Myanmar gamsung ah Cyclone huihpi hangin asi mi 5 pha, inn 1400 kisia

Myanmar gamsung ah Cyclone huihpi hangin asi mi 5 pha, inn 1400 kisia

Abeisa nungkal ni 2 sung Myanmar gamsung ah Cyclone huihpi in nawkgawp ahih manin, mi 5 takin sihlawh uh a, innsia bekbekzong 1400 bang om cih Xinhua News pan kiza hi.

Tuabangin asi te lakah Tuesday ni in Manaung Township sungah mikhat singkung apuk khatin adenlupkhak hi a, Bokale Township sungahzong gunkuang kibungin mi 2 in asihlawh cihi.

Rakhine State tawh akinai mahmah ahi Bay of Bengal tuipi panin Tuesday ni in huihpi khauhtak in nunggawp ahih manin Kyaukphyu leh Manaung sungteng limnawkkhak mahmah hi. Huih ahatna pen naikhat in Wind Speed 45 – 50 mph tawh nawkgawp hi.

Cyclone huihpi leh guahpi kithuah in Yangon, Nay Pyi Taw, Bago, Magway, Sagaing regions, Mon, Kayin, Shan, Rakhine States sungteng limnawkkhak mahmah hi.

Tua huihpi guahpi gal atuakte abelhtheihpak nadingin Temporary Shelters belhbuk kibawlsak in, innneilo te tualai ah kikemphot hi.

Myanmar Meteorology and Hydrology Department te pulakna ah Wednesday ni akipan huihpi pen phadawm zawdeuhta hi ci’n pulakkhia uhhi. Sawltak #zomidaily

30 May 2018: Yangon Region sungah huihpi leh guahpi nawkna hangin inn 500 val kisiacip

Myanmar, Yangon Region sungteng ah huihpi leh guahpi ii nawkna hangin inn kisia 500 valbang om cih Xinhua News pan kiza hi. Tua innkisia tepen Yangon Region, Shwe Pyi Tha Township sungah akisia hi ci’n Global New Light of Myanmar te’nzong tuni Wednesday ni in pulakkhia uhhi.

Tuesday nitaklam in huihpi akipan hi a, hatmahmah in tawlkhatsung nawkgawp hi. Singkung tampi kipuk in, innzong tampitak kisia a, Electric meitha hawmkhiatna Power Supply tezong kisiacip hi.

Ahi zongin hih huihpi guahpi ii nawkna hangin asi aliam kuamah aki pulakkhia omlo bilbel hi.

Yangon Region Chief Minister U Phyo Min Thein inzong tua huihpi ii nawkgawpna munte ah vadelhpah in, Electricity aki ngahtheih nadingleh khuasung siansuahna te ah makaih kici hi.

Inn kisiacip tampi om ahih manin, tuate ii belhtheihpak dingin belhbuk Shelters honkhatzong ki vaihawmsak hi.

Shwe Pyi Tha Township sungah huihpi in anawkgawpni mahin Hmawbi, Dagon Myothit-north leh adang Township tuamtuam ahzong huihpi leh guahpi kithuahin hatmahmah cih kiza kawikawi hi.

Tua kawmkal ah Myanmar’s Meteorology and Hydrology Department te’nzong Tuesday ni akipan Cyclone huihpi in nawkding hi ci’n Emergency Alert Warning pulakkhia uhhi. Tua Cyclone huihpi pen Bay of Bengal panin akipankhia dingin ki ummawh a, Rakhine State tuipinawl teng nawkgawpding kici hi.

More: Yangon Government in Karaoke Business panin sum tampi ngahding kici

Tuabang in Cyclone Warning aom manin Rakhine State sung aom Maungtaw leh Buthidaung akipan Township 17 te ah tuahsiatna aomleh ahonkhiading in Rescue Team tezong akigingsa in kikoih hi.

Tuilam tawh kikawmna Angumaw – Sittway zong kumpi thunei Local Authorities te’n ni 3 sung khakcipsak cih kiza hi. Sawltak #zomidaily