Iceland gam leh Football kimawlna

Iceland gam leh Football kimawlna

Iceland gamah Football kimawlna kum zalom 19-na tawp lam in kipan hi. Football club masa pen KR Reykjavik kum 1899 in kiphuan khia hi. Tua khit kum 1912 in Championship masa pen Urvalsdeild karla kibawl hi. Hih champhionship ah kum 1929 dong team thum (Fram Reykjavik, KR reykjavik & Vikingur Reykjavik) bek kihel zel uh hi.Kum 1930 ciangin team thak reykjavik Valur zong kihebehl thei hi.

Tua kum mah July 29 in Iceland ten International Football match masa pen Faroe Island tawh sui uh a goal 1-0 in zo uh hi. Ni 17th July 1946 in Denmark tawh friendly match sui uh hi. Hih pen FIFA affiliated gam tawh a suih masak pen na uh hi a, goal 3-0 in lel hi hi. A kum kim 1947 ciangin Finland zo in gualzawhna lianpi ngah uh hi. Tua khit tawlkhat sung Iceland te World cup leh European qualifying match ah kihel lo uh hi.

Kum 1974 panin kidemna tuam tuam ah hong kihel kik uh hi. Kum 1954 in World Cup qualifying match ah kihel dingin ngetna bawl uh hi. Ahizongin a ngetna uh ki sang lo hi. Icelandic national team te kum 1957 ma siah grass ah kimawl ngei nailo uh hi. Kum 1958 World Cup qualifying match ah kihel uh himahleh world cup a sui dingin cing zolo uh hi. Kum 1994 ciangin FIFA World Ranking ah a 37th na ngah uh hi. Kum 2004 in Euro 2004 ah kihel sawm in kihel zolo uh hi. Kum 2011 in Ueropean Under 21 Championship ah kihelzo uh hi.

Kum 2014 in World cup sui dingin cingzo dektak uh hi. Kum 2015 ciangin Euro 2016 sui thei dingin qualify bek thamlo in Euro 2016 ah quater final lut uh hi. Kum 2017 in 2018 World cup sui thei dingin qualify pet pet uh hi. Iceland pen FIFA world Cup 2018 a kihel gam khempeuh lak pan mihing tawmna pen ahi hi. Mihing 348580 kiim pha uh hi. Argentina, Crotia leh Nigeria te tawh group-D ah omkhawm kha uh hi. June 16 (Friday) in Lionel Messi kihelna Agentina tawh kimawl uh a goal 1-1 in draw uh hi.

Knattspyrnusamband Íslands, (KSÍ) pen Iceland gama Football tawh kisai kipawlna lian pen ahi hi. Kum 1947 March 26th a kiphuan khia ahi hi. National team(numei leh pasal) selection ah mawhpuakna la uh hi. Tua bek thamlo in Icelandic Football League vaisai uh a, coaching, referee education, licensing leh Football kimawlna tawh kisai vaidangte ah mawhpuakna nei uh hi. KSI kum 1947 in FIFA ah lut uh a kum 1954 in UEFA ah lut uh hi. Guðni Bergsson in tulai tak KSI president sem hi. Amah pen kum 2017 february 11 a kiteelcing ahi hi. Aman a Football career Icelandic club Valur F.C ah pan masa hi.

Tua khitciang English Club Aston Villa ah kimawl hi. Tottenham Hotspur ah kum 1988 -1995 sung defender in om hi. Hih hun sungin Icelandic National team ah zong captain sem kawm hi. Kum 1995-2003 sung Bolton Wanderers leh National team ah kimawl hi. Albert Guðmundsson (1922 – 1994) pen Iceland gam professional Footballer masa pen ahi hi. A tangvalno tungin Valur club ah om masa hi. Tua khitciang Scotland ah sangkah a tuah Rangers F.C ah kimawl hi. Tua khitciang London club Arsenal F.c zawm hi. French Football club Football club de Nancy ah zong kimawl ngei hi. Tua bek thamlo in AC Milan, RC Paris leh Nice FC khawngah zong kimawl kawi kawi hi.

FIFA world cup 2018 pen Iceland te world cup ah a kihel masak pen na uh ahi hi. A player 23 te lak a 15 te gamdang league ah kimawl ngei nailo uh hi. A player minthang pen Gylfi Þór Sigurðsson ahi hi. Amah kum 1989 September ni 8 in piang hi. Icelandic Football player lak pan a khasum(40 million ISK p.m) tam pen hi. Kum 2002 in Icelandic Football club Fimleikafélag Hafnarfjarðar ah kihel masa hi. Tua khit ciang Kópavogur, Breiðablik ah kisuan kik hi.

Gamdang club a join masak pen Reading F.C ahi hi. Academic Scholarship tungtawn a lut mi nga lakah amah zong kihel thei hi. Kum 2010 in Icelandic National team ah kihel hi. Amah pen tu dinmunah Iceland gam adingin goal tam a thun pen ahi hi. Tawlkhat Welsh club Swansea City ah midfielder a sep khitciang Tottenham Hotspur ah kisuan hi. A team captain uh Aron Gunnarsson pen English second division team ah kimawl zel hi. Iceland gam adinga tamvei a sui pen Birkir Sævarsson bel Swedish league ah kimawl zel hi.

Iceland in Football a lawhcinna a neihna uh pen tuma kum 15 laia KSI te ngiimna leh geelna tungtawn piang kici thei hi. A gam uh pen vawt mah mah ahih manin indoor stadium tampi bawl uh a, tua stadium te pen a lum thei dingin bawl uh hi. Hih stadium te sang tawh kinai-ah sangnaupang te zat pangkai theih dingin lam uh hi. Tu in playground 30 leh indoor stadium 150 kiim nei ta uh hi. Icelandic laka UEFA licence ‘A’ ngah masa pen Heimir Hallgrimsson pen ha siavuan (dentist) ahi hi.

Kum 2011 in Icelandic Football team ah nasep kipan hi. Mihing 5000 kiim omna Heimaey tuikulh ah om in mite lungsim a zo mah mah coach khat ahi hi. Ama’ makaihna tawh amau gama kimawlna tuam tuam ah kum li sungin sawm vei gualzo uh a li vei ki draw uh hi. Iceland ten mihing tawh kituakin fooball player hau uh hi. Tu dinmunah registered player 23500 kiim leh qualified coach 600 kiim nei uh hi. Thangpi Naulak