mi 116 te lakahzong agim phadiak Critical Condition mi 2 om uhhi. South Carolina Governor Henry McMaster inzong hih meileng tuahsiatna pen huaisia mahmah, ki limnawkkhak mahmah hi ci’n genkhia hi.
Video: Two dead, more than 100 injured in Amtrak crash in South Carolina
Hih atuahsia Passenger Train pen Amtrak’ Silver Star Service khat hi a, asung ahzong datsi (Fuel) Gallon 5000 bang apua cihi. Tua datsi tengpen kehkhiagawp in, ahi zongin khuasung Public Safety bel bangmah nawngkaina omsak samlo hi.
Nungkum December khasung inzong Amtrak Passenger Train khat Washington State ah tuahsia in, mi 3 in sihlawh hi. Atuahsiatna ahangpen Engineer pa’n Signal pen simkhialkha in, ahunlap in Brake sikmanlo ahih manin atuahsia cimawk hi.
More: Kuala Lumpur khuasung ah “KTMB Cargo Train” vanpuakna meileng khat tuahsia
Nungdiak January khasung inzong Amtrak Train khatin Virginia ah ninpuakna mawtaw “Garbage Truck” khat phukha in mi 1 in sihlawh hi. Tua Amtrak Train sungah Republican Members of the U.S. Congress te atuang ahihi. Sawltak #zomidaily
Comment piaknop aomleh...