June khasung huihpi guahpi hangin Myanmar gamsung ah mi 19 si, tulsawmval cimawh in om
Myanmar gambup ah June khasung huihpi guahpi ii nawkna hangin asi mi 19 bang phakhinta a, tuaban ah omnading neilo cimawh dongtuak zong mi 10,000 valbang phakhin hi ci’n Department of Disaster Management te’n MMTimes te tungah genkhia uhhi.
Huihpi leh guahpi in anawk phadiakna State leh Region tepen Magwe, Mon, Rakhine, Kayin, Kayah, Shan, Sagaing, Ayeyarwady cihte hiphadiak hi.
Rakhine State sungah huihsia leh guahsia in limnawkkha phadiak a, akigawm in Rakhine State sungpan mi 6 takin sihlawh uhhi. Tuaban ah cimawh dongtuakzon innkuan 7500 bang pha uhhi.
Magwe Region sungahzong mi 8 takin sihlawh uh a, tuaban ah cimawh dongtuak belhding neilo in innzang panin ataikhiazong innkuan 4000 valbang phading kici hi.
Mon State sungahzong huihpi leh guahpi in tukumsung limnawk mahmah hi. Abeisa kum 40 hunsung ah hihzahliang in Mon State sungah ahuaisia omngeilo kici hi. Mon State sungah mi 1 in sihlawh a, adangzong cimawh dongtuak innkuan 2500 bang phading kici hi.
Kayah State leh Sagaing Region sungahzong mi khattuak si cih kiza hi. Ayeyarwady Region sungahzong mi khatmah si kici a, tuaban ah inn 800 valbang galtai in cimawh dongtuak thuakin om uhhi.
Hihbangin misi tampi lakah asi atamzaw pen tuihual in taimang, tuikia in si cihbangdan pen tampenpen hi. Mikhat ahihleh gul in tukha in tua gulgu thuaklah in asi ahihi ci’n Department of Disaster Management Director asemlaitak ahi Daw Phyu Lae Lae Tun in genkhia hi.
Tuabangin atuahsia, acimawh asi aliam te adingin huhna Compensation ki vaihawmsakding a, innnusia lonusia in ataikhiate zong panpihna kineiding hi ci’n genbeh hi.
More: Myanmar gamsung ah Cyclone huihpi hangin asi mi 5 pha, inn 1400 kisia
Myanmar gamsung ah guahtuiluan akipansanlam hipanzaw a, mailam ah hihsangin huihpi leh guahpi Flood tuamtuam tamzaw semsem khading hi ci’n Director nu in genkhia hi. Tuahang inzong Department of Disaster Management panin ki ginkholhtheih bangbang aki gingkhol, aki semkhol hita hi ci’n pulakkhia hi. Sawltak #zomidaily
Comment piaknop aomleh...