Phalbi khuadam hun sese

Phalbi khuadam hun sese!

Phalbi khuadam hun sese bang hangin Pasian in a tapa Zeisu suahni ding in hong teel tuam deuh se ahiam? Ken bel theihpih zo keng, ahizongin ka kankan ciangin Laisiangtho siam mahmah ka lawmpa Sya Khoituang in hibangin hong gen hi, “ Phalbi khuadam hun leh Judah mite kisim hun (census) kituak a hihna tawh kizuiin Pasian in a tapa Zeisu hong suak hi cih thu Judah mite bek hi lo in mipil pente leh mi nuainung pente’n zong theikim leh a deihna hangin Phalbi hun Pasian in hong teel hi” ci hi. Tua khit ciangin ka maisuah hong en a, lungkim tuak ong sa lo hiding hiam “ Laisiangtho in ahun acin ciangin..” cih thu tawh hong khup hi. Hi ka sa mahmah mai a, ka um pah hi.

Laisiangtho thu tawh kisaiin kei kong gen theih ding thu tawm mahmah himah taleh hong kigen teng leh ka zaakthu teng ka gawm tuah a ka khil khopkhop ciangin kei muhna ah khuahun thum om a tua khuahun teng lakah Phalbi in thupha ngah penpen hi. Thupha angah phadiak Phalbi leh ki Itna ki Ngaihna pumkhat hong suak khawm pah uh hi cileng kikhial lo ding hi. Bang hang hiam cileh Itna khempeuh lakah a lianpen Itna, a bei thei lo Itna tawh hong It ih biak Pasian in ama tapa Zeisu hong suahna dingin Phalbi khuadam hun hong teel hi. Tuamah bangin khangno kumcing khin a tamzaw in zong hih hun sungin amau ki Itna hong taksuak sak uh a amau bek hilo nupa kilem ngei khollote zong hih hunsung mahin hong ki It phadiak uh hi.

Laa khat in “Ngaih mel lah hoih semsem” ana cihpen Phalbi khuadam hun sunga mihingte nunzia laphuakpa in amuh ciangin hibang laa hoih hong phuak khia hikha dingin zong ka ummawh hi. Phalbi hunsung mahin sumbawl khualzinte hitaleh pilna sin naupangte hitaleh muntuam gamtuam aa om tuam khempeuh phial a lung uh leng ahihman in innlam zuan in hong ciah uh a, nuamtak in innkuan in 
lawm leh gual tawh omkhop ding thupi ngaihsut penpen uh hi. Hih Phalbi khuadam hunsung mahin hundanga biakinn sual siik ngei het lote’n zong biakinn leh kikhopna innte hong zuan tangtang uh hi cih thu ka muh ciangin Phalbi khuadam hunin mihingte lungsim kheel zo a, muntuam gamtuam a kikhente bek hi lo lungsim ngaihsutna tawh a kikhen mi tampi hong gawmtuah in hong kaikhawm hi ciin ken ka mu hi.

Kei mimal ngaihsutna leh kei muhna panin khuahun khempeuh lakah Phalbi vanglian pen a, tua ahihman in Pasian inzong ama Tapa zeisu hong suahni dingin Phalbi khuhun hong teel sese hidingin ka ummawh hi. Ka lawmpa Sya Khoituang hong genna ah “Judah mite bek hilo aksi thusin mipilte leh gampalak a tuucing mi nuainung pente’n zong Zeisu amuh ding uh deihna tawh Pasian in Aksipi leh vantungmite sawl hi” ci hi. Tua Aksi lamdang mahmah zong tuakum Phalbi hunsung sese bekin kilang hi. Ahizongin Phalbi in vaang anei hizaw ding maw, Pasian in ateel tuam deuhse manin vaang anei hizaw ding cihpen thutuam hong hi leuleu ding hi.

…….Francis Lamthang (Zomi Quavadis)……..