A hang maw? A haihan?

A hang maw? A haihan?

Ka university kah lai in khatvei Siamsin maithak muakna ding vaihawm in lawmte 4 tawh Yangon khuasung ah ka vak uh hi. Kei pen tha neu kahih man in ka lawmte’ lak ah ka kipei leklek bek hi. Ka lawmte thagol pian lel uh ahihman in kihtak luat neilo in lampi ah maikim in pai halhhalh in, “ong nawkkha vial a om leh i vatsuk lel kei deh”.. ci sawnsawn uh hi.

Kitot kiselna ah kawlte khut manlan’ zia theikawm leh kei bel thaneu phamahmah kahih man in tuabang a ong kimuan’ luat mawk uh ciang dik kasa pha het kei hi. Gitloh sawm taktak mawkmawk le’ng milom om khawng ki zo deksuai lo ding hi.

Tua thupiang in tuni dong ong phawksak zelzel thu khat om hi. Zomite nih le thum kithutuak pian peuh lehang kihtak luat nei nawnlo, nakhempeuh a zo ding kisa pah, kimuang gawp, i aw ngaih pah, ei le ei mikhempeuh kisa pah, kuamah awlmawh nawnlo pah .. cihbang in om thei mahmah hihang.

Mi nih le thum in ong pahtak bawl leh ei sang a asiam zaw, apil zaw, ahoih zaw om nawnlo, ei a penpen kisa kha baih mahmah hihang. Sep le bawl leh kalsuanna khatpeuh ah kal khat kal nih matutna pen gualzawhna sangpen sa thei pahpah hihang.

Tua ahihman in saupi itun ding haksa a, matutna khat peuh zong sawtpi akip ding haksa mahmah hi.

Lungnuam tak a a dai hithiat mi zakhat lak ah zukham ankham khat ong kitom dihdih leh tua 100 sang zukham 1 pa aw ngaihzaw a, nawngkai zaw, buaihuai zaw hi. Kitot kilai nading taktak om hileh zukhampa’n a zotam? A dai hithiat 100 te’n a zo zaw tam?

Bangkok khua sung ah mihing teng 84 val om a, tuate lak ah lungphona a bawl mi teng 1, 2 ong kizial keei ciang gamlum zo, nawngkai zo mahmah hitei napi, a gamlum sang adai hithiat azah sawm tampi in tamzaw lai hi.

Thum le li kithutuak a a kimuang pahpah Zomite a hang maw? A hai han? Koizaw ihi tam maw? Pau Khat Suan