Ihihna banga kilat ngamna (kineihtawm lohna) thupi

Ihihna banga kilat ngamna (kineihtawm lohna) thupi

Hun khat lai-in English Political Leader le Military khat ahi Oliver Cromwell in ama lim (a mel, a maitang) suaisak dingin limsuaih siampa kiangah hong pai hi.

Limsuaih siampa in Oliver kiangah, “Na maitang a, a bok, a ton, a etlawm lote kilang lo dingin, na mai a maam zialzial, a etlawm hiuhiau dingin hong suaihsak ning maw,” a ci hi.

Oliver in “A bokna, a tonna a omte ahi bangbang in a kilang sinsen dingin hong suai zaw in. Ka hihna bangin kilangsak nuam zaw ing… Tua banga nong suaihsak kei leh limsuaih man hong pia lo ding hi,” a ci hi.

Tuaciangin limsuaih siampa in ahi bangbang in a suai hi.

Ngaihsut huai

Kineih tawmna tawh i nuntak hangin a taktak hun ciang kilangkhia veve ahih manin ihi bangbang in nuntak ngam ding thupi zaw hi.

Buan nawi lakah a om zongin a suangmanpha pen suangmanpha mah hilel hi.

Van dawn ah a leng tuaituai zongin leivui pen leivui mah ahi hi.

Mite maipha ngahnopna le mite oi muh ding utna bek tawh kineih tawmin nungta lo zaw in, ihihna i dinmun siang gen ngamna in mi thupi ihihna hong kilangsak zaw hi. Lungdam, Dong Mung