“Zomi ka it hi” I cih leh

“Zomi ka it hi” I cih leh
Dr James Suan Za Dong, MB BS, DO Sydney, Australia

Tu hun ciangin Zomi it nading, tawisaang nading leh ki pumkhat nading akua-akua-in kigenin lawphuai mahmah tawh kibang hi. Tua tawh kizui-in, Zolai i neih zawh zong kum za val khin ta aa, lai at zia i siam ding zong hun mahmah ta hi. Khuamuhna a zai nang, i minam tawisang nang leh ki itna i khansak nadingin limtak ngaihsun kawmin lai i at ding hun mahmah ta hi.

I mipihte i it takpi leh, i mipihte ko ding, gensiat ding, maimawl sak ding ngaihsut vetin zong i nei kei ding hi. A diakdiakin Zomi it ing akici nuamte-in pilna, siamna, min leh za anei Zomite aangtanpihin i pahtawi ding hi. Zahtaak namel thei lo-in ut bangin cih gawp ding hun hi nawn lo hi. I ngaihsutna a kibat kei leh zong khat leh khat ki-upat bawlna tawh i kikup khawp diamdiam ding hun hita hi.

Sawt lam deuhin, GZA President Rev Dr Pau Khan En, ei Zomi sung bek hi lo mangkang mipilte nangawnin apahtak, a zahtak uh Zomi khat net sung khawng ah ki ci gawp ngei hi. Tua bangmahin Professor, Dr Thang Za Tuan, Dr JM Paupu, Rev Dr Dam Khua Nangte zong ki ci gawpgawp hi. Hi bang aa i cih gawp i Zomi uliante ii gualzawhnate limtak i kantel phat ciangin ei mawkmawk khawngte-in tua bang aa i cih dingte hi lo uh hi. A khekhap uh i zui zo kei aa, asiakmit ciang uh zong i ban zo kei hi Tua bang hi napi, a lungduai, cihgawpna athuak Zomi ulian pawlkhatte’ thukhual daan zahtakhuai leh ettehhuai kasa mahmah hi. A piicing nuntakna i neihna ding lam ong lak khia uh hi.

Tawlkhat sung ki daai-in thu kingaihsun thei zawdeuh ta hi’nteh i cih laitakin, tu’n Pu Colonel Khen Za Mung pawl khat in i ci leuleu hi. A mah pen i pa, i pute’ gual hi aa, tua bang aa net sung khawng ah i cih ciangin, Zomi khat hih dingin kilawm lo mahmah hi. Pasianin zong diksa lo ding hi ci-in ka um hi.

Pu Col Khen Za Mung pen Zomite lak ah a theihtaak pasal taktak khat ahihna tawm i suut pak ding hi.

A pu : A pianna pu, Pu Mang Gin pen khawi leh vulh, taanglai nuntak zia tawh galmat samat ahi zongin, siah leh kaih ahi zongin, galhang, agualtungtuang aminthang khat ahi hi. Zomite’n i minthan sakpen , lawi tampi nei hi. Tu aa Lawibual Saang inn mun teng ah alawite ki bualbualna pan bualpi khat ong piang ahih manin, ‘ Mang Gin’ Lawibual ’ kici hi. Tua panin ‘Lawibual’ veeng min ong piang khia aa tu-in Tedim khuapi ii veeng lianpen khat min ong suak hi.

Guite Pu Mang Sum Tedim ah a tupa Pu Mang Gin tawh na maang khawm uh hi. Pu Mang Sum saklam a tai ciangin, Pu Khoi Lam, Pu Kim Thuam, Pu Tel Khat-te-in Tedim ah hausa dingin na kun uh hi. Sep ding thupi nei lai ahih manin, “Mualbem aa Kam Hau na sam un” ci-in asawl bangin kisam hi. Pu Kam Hau-in Lamzang ah Pu Mang Gin ngak aa Pu Mang Gin ong tun kik ciangin Tedim ah galkap mang sem in, Pu Kam Hau in hausa, Pu Khoi Lamin thulam vaanin ong makaih uh hi. Tua aa kipan Tedim ah gal vengin nuamtakin akiteen masakna khuapi lian ong suak to hi. Pu Mang Gin tu-aa galkap tualpi sak palik len lui khang mun ah teeng hi.

Tu-in Tedim khuapi asuak sak, Pu Kam Hau, Pu Mang Gin, Pu Khoi Lamte phawkna-in Tedim ah mualsuang nih ki phutin mawng kung thum zong kisuan hi.

A pa : Pu Col Khen Za Mung pa, Pu Thawng Za Kai 1917 kum France Labour Corps. Piancit paite makai khat ahi hi. Tedim ah Inpector of Police suakin, tua khit ciangin, Kawl gam, Vai gam, Malaysia gamte ah galkap bu-in om kawikawi aa Subedar Major ngah hi.

A mah : Mel hoih : Pu Col Khen Za Mung pen tu lai khangnote-in a kumtam khit aa mu pan na hih man un na hamsia uh hi. A tangval no aa kipan, a tha hoih, ci ngo leh a meel ngiat ahoih aa minthang khat ahi hi. British Galkap Mangte in “ Nang, Zomi taktak na hi kei ding hi” na ci liang uh hi. Nungakte-in, “ U Mungpu-in ek nei kenteh” cih zahdongin a kigen ahi hi. Zomi pasal, mel hoih ngiat aa minthang i taangthu sung ah zong adang om lo hi.

Sports siam : Bawlung siam ahih manin, Independence ngah maa-in Mikang Gawzate team ah mikang ahi lo amah bek ki hel zo hi. Chin Division team ah kimawl hi. Burma Army Team zong makaih hi. Tennis zong kiva hi. Japan gal lai-in, Nakzang lei tung panin Meitei gun athuk penpenna mun ah diving-thu in minthang aa, India Post, tadensa ah kisuaksak hi.

Laphuah siam : A tangval lai aa zawl la aphuahte, tudong mah ngaih kisa lai hi. Mang la pan Zola aa letkhiat zong siamin, Mang love songs tampite ei Zola ngumngeekin lek kikin kisasa hi.

Pil, teii, navaak : Mangkang hun lai-in galkap sung ah za khan ding ahaksat daan mikim theih ahi hi. Teii, pil, navak ahih manin, amah kumsim phialin za khang toto hi. Suahtakna ngah khit, ama’ kum 28 a phak miilmeelin Kawlgam Galkap Zumpi ah, Military Secretary, a masapen, thusaipipa na hi hi. Taavuan tampi aneih lak ah, Galkap sung aa za khang ding khempeuh ama sabuai tung pan kizeek khia hi zen hi. Kum 28 aphakin tua bang zaa angah pen Zomite adingin a aangtanhuai pasal khat ahi hi. Zomite lak ah Full Colonel zong angah masapen zomm ahi hi.

Gam ading Sepna: * Ambassador, Military Attaché, : Kawl gam’ ambassador in 1958 kumin Pakistan gam, 1960 kum in Sen gam ah Military, Navy and Air Attache in pai hi.

Galdo siam : 1964-65 sungin KIA-tawh kidona panin, galte omna, ‘Black, Brown leh White’ area ci aa ciaptehna amaa phuah khiat ahi hi. Ayeyarwady Division ah KNDO leh Communists te dona ah galte zawh diipdeep nading strategy khat mu khia aa ‘ Phiat lay Phiat ‘ ( the 4 cut-offs ) ci-in tua tawh Deltta leh Bagu yoma teng ah galte kizo siang hi. Hihte tudongin Kawlgam galdonate ah kizang hi.

* Chin Special Division (Ta la ka), tuateh, Chin State ( Pa wa ta ) Chairman: Chin Special Division hun leh Chin State ong ki laih hunte sungin, Chairman semin Khamtung gam lutang ahi hi. Tua hun sungin, asep tampite lak ah, Zomite-in i thuaklah mahmah, Tulsuk aa Customs Gate phiatin kilungdam mahmah hi. Tedim ah i kisap mahmah All-season Indoor Stadium, Khuado Hall ong pia aa Pu Khup Khan Thang, BE, ( tu-in, Norman, OK US ) in design ageel bangin kilam hi.

*Member of Council of State, * Member of Council of People’s Attorney leh * Member of Council of People’s Justices-te ahi Kawlgam ah a saangpenpen ki ukna lutangte ah kihel hi.

Min phatna : Nainganh Gongyi First Grade leh Zeya-Kyaw Htin- shwe-sa-lwe zong ngah hi.

Unau kopin lawhcing : A mah bek hi lo-in asuahpih anaupa Pu Col Pau Khan Thang zong galsim vanleeng, jet fighter hawl siam mahmah hi. Galte-in thum vei a vanleng kap khia ngei aa belly-landing tawh atukna buh lo zau mun lian ah “Galhang min phatna leh za khanna” ki pia pah hi. Ki ukna lam ah zong Pu Col Mung mah bangin za lianpi sepna nei kawikawi hi. Amau unau bangin a ciapteh taak Kawl gam ah U (Col) Lwin leh anaupa, Col Maung Cho , om aa, khat Minister for Industry 1 leh khat Minister for Industry 2 ah Vuangyi sem hilhel tuak ngei uh hi. Kawl gam ah hih unau kop nih bek hi bang aa lawhcing khawm om hi kici hi.

Zomi ading deihsakna : 2nd Chin Rifles Battalion ah Commanding Officer ahih lai-in Battalion sung ah Zolai sinna pankhia hi. Zomi numei mel hoih kidemna zong bawl hi. Khuado simin, Yangon aa om Zomi sang naupangte mawtaw tawh la-in kisiim sak den hi. Khuado leh nithupi ni ciangin battalion sung ah zat dingin, Zopuan daan leh dial khui sak hi.

Khatvei Khamtung ong ciahin akhuapihte innlusihin ci hai nga ciat pia hi ci-in thang hi; tua hun lai-in Zogam ah meh nangawn ci al in aki sawh zawh loh hun ahi hi. Tu-in Zomite Health leh Education Fund dingin a ip sung panin Ks thein 400, MKK Foundation ci-in Zomite adingin ong pia khia lai hi.

Hibangin Zomi sung ah, agualzo den, Zomi makaipi khatin, a mipihte adingin ama ip sung sawkin a pensen lak khit ciangin hizah ong piak pen a lungdamhuai, i ciapteh ding thu khat ahi leuleu hi. Tua MKK Foundation panin sangnaupang lai pilte pahtawina leh zato vai-in, Tedim leh Tonzang gam ah mi tampi tung ki pia khia zo hi. Mailam ah line hoih ngah napi a kah zo lote huhna kipia lai ding hi. Hih bangin a mipihte ong aangvan Zo-ta ahi hi.

Pawl khat te’n i makaite muanglua kha i hih manin, i hawmthawh thei hi. Maj. Mang Tung Nung, Pu Son Cin Lian, Lt Col Putpa, Maj Son Khua Lian, Lt Col Kim Ngin, Pu Pau Do Nang, Lt Col Khai Mun Mang, Col Son Khua Vum, Lt Col Kam Do Khup, Capt Sing Khua Khai, leh adang tampite zong Khamtung gam makai ulian vive hi uh aa Zomi ading sepna lian anei uh hiam ci-in i dong ngei hiam? A neih uh leh lungdam huai hi. A nei aa, a nei kei phial uh zongin amau i neih ngiimngiam limlim manin Zomite ahampha ihih lam i phawk kha ngei hiam? A mau hangin vaang i nei aa, mai i ngah hi. Tua ahih manin atung aa azahtaak huai pipi i upate, koko, gensiasia, hawmthawh nawn lo-in Zomi ong tawisang ahihnate uh phawkin, i it ding, i pahtawi ding, lungdamna i pulaak ding ahih lam i phawk nang kong hanthawn nuam hi.

A thupi khat lai ah, net sung ah thu hoih, la hoih leh i Zominam khantoh nang a at nuam mi pil tampi i nei hi. Ahih hangin, ut peuh aa mi khat ci ngii-i ngee-i thei i om manin tua mi pil tampite-in lai ong at lo uh hi. Tua pen Zomite i supna lianpi khat hi aa i khantoh nading ong dal, ong susia hi. Lai i neih zawh kum za val khin aa, “Zomi ka it hi” ci-in i awngawng hi; adiakdiakin gamdang khawng atungte-in, mite khantoh daan, ngaihsut daan leh huih diik zia, khuadaakin enin mailam ah lai at taleng hoih ding hi ci-in deihsakna tawh kong hanthawn hi.