Junk Food atamnek pasalte bawtui cidamlo

Junk Food atamnek pasalte bawtui cidamlo

Pasal nahih a, zilehta neihding ngaihsun in, tulehta tawiding nalung gulhleh Junk Food tamnekken ci’n zatuilam mipil misiam te’n vaikhakna hongnei uhhi. Tualeh Junk Food ihcihpen banghiam?

Junk Food leh Fast Food pen akhiatna kibanglel cihding ahihi. Ei Kawlgam mite theihbaihding in lamkim lampam ah akizuak mohkan nengnengte Junk Food kicithei khangel dinghi. Mikang te’n Junk Food acihte uhpen Potato Chips, Candy, Gum, Cookies, Chocolate, Soda tuamtuam cihte ahihi. McDonald’s, Burger King, KFC cihte vanzuakte zong Junk Food in ki ciaptehsak a, tamnekluat dingin hoihkhollo hi.

USA gamsung ah sanginn minthang mahmah ahi Harvard University pan Study aki bawlkhiatna ah Junk Food atamnek pasal khangnote pen a bawtui (Sperm) uh kangsakthei ahih manin, ta aneihtheih nading hamsa saktuam cih mukhia uhhi. Hih Research pen Spain gam aom University of Murcia leh Harvard University pan Researchers te’n akankhiat khop uh ahihi. Hih Researchers te’n kum 18-22 kikal aphapan pasalno honpikhat khakhat sung anek adawn uh encik in ciaptehna Record kiciantak in nei uhhi.

Tuapan in Doctors te’n hih pasalno te nisim anek adawn uh sittel uh a, pawlkhat in Healthy Diet kici cidam nadingin ahoih anlehtui nane uh a, pawlkhat in Junk Food namte nane uhhi. Junk Food ahi Cookies, Cakes, Chocolate, Chips, Fried Food cihtepawl atamnek pasalno te pen a bawtui uh picing zolo, Quality hoihzolo cih mukhia uhhi. A bawtui uh cidamtaklo ahih manin ta neihtheih nading, naupaai saktheih nading hamsa cihna hi.

Healthy Diet ahi mehteh mehgah Vegetables tuamtuam, Whole Grains leh ngasa tuamtuam cihbang anete pen a bawtui uh cidam mahmah cih Researchers mukhia uhhi. Tua hi’n ta neihtheihloh cihkhawngpen zite bekbekzong ngawhtheih ompah samlo a, pasal te cidamlohna zong nahi khinkhian theihi.

Pasal te taneihtheih nading, bawtui Sperm cidam nading ahoih ahihleh Eggs, Salmon, Natural Yogurt, Nuts, Seeds, Berries, Sweet Potatoes, Broccoli, Asparagus cihte ahihi. Alim a al bangmah ihnek zawhloh kawmkal ah ihnek sunsun cidamna hongsukhalo ahihding thupi ngaihsutni. ZD Sawltak #zomidaily

Note: 2011 kum in kagelh, aki suaksak ngeikhin hi a, Zomi sungah Junk Food ki limnek tektek ahih manin hongki suaksakkik ahihi. Joseph/ ZomiDaily