Misi aki vuipah lohna ahang ~ Job Cinpi

Misi aki vuipah lohna ahang ~ Job Cinpi

Bang hangin mi khat a sih ciangin hanah kivuibpah lo a hiam? Mi khat a sih ciangin a kivui pah lohna a hang khat le khat kibang lo kha ding hi. Hih kong gen ding a hang pen Kawmgam Kawl biakna tawh kituak thu khat ahi hi. Ahih hangin ZOMI-te in zong bang hang cih kithei loin i omna tawh a kinai nam dangte ngeina peuh a zui kha i hiam cih zong kigen thei tuan lo hi. Hih Kawlte thumuhna pen hoih kasa mahmah hi. Tua manin ka Zomipihte adingin deihsakna tawh kong kong letkhia kik hi.

Mi a sih ciangin han sungah a kivuih pahpah lohna a hang pen Kawlte upna le sanna ah hih bang ahi hi.

Tirihma a kici numei mel hoih mahmah khat hangin hih ngeina hong piang khia hi.

Tirihma pen numei kizuak khat ahi hi. A mel hoih mahmah-a a duang etlawm mahmah ahih manin ah tawh a lumkhawm nuam mi tampi om uh hi. Mi mawkmawkte bek hi loin lutol i cih phungzi-te nangawn in zong iplah mahmah uh hi. Amah tawh khat vei a lumkhawm nuamte in sumtang tul khat pia uh hi.

Ahi zongin Biakna nasem mi khat hangin a nuntakna kikhel thei a, biakna lamah hong thakhauh mahmah hi. Nisim in phongzi mi giat anpham pia den hi. A sih ciangin han sungah vui pah loh dingin a pasian un thupia hi. Ni thum sung koih uh a, ni thum a cin ciangin damlote le naupangte lo buang Tirihma siluang en dingin a pai lo peuhmah kingam ding hi, ci-in tangkosak hi.

A pasian un lutol phungzite zong a pai kim ciat dingin thupia hi. Nithum khit ciangin mikhempeuh Tirihma luang en dingin pai uh hi. Tirihma a sih zawh ni thum pha ta ahih manin a mel zong kidang gawp ta a, a nak le a kam panin sisu luangkhia ta hi. A gim zong na sia mahmah ta hi. Mipite tungah thu khat kigen hi. Tirihma a deih na om uh leh tul khat tawh kilei thei hi ci-in kigen hi. Deih a ci kuamah om lo uh hi. Zanga tawh ci leuleu uh a deih om tuan lo uh hi. Zanih le sawmnga tawh ci uh a, a deih om tuan lo hi.

A deih kuamah om lo ahih manin a thugen hong khel uh hi. Tirihma a la nuam a ciahpih nuam na om uh leh sumtang 1000 kipia ding hi, ci uh hi. Ahih hangin tua siluang a ciahpih nuam kuamah a om tuan kei hi.

Hih thuhilhna pen mihing pumpi pen a si thei hi a, iplah nading om lo hi. Hoihna phatna hauhna cihte pen kiphatsakpih ding hi lo hi. Hoih hong kisakna etlawm hong kisatna pen na nuntakna hang ahi lel hi. Tua ahih manin na nuntakna manneisak inla ka sih khit ciangin na pai nading mun, munnuam na tun theih nading a hoih a pha bawl inla gamtat hoih lungsim hoih neih ding sawm in, cih thuhilhna ahi hi. Daily Time pan a tomin kong letkik hi. Job Cinpi (Zomi Laisim Nuamte)