Saudi Arabia ah Kawlgammi numei khat sihdan kipia

Saudi Arabia ah Kawlgammi numei khat sihdan kipia

Saudi Arabia gamsung ah naupang athat Kawlgammi numei khatpen amawhna kilangh ahih manin sihdan tuak a, a ngawng kitat cih Saudi Press Agency pan kiza hi.

Saudi Arabia gampen Muslim biakna akhauh mahmahna gamkhat hi a, tukumsung bekbek in sihdan akipia mi 7 phata hi.

Sihdan athuak numeinu minpen “Layla bint Abdul Mutaleb Bassim” hi a, kum 6 bek aphapan apasal ii azi masa tawh atanu thahsak ahih manin, amanzong sihdan atuak ahihi. Muhammad ii suahna Muslim te’n Holy City ci’n aminthansak mahmah Mecca gam ah a ngawng kitan in sihdan kipia hi.

“Layla bint Abdul Mutaleb Bassim” pen Burmese Nationality kici a, ahi zongin Rohingya Muslim Community pan ahihleh ahihloh pen ki gencianlo hi. Ahi zongin Muslim bel hilimlim dinghi.

Athahsak alawmpa tanu minzong “Kalthoum bint Abdul Rahman bin Ghulam Gadir” hi a, hih naupang zong Burmese Nationality in ki ciamteh hi.

Kum 6 aphapan hih naupangno pen anukik in munphiah tawh satgawp in, a numei vankhawng holhsakgawp hi ci’n thunei te’n genkhia hi.

Rohingya te pen UN (United Nations) in leitung ah bawlsiat athuakpenpen minamneu khatin ciamteh uh a, ahi zongin hih mite pen agamtat uh hoihzungzung khollo a, Zomi te’n ki hehpihpen khollo khading hi.

Kawlgam kumpi te nanawng in hih Rohingya tepen gammi dingin deihhetlo uh a, amaupen Bangladesh gampan hong guklutsim ahi uh cihsanziau uhhi. Kawlgam ah Rohingya mi 800,000 bang phading in kigenkhia hi.

Saudi Arabia gam aom Myanmar Embassy nanawng in hih sihdan athuak nupinu pen ama ii Passport kamuh tektek lohbuang un Myanmar Citizenship ahihleh hihloh ka gencian theikeiding uhhi cihsan hi.

Saudi Arabia gamsung ah thagum hattawh mawhpihna (Rape), mi thahna (Murder), thuzuihna leh upna nutsiatna (Apostasy), hiamtawi in mivan thagum suhna (Armed Robbery), guihtheih khamtheih zuakna (Drug Trafficking) cihte pen sihdan apiak ngekngek uh ahihi. Tuabang tawh sihdan apiak pen 2013 kum in mi 78 pha a, 2014 kum in mi 87 pha hi.

Iran leh Iraq gamnih te ah sihdan akipia pen hihsang in tamzawlai a, Saudi Arabia pen sihdan piak atampen thumna ci’n Amnesty International te’n ciamteh uhhi. ZD Sawltak #zomidaily