Cancer natna neite koici kepding (ahuampi) ~ Cing Van Kim

Cancer natna neite koici kepding (ahuampi) ~ Cing Van Kim

Innkuan sungah cancer natna nei a om teh ki lunggim hi. Ki amh gawp in tatzia dingdan ki thei paklo thei hi. Tua ahih manin tuahkhak thute tungtawn pan pawlkhat i kihawmsawn nuam hi.

A. THEIH BAIH NA

Cancer om lam thei baih leng hoih pen hi. Theibaih semsem, kibawl mengmeng leng dam nading lamet tam semsem hi. Natna tawh kisai a kipatcil a kipan a pian ziate, koici bangin suuk semsem cihte hoihtakin ciapteh ding kisam hi.

Cancer natna i kamtai te lakpan pawlkhat

• Zunthak/ sungpai zia kikhel
• Gawl nat dam theilo
• Ngeina a hilo si luang/ tui luang
• Pumpi nate ah a sah, a bawk, a tang om
• An gawi zolo, valh haksa den
• Civom, sa bawk te a meel, a phacia, a sahna kilangh taka kikhel
• Khuh (nagging cough), awsuah kikhel

B. KIBAWLPAHNA

Cancer nam tampi om a, nam khat peuhpeuh neih lam i theih phet in a siam siavuan te tawh kilak pah ding kisam hi. Sathem (biopsy) hong kilaak sak leh hong kilaak sakna zato ah tua tawh kisai teldong dot sitset huai hi. Siavuan/siama te in natna tawh kisai hong dot peuhpeuh a hi bangin im lo-in gen ding ahi hi.

Siavuan/siama te in natna tawh kisai le kibawl danding ong gen peuhpeuh limtakin ngai a, telloh a om leh dot kik pah ding ahi hi. Bawl nading lampi khentat khitteh, siavuan/siama te hong cih bangbang mang leng hoih pen hi.

C. CANCER NATNA A THUAK CINA IN MAPAN DING ZIA

Cancer pen dam kik thei, cih phawk ding hi. Cina’ hanciamna kihello in kibawl theilo cih phawk ding hi. A hi bangin sangsiam ding kisam hi.

Siavuan/siama te’cih bangbang thumang taka zuih sawm ngiat ding hi. Kibawl ma/laitak/khit sungin lungkham nadingte ngaihsun se lo ding, damna ding bek mah tup in nei ding hi. Haksa taleh thala in a tawp dongmah do ding ahi hi.

D. INNKUAN PIHTE IN MAPAN DING ZIA

LUNGSIM THAPIAKNA

Cancer hoihtak do zawh nading lungsim tha mah kisam pen hi. A gen khempeuhte hoihtak ngaihsak ding ahi hi.

Ei upna tawh kizui-in upna thakhauh sak ding munte ah paipih leng hoih hi. (Ka nu a nat lai in a hun zui in a man peuhpeuh in biakinn thungetna ah ka paipih zeel uh hi. Thu um mite tawh kilawmtakna nei a, thungetna tawh panpih uh ahih manin a lungnuam hi.)

Innkuan pihte in hoihtak hopih a, thapiak ding kisam hi. (A gamla a om te in zong a tawmpen nikhat khatvei peuhmah ka nu ka hopih uh a, a lungkim mahmah hi.)

Zakna, muhna te ah lungsim a zaang sak ding a hoih lam ngaihsutna, mel puak le gamtat kampau hoihte bek muhsak/zaksak ding ahi hi. (Ka nu a nat sungin cancer cih kammal zong ka zang lua kei uh a, Pasian in damna hing pia Pa hi, cih nisim pulak sak beklo, ka pulak pih uh hi. Tua in nosuah sak tuam mahmah hi.)

Kibawl sungin sam pulh thei ahih manin lungkiat loh nading le kibawl man khitteh sam a po kik ding lam gen pih ding kisam hi. Samkolh muleh lungneu thei ahih manin lukhu tuamtuam zong kikhu sak thei hi.

Cancer pen a kilawh thei natna hilo ahih manin cancer natna neite lipkhap huai lo hi. Ahi zongin a pumpi tung uh ah natna do galkap te thanem ahih manin a kilawh thei natna a neite tawh ki sawhkha keileh hoih pen hi.

NEEK LE DAWN

Neek ding/neek sak dingte:

• A hing (fresh) sitset mehteh mehgah
• Singgah tuamtuam, singgahtui tuamtuam te
• (Kanu ka piak dan bang hileh alu pumkhat, ankam bulsan carrot tawnkhat nikhat thum vei ta gawizan in, a tui dawn sak , khat veivei ankam bulsan bang a pum in pet sak)
• Sadat a kipia a thau kihello sa, ngasa, be tuamtuam
• Tha a piangsak buh, khauhsuai, alu, nawi, khuaizu etc.

Tang ding/ tang sak dingte

• Zu le khatheih guih theih
• Sa em tuantuam te/ a laklawh min sate
• A al lua, a khum lua, a thau tam kihel luate
• Nekpah theih dinga kibawl nek theih tuamtuamte (fast food)

EXERCISE

Lupna tung bebek ah om cip lo in huih siangtho ngahna muh te ah zingsang tung lamsiauh pih zeel ding ahi hi. Inn sung pan zong setvan le a dang muh theih TV, internet pan enkawm in exercise kila thei hi.

More: A suakcil naungek bangci kepding? (2) ~ Cing Van Kim

Exercise hih mah bangin tawlngak hithiat hun zong piak zeel ding ahi hi. Tawlngak hun sung a gei ah pau teptup lo ding, mi a lut/hawh zah zong ciangtan mai ding ahi hi. Cing Van Kim