U.S. Navy Veteran khatin New York City sung mipi khetawh apai ziahziahna Times Square sungah mawtaw tawh nawkpheigawp ahih manin mi 1 si in, adangzong mi 22 bang liam cih Reuters pan kiza hi. Thursday sunlam 11.55am hunpawl in thupiang ahihi.
City’s Mayor in agenkhiatna ah hih gamtatna pen “Act of Terrorism” tawh kizopna omloding hi ci’n genkhia hi. Ageipan amukha Witness te genna ah Honda Sedan mawtaw khatin hattak in Blocks 3 sungbang nawkphei a, anunung ah khuamkhat aphutkhak ciangin khawlpan hi ci’n genkhia hi.
New York Police te’n tua mawtaw’ hawlpa pen kum 26 aphakhin Richard Rojas kicipa hi ci’n genkhia uhhi. Hihpa pen New York, Bronx sung aom khat ahihi.
Video etnopleh: Car ploughs into pedestrians in New York’s Time Square
Hih mawtaw’ hawlpa pen abeisa 2008 leh 2015 kumsung inzong zukhamsa in mawtaw hawlngei ahih manin, nihvei akimanngei cihi. Tuaban ah tukha kipatlam inzong khatveimah mawtaw phenghawlgawpna tawh kimanngei hi.
Mayor Bill de Blasio in hih buaina apianna aphual mahah News Conferance bawlpah a, hihpa gamtatna leh migilo ngongtat “Terrorism” te kizopna omlo hi ci’n genkhia hi.
Hihbangdan gamtatna, mipi khetawh avak hialhial laitak mawtaw tawh phulpheigawp cihbangdan gamtatna pen abeisa sungin Britain, France, Germany, Israel, Sweden gamsung te ahzong kiza zelzel hi.
Related: New York Bus Terminal ah apuakkhamthei akoih pasal khat kiman ~ ZD
Tu’n New York khuasung ahzong hihbangdan gamtatna hongkilawh in mikhat in sihlawh hi. Asi pen numei hi a, kum 18 aphakhin khat ahihi. Police te genkhiatna ah aminpen Alyssa Elsman ci uh a, Michigan panin New York ah hunnuam zangdingin Vacation azinpak ci uhhi. ZD Sawltak #zomidaily
Comment piaknop aomleh...