Muvanlai thu (Symbol of America: Bald Eagle)

Muvanlai thu (Symbol of America: Bald Eagle)

Minam khempeuh in ki ciaptehna (Symbol) kinei ciat aa, ei Zomi te’ in Vaphual nupa ki Itna tawh ih kiciamteh hi. Kawlte utong tawh kiciam teh uh aa, USA te’ muvanlai tawh kiciamteh hi.

Muvanlai pen thahat mahmah in vasa khempeuh te ih kumpi ( the king of birds) na kiciliang hi.Amit a ciim ban ah thakhauh mah” in asang mah” vantung taiguk (6 miles) pan in leilak aa, vakhu om pen teltak in muthei hi.Bu atom ciang in kawltung leh singsangpi dawn te ah butom hi.Abu ding in na namkiim ahi anel dikdek ahi samzang pan akhauh mah” singkang nangawn kaikhawm in limtak in phandikdek aa, ihpu ihpa ten muvanlai bupen thautang in zong bunlo hi naci uh hi.

No aneihciang in sa namtuam” leh gulsa te tawh vak hi.A note’ anding in gul anungta in man in nesak paklo in anote tawh abukiim ah kimawl sak phot hi.Gul in ano te atukkhak teh gu alutloh nading in Muvanlai pi in nahtang luangsung ah a muk phutgige in gul in anote atukkhak teh nahtang tui muampah” piapah” in gulgutawh anote silo hi.Singsangdawn pan atate galvilsak in hangsan tak leh Itna taktawh om den hi.Ih pu ihpa ten muvan laino pen kawngthuap sagih ih thuap zong in kila zolo hi naci uh hi. Hoihtak leh hangsan tak in atate cing innkem ahihman in bang mah in atate lazo sutzolo hi.

Atate hongkhanliat ciang in vasa matdan vanlai ah nasiatak in kisinsak hi.Khatvei leh akhe tawh pom in vansangpek ah lenpihto in khiasukzel manzel in a thahat nading uh hoihtak in sinpih hi.Khatvei leh amuk tawh tuahkhia in vansanglai pan khiasuk zel in thakhat in anuai ah api deihtak lengsuk in a khate nihtawh dawh in nuamtak in akhatung ah tuangsak aa, nasiatak training anote pia in kisin sakden hi.Tua hang in Muvanlai tepen aneutung pan akipan athahat vasate kumpi ahi hi.

Muvanlai pen kum 78 ciang bang nungta-in, vasa nam sungah akhansau pen nam khat-in kiciamteh hi. Hih bangin kum 78 ciang bang anuntak zawhna dingun akum 48 pawl in ahamsa mahmah khensat na khat aneih dinguh kisam nahi gige hi. Mu Vanlaite kum 48 aphak uhciang in akhecinte kisia ta banah, amuk uh zong hong saulua peuhmahta-in kawigawp phial hi. Amulte-uh hong tam semsemin akha-uh gik hongsa ta-uh ahih manin saupi lengzo nawnlo uh hi.

Hibang hun laitakin mu vanlaite in hici omsuak lelin simai ding maw? ahih keh’ ahaksa le ana lua mahmah apumpi uh kikhelna ding bawlin nungta ding maw? cih namnih tel uh hi. Pawl khat in sihmai dingin tel uh-a, atamzaw in ahih leh a-na, a-sa haksatna thuakin nuntak ding hanciam uh hi. A nuntak suak theihna dingun mual sang dawnte-ah bu tom masa in, anek dinguh pawltkhat koih uh hi. Tua abu tomna vuah omcip uh-a, apumpi kikhelna ding natnathuak kipan uh hi. Natnathuak hunpen ni 150 (kum lang) kimphial sawt uh hi.

Amasa penin, Amuk saulua-a kawi liang pen suang tungah deihtak in tat in hong kikhongkhia hi. Amuk kikhongkhiat khit teh muk-thak hongpo dong ngak uh hi. Amuk thak hongdawk ciangin a khecinte khatkhat-in amuk tawh botkhiat kipan uh hi. Khecin thak hong po khiat ciangin, amul khempeuh uh bot khia-in, multhak, kha-thak hong po ciangin haksat, gim thuak hun ni 150 hong ci petpet ta uh hi. Tuabek thamlo in zingsang nisuah tungpan nitum dong mitsi vetlo in ni hong enden hi.Nizangtha pan in zong thatak tampi ngah in hong nosuak kik hi. Hibang teng khitciang, Muvanlai honglengkhia kik in kum 45 pan kum 78 bang hong nungta suak thei hi. Muvalai thu Ih deihna ahih leh kikhelna (change) thu agennuam pen ihi hi. Ei mihingte in zong nuntakna thak ihngah theihna dingin ahaksa mahmah khensatna ihneih ding kisam mah” hi hang.

I nuntakna gualzawhna, lungdamnate tawh Ih kalsuan theihna dingin, I gamtat hoih lo, ngeina hoihlo, ngaihsutna gilote I paihkhiat ding kisam hi. Ngaihsutna thak kim le pam tawh kituak I zon kul-a, kei cihsa, kei upsa, kei patsa, kei kei kei cih lungsim luite I paihkhiat hamtang ding kisam kasa hi. Ngaihsutna thak, lungsim siangthona thak, pianthaknate tawh I mai lam ading I lamtoh ding kisam hi.

Muvanlai nangawn in anuntak sau-na ding apumpi tungah akisam nawnlo, akizang thei nawnlo, sutan, botkhia mangzo buang ahih leh ei mihingte in I khansauna ding, I nuntak nopsakna dingin aluinate khel-in pianthakna tawh I kalsuan sawm hiam? Mu vanlai in ahih leh natna haksatna tawh kumlang phial thuakin kikhel zo buang hi.

A bei-sa hun sungah gitlohna, gamtat siatna, zu le sa tawh kidiahna, kam engpauna, mi zahko theina akipan gitlohna, thadahna pawlpawl le I pumpi tungah ahoih lo I neih tampite I paiikhia zo ding hiam? I kikhel zo ding hiam? Ahih kei leh kikhel sawm selo-in, ahi cipi-in omom lel ding I hi hiam? cih lungngai kawm in Muvanlai thu I phawk ding I kideih sakna ahi hi.

Nuntakna thak, pianthak na taktak tawh I nuntak zawhna dingin Pasian muang in I hih zawh lohte Pasian tungah nga-in, Topa aw ka nuntakna hong puahphat sakin I cih theih ding thupi hi. Pasian in muvanlai bangin a tate kha-thak abawl dingin hong deih hi. Isaiah 40:31Ahihhang in Topa amuang mite atha uh dimkik dinga, Muvanlai bang in khatawh lento in Amaute tai napi-un tawllo dinguh a lampai napi in zong gim lo dinguh hi. Cin Hau Guite