Kum 15 aphapan numeino khatin dailenbuk sungah nausuak, anu apa te’n agailam theilo

Kum 15 aphapan numeino khatin dailenbuk sungah nausuak, anu apa te’n agailam theilo

Malaysia, Kota Kinabalu City sung aom Shopping Mall khatah innkuan khat Tuesday (Nov 21) ni in vakkhawm liailiai uhhi. Tualaitak atanu kum 15 aphapan khatin dailenbuk sungah nausuak dihdih ahih manin, a innkuanpih te’n lamdang samahmah cih theStar pan kiza hi.

Lamdang asakna ahang ahihleh hih atanu pen kum 15 bek hipan a, sangnaupang sangkahlai khat ahihi. Pasal neinailo ahih manin, anu apa te’nzong nau apaailam theilo uhhi.

Ahi zongin anu in dailenbuk sungah atanu sawtsimsim aomcip ciangin bang aci hidinghiam ci’n ava etleh atanu pen nausuak in akhutsung ah silehnai tawh akidiah naungekkhat atai amuh ciangin lamdang samahmah hi.

Tua numeino in nau asuahma in agilnasa ci’n genkhia a, ahi zongin numei ngeina khasim ninnei in “Menstrual Pains” khawng ahilelding in a innkuahpih te’n ngaihsun uhhi. Hihte innkuanpen Shopping Mall sungah nitaklam 4:30pm hunpawl in avakkhawm uh ahihi.

Hih numeino pen naupaai ahihlam anu ahi zongin apa ahi zongin kuamah in athei omlo cimawk hi.

Nausuak numeino leh atangek pen Queen Elizabeth Hospital ah zatui kibawlding in kipuaksak hi ci’n Penampang police chief Supt Rosley Hobden in genkhia hi.

Tua palikpa genna ah anu apa te’n atanu nausuak cih atheih ciangin amanlang in zato ah paipihsuak uh a, tuaciang in Police Report hongbawl uh cihi.

Hihvai tawh kisai in atanu akidot ciangin atanu in lawmngaih “Boyfriend” khat kanei ci a, tuapa pen kum 17 aphakhin khat cihi. Ahi zongin tua alawmngaihpa tawh abeisa kha 5 hunpawl in kikhenkhin uh cisawnsawn hi.

Palik te’n tua Boyfriend acihpa pen kankhiading uh a, athu hoihtak dongcianding uh cihi. Anu in agenna ah atanu pen Shopping Mall ii dailenbuk Toilet sungah naikhat phialbang sawtkhin himahleh hong pusuaktheilo ahih manin, lamdangsa in bang aci hidinghiam ci’n a et ciangin atanu pen nausuak ahihlam amukhia cimawk hi.

Hih thuthang tungtawn in pawlkhat in Social Media tungah Comment pia ngeingai uh a, banghang in anu apa te’n atanu agil agollam, naupaai ahihlam theilo lawmlawm uhhiam, amit anunglam ah koih uhhiam ci’n ko ekek uhhi.

More: Kum 13 phapantuak in kiteeng, numeinu gilsung ah kha 5 naupaaikhin

Zato siavuansiam Doctors te’n agenna ah kumcinglo in naupaai “Teenage Pregnancy” pen lauhuai mahmah hi. Teenage Pregnancy tepen khacinglo in suakthei “Premature birth” cihte omthei hi. Anu in lungsim picingnailo ahih manin, ata hoihtak kemtheilo hi. Naungek pen asisa in suakthei “Stillbirth” hi. Siamsinna, sangkahna kipelhsak hi. Kumcing nailo, aguh ataang khauhnailo ahih manin, nausuah ciangin lauhuaina tampi omthei hi. Sawltak #zomidaily