Hazatna lungsim paikhia in

Hazatna lungsim paikhia in

Nupi khat in a vengte’ inn kiim a om lingpakte pen hoihsa lua mahmah ahih manin a inn panin gal et sim zelzel hi. Ama inn vai lo vai sang bangin a vengte’ lingpak lunglut zaw-in sun leh zanin a suksiat dan ding geelgeel hi. Amah(nupi nu) in, ama’ inn kiim ah zong lingpak suan hileh a vengte’ lingpak mah bangin hoih thei ding cih lamsang ngaihsun lo zaw-in, hazatna lungsim tawh hua ka vengte’ lingpakte bangci suksiat theih ding cih bek ngaihsut in nei hi.

Khatvei, a vengte’ omloh kalin lingpak hoihmahmah te sat tan simsak dingin, nupi nu tem khat tawh va kuan sim hi. Lingpak kung gol sim khat a bul pan sat tan ding ci-in a leem lian leh lingpak bul ah gul khat na om dihdih ahih manin gul in a khepek na tuksak pah lian hi. Lau mahmah leh naa sa mahmah kawm ahih manin hong awng(kiko)khia lela a, a vengpih te uh pawlkhat in delh pah ngeingai uh hi. A vengte un, hih i vengte’ lingpak bul dihdih ah zong tem khat tawh bang hih sese na hiam, ci’n a dot uh leh lingpakte lopa khawngin a deep gawp loh nadingin a hahsiang sawm hi’ng ci-in khem zaw lai hi.

Tua teng tawh gul tukna hong huaisia toto a, Siavuan te’n na khe pen a ngawng pan i tan kei leh na pumpi vekpi’ adingin lauhuai thei ding hi, a cih uh ciangin ut ta leh ut ta kei leh amah pen a khe a kitan(a khe a tawng)ding hong hita hi. Siavuan te’ gensa mah bangin nupi nu a khe a ngawng panin kitansak a, khe tawng sa-in om ta ahih manin a ut bangbang sem thei loin, a utna mun zong tung zo nawnlo a, hazatna lungsim tawh na themno khat a sepkhialhna hangin a nuntak sung teng cimawhna, gentheihna leh lungkhamna tawh a kidim mi hehpihhuai mahmah khat hong suak ta hi.

Tua mah bangin mihing hihna tawh hazatna lungsim na nei kha thei ding hi. Nang tawh kisai hetlo thu te nangawn ah a khengval hazatna lungsim khawng hong lut kha thei lai ding hi. (Hazatna lungsim anei nupi nu lungngaikik pak leeng), ama hazatna lungsim hangin lingpak nei Innkuan te, gul’ tuk nading panin a suakta gige uh ahih mah bangin, mi na hazat det leh na hazat mite pen haksatna leh lauhuainate’ sung pan suakta in a lawhcin’ semsem nadingun lampi a honsaksak na hi gige hi.

Hazatna lungsim na neih lai teng, na ma vang ngeilo dinga, mi’ tunna tantan zong na tungzo ngei kei ding hi. Mi’ lawhcin’na, mi’ gualzawhna leh mi’ daupaina teng bek na mu dinga, tua teng tawh nang leh nang na kilungso tawmsak den lel ding hi. Bek tham loin, hazatna lungsim na neih lai teng na van gik den dinga, kuama hong theih pih loh in na lunggim den ding hi. Na lungsim vangik pen, mite’n hong puakpih theih hi loin, nangbek mahin na puak ahih manin, na van zangg in, mi’ tun’na tantan lawhcing takin na tun nop leh na vangik ahi, Hazatna lungsim khempeuh paiikhia in!

Ngaihsutna kiu khat pan,
Khazih’ sungah, ✍️ David Tuang