Tedim – Ciau lampi (Tedim – Ciau Highway) by: ZGKK

Tedim – Ciau lampi (Tedim – Ciau Highway) by: ZGKK

THU PATNA: Tulai thuthang

Tu sawngteng Zomite lakah TEDIM-CIAU lampi tawh kisai thuthang in, numei naupang dongtakaa ki pan, akua akua a liinglawng sak hi. Tuabangaa ahih na in, ahih tuak takpi mah hiam, tua hilo aa aki uang genlua liang ahi hiam? ahih kei leh aki theikhial thu ahiam? ahih kei leh aki deih kaih lua thu ahiam? cih thu sittel, telgeh, khinggkhai in ki kuphuai ka sa hi. Banghang hiam cih leh, thu maanlo, thu ginalo khat peuh hangin, ih Zomite khat leh khat ki theih khialhna, tua tungtawnin ki lungsim nopmawh na, tua tungtawnin ki tap ki khen ki siat lawhna hilo ding hi, ki cithei lo hi.

Banghang hiam, cih leh, Kawlte taangthu ah, Pyu phatlai (Pyu khet-Pyu dynasty) aki siasak, a puuksakin, “Ngah sakaw, ngah sakaw- Ka lawhpi, ka lawhpi” cihbang lel bek hang a hihna zong, ngaihsut huai mahmah kasa hi.

Aki patna, khantohna

Khantohna ih cihin, mihingte in a nopzaw semsem in a khuasak na dinguh hanciamin mapaanna khat ahi hi. Tuabang khantohna in, Zomite’ aa dingin, tu’ tawwmaa ahong piangtawwm bang ahih hangin, atak takin Leitung piantuungin, mihing tawh a piang khawmpah ahi hi.

Tuhun ciangin Leitungin, khantohna lo tawh aki khuasak theihloh leh aki kaalsuan zawh kilkel loh lamtak ki tel mahmah ta hi. Zomite in zong, khangg lo in, akiim apaam uh enin a khuadaak uh ciangin, midangte nungah kum zalom khat bang a zekai zawh lamtakuh aki telsann uh hi. Tua hiaa, a khangto sate ih phaakzawhna dingin, amau kal khat a suan leh Zomite kal zakhat bang ih suanloh a phamawh ahi hi.

Tua ahih manin, midangte a phaakna ding bekbekuh lungsimah vomhin, mitsuanin a hanciamuh ciangin, mat taw, tup tawh, bet tawh, phuai tawh, humhsam matin, atuah masak sakuh man masa in, viik in, ki peekin a hanciam pahuh hi. Tuabang danbek hikei lai, lammaan tawnin mite delh ding uh hileh, a phaak zawhna dinguh ollo ding ahih lamtak teluh ahih manun, lamdawwt, lam matsat, lampelh tawnin a hanciam uh hi.

Lam dawwt

Tuabang aa lamdawwt tawtna (acian aphaan) in, a ngeina bang ahih loh mahbangin, thumaan thutak hilo, upadi huam sung zong hilo ahih manin, midangte tampitak huamkha, sukha, nawwkkha, nawwngkai sakthei hi. Tua hangin midangte aa dingin, supna leh baina aa ki pan buaina lianpipi a piang sak thei hi.

Tuabang lamdawwt totna in, hanciamna tawh hilo, midangte hihsa, a olsa teng olno takin acian aphaan tawh gu in, ahih kei leh a sutkhiat nate in, Kawlte pau-naak khatin, Zusa thadah, (Kyawetpiann- Lazy rat) aki cite bang ahi hi. Zusa thadahte in, amau thu in kua-thak to in khuat nuam ngeilo a dangte kua-lui citengah, olno takin lut kawikawi in a khuasate, a cihnopna ahi hi.

Ahuh apanpihte

Hih lamdawt tawn ih cihte in, amau thu leh tha bek tawh a tawnzo kei uh hi. Tuabangaa lamdawt a tot na dingun, a panpih thei, apanpih zo ding thuneite mah, a simtham tawhin a pawlbawl pahuh hi. Tuabangaa aki pawlbawl te in a huhuh a panpihuh ciangin, amau anguaii pua in panpih zo saaplo ahih manun, amau aa ding mahmah zong, noptuam na a ngahzek kei uh leh a piangtheilo ding thu ahi zel hi. Tua ahih zahkhatin, hih thute ah zong, asia apha tuabang aa a panpihte lubuuk a tun ding lamtakuh zong aki telloh khak dinguh in, alung himawh huai thu ahi hi.

Tuisa lakaa a om zolo, uiphukte banguh

Tuabangaa a simtham tawhaa a panpihte in, dotdot, dawwpdawwp, kankan, zonzon kul peuhmahlo, hihbang dan amau mabaan a sukha a nawngkai sak ding, amau aa ding thu hawihlo a hong pian ciangin, thuak haksa, thuakzo mahmahlo, tuisa lakah uiphuk aki khia mahmah bangin, hong diangkhia in, hong awngpah lialua uh ahi hi.

Tuabang dante, lamdang khat in gen lehang, Kawlte in, “ a-naa paw dohciah-meimatumh(uiluut) a naiphual sann laitak tungaa ciangtawn khat a dawn zumlam aa a tuusuk,” cihbang dan tawhin thuakhak salua mahmah uh ahih manin, ki iip zolo in amau leh amau hong ki pholaak, hong awngkhia ta uh ahi hi.

Laaituite leh khantohna

Laaituite ahih uh leh, khantohna in midangte bangin, tu’tawwm in mu in aki pan ahi kei uh hi. Nidang laipek panin ana muh leh ana hanciamna sa uh ahi hi. Tuabang bek hilo lai, kimkhatte bangin gengenin semngeilo in, a ol theithei in a ngahna dinguh lamdawt totna tawh a hanciamte bang ahi kei uh hi. Laaituite in khantohna a deihna dan aki teltheihna dingin taangthu tomno (anecdote) khat tawh helh pak lehang;

Innkuankhat a aneek dinguh nei nawnlo, a meikuang uh paisuak dingin a omlai takun, zingsang khat apa un khualdangah antaw dingin ippi khat a aakbawwm sungah guangin ki suan dingin aki thawi laitak, amau veengaa a ukpa, a upa pa in lamto dingin va hilh dihdih laizaang hi.

Apa un zong, bangmah phunlo paulo in, a aakbawwm aki suan ding kimlai khiakik in, aki sawlna, lamtawh na dingah a pai vinghvengh hi.

Tua ahih manin, “ Laaituite leh khantohna; khantohna leh Laaituite,” bang ki ciliang hi.

A deihuh leh, a hanciam Laaituite

Mawtaw lam bel, ih khua tek ah ahong tunna ding, a kuamah tekin aki deih ahi hi. Ahi zongin, ih ngahzawhna ding leh ih hihzawhna ding eimau thatang bektawh apian na ding ngaihsut theihloh zahdongin a haksa hi. Tuabang kawmkaalah, a deihmahmah na uh tawh hanciamin a sempah a om zahkhat in, deih napi in, sem nuamloaa, mi khut tawh gulman nuam cihbangin, midangte hanciamna a ngengg pawlkhat zong a omthei leuleu hi. Mawtaw lam neihna ding aki gen ciangin mangggen mahmah tawh ki bang liang hi.

Laaituite in mawtaw lam deihlua uh ahih manin, 1966- kum pan ki panin, a innmaa, a lomaa uh nusia liangin, ziin leh vaakin, guahzui meikaai nuai ah, azuu ahaam leh gilkial dangtaak thuakin a hanciam uh hi. Tuabangaa a hanciamna uh ah, gimh leh tawl thuakin, asi anaii uh tawh, cihmawh zawng khaal lawh, genhtheih lawh, azawn lawh angau lawh, a tumhlawh a gamhlawh, a sihlawh a manlawh tampi tak a om uh hi. A nuntakna uh khaamin a hanciam uh hi.

Asi anaii tawh a leite

Tuabangaa a hanciam laitakun, Laaituite hai a sa, a zahko, a cilphih a leiphenh, a mitsiinte keek mahte in tua a nuntakna uh tawh a lawhuh lampi eengin, lam tuamtuam tawh a tuhzawhna dingun a hanciam uh hi.

Deih aki tuh, tate

Hih thu in, innkuan khat sungah, anu leh pate in a tate uh, na a deihte uh pia zolo ahih manin, amau hanciam tawwmna tawh a ngahte uh khat leh khat ki guuk sak aa aki tuh tate bang ahi lel hi. Hihbangte a hangin, a nu apate ki sapna, a ginaatlohna man hi’n, a tawpna ah amau mawhpuak, tazakhaan ahi gige hi. Hihbangaa a hong kaw-kaakuh ciangin, ngaihsun thei taktak hile uh, amau leh mau a hii-na uh aki pholaak, aki seelpho pho uh ahi hi.

LAAITUITE’ MAWTAW LAM NEIHNA DAN

Hih thu limhpha takin ki sim hileh, Laaituite aa, TEDIM – CIAU LAMPI tawh kisai, tulai taka a dinmun uh ki telpah ding hi.

Tedim gam, gungal nitumna lamah, kumpite makaihna tawh Phuanhphiuzee lampi khat a omna ding thu ahong om hi. Phuanhphiuzee (Rural Develpopement) ih cihin, alang kumpite’n sumtang tawh panpih dingaa, alang tua kuamaa khua mite in taangtha tawh panpih ding ahi hi.

Tuabang thu ahong om ciangin, kumpite makaihna tawh lampi in, Tedim – Maansuang – Laaitui – Leentaang – Ciau atot theihna dingin Laaitui’ tate a kua mah peuhin ki lunggulh tek hi. Tuabang aa ahong piantheihna dingin:

01.1966- Lampi Committee anuai aa bangin ki seh hi.

• 01. Pu Vungh Khua Lian Chairman
• 02. Tual Khua Gin Member
• 03. Zel Khua Vungh
• 04. Awn Khua Vungh
• 05. Khup Za Thang

Hih lampi in Tedim-Lamzaang- Mansuang- Leentaang- Ciau atot theihna dingin, 02.1966- June tha in, Pu Vungh Khua Lian makai in, “Khup Za Thang “Zel Za Dal

Atungaa upa tengin, Khalkha aa Chin-oo-sii Chairman, Major Son Khua Lian(Rtd) tawh kimu dingin, Laaitui panin amau anguaii pua in, a khe uh tawh pai in, Laangzaang adelh uh hi. Tua panin Phalaam adelh leuleu uhhi. Phalam panin Bo Vungh Khai tawh ki tuakkha zenzen uh ahih manin, a mawtaw tawh Khalkha a tunpih hi.

Khalkha panin, Pu Son Khua Lian tawh ki mu in a vaiteng uh agen uhleh, Chairman pan in zong amau deihna bangaa a piantheihna dingin kamciam a piapah hi. Amau zong Khalkha apai na vai uh lawhcing kisa in aciahpah lennlenn uh hi. Ahi zongin,

03.1967- ciangin, Lt. Col Phutpa(Rtd) in, Chairman pa kumhlo pi in ama thuin, anuai aa bangin ana tuam vaihawm leuleu hi. Tuabangaa a vaihawm tengin, Lt. Col: Put Pa(Rtd), Member, Chin Oo-sii,

Pu Hau Za Lian, Ex- MP Mang Za Kap, RSM(Rtd), Tuitawh hausapa, Gin Khua Zam, RSM(Rtd), Lamzaang hausapa Kham Khan Pau, Myo-ok, Tedim te ahi uh hi.

A masa aa a vaihawmna uh in

Tedim panin Laamzaangah; Laamzaang panin tuaksukin Meitei gunah, Haita Ngahmun nuai, Pu Awn Ente lo tawh ki sanin sunhsuk sakin, tua laitakah Meitei gun kaantanhin lei dawh ding; tuatak panin, gundung zuisuk sakin Mualsiik nuaiaa gungei ah; tuatak panin, Kaaptel leh Teizaang kualtengin Tanghlui kantanh in lei dawhin Lunmual- Kaaptel ah; tuatak panin Teizaang kualah mawtaw lamziik ding; Laaituite in, Mualsiik nuai panin, Tuihaang-Lamaangg-Balvom tawnsakin Laaitui-Leentaang-Ciauah mawtaw lam ziik ding agel uh hi.

A nihvei na ah

Atungaa thukimhna bangin gungal kual khua10-te in Tedim panin ziiksuk uhaa, Laamzaang dong ki tunsuk pah hi. Tuaciangin Makai(PhutPau) in athu uh laih leuleu uhin, Laamzaang panin agel masakna uh zui nawnlo in, Lamzaang panin Kaaptel lei sunsuk sak suakin, gungal Thawii- zaang panin Kaaptelte in amau khuaah, Teizaang kualte in Suangzaang tawnsak in Teizaang kualah; Laaituite in Thawiizaang kantanh in Tanghlui ah lei dawhin Tuihaang- Lamaang-Balvom ah cihbang in agel leuleu uh hi. Tuabangaa a Makai pa in a thu uh a laihzawh ciangin, Tedim-Lamzaang ciang a ziikkhawm uh hi. Tuazawh ciangin, Laamzaang panin Kaaptel leii sunhin lamziik ding ahi hi. Tua bangaa lam aki ziik ding ciangin Laaituite alung uh atung zo peuhmah kei uh hi. Tua ahih manin, Laaitui te’n Lam- zaang panin Mansuangah amau guakin ziik dingin a vaihawm pah uh hi.

Kaaptel lam mah ki deihsak tek

Tua a makaite in Kaaptel lammah deihsak tekuh ahih manin, Kaaptel lam tawnin mawtaw lam ziik dingin a kipsak uh hi.

Laaitui te’n ziikpih ding maw…, Kaaptelte lampi

Tua ahih manin, Kaaptel lam ziikpih dingin a tungsiah panin aana tawh aki sawl ciangin Laaitui hausa upate aa kipan khuazaangin dahin, ki liinglawng tek hi. Hausa upate lah Tedimah pai in, a paungam leh a nial ngam kei hi.

Galhangte sang ahang zaw…, Laaitui tate

Hunbitaa asem hausa upate apai ngamloh uh ciangun, parttime tawh asem anuai aa tengin amau anguaii pua in anial dingin ava pai uh hi

• 01.Pu Vungh Kham,
• 02.“ Thawng Khua Vungh,
• 03.“ Thuam Kam,
• 04.“ Pau Za En,
• 05.“ Tun Za Nang

Hih a tungaa tengin Tedimaa a thunei bel, Nahlahkah Ohkathahpa kiangah,“ Kaaptelte’ lampi neih ding a nial hikei ungh. Ko zong Tedim pan in Laaitui ah mawtaw lam tawh ding nei ka hihmanun, Kaaptelte’ lam ka tawhpih mankei dinguh hi,” ci’n anial dingin vapai uh hi.

Laaitui khuazaang tatna ding thonginnpi

Tedim atun uh ciangin, Nahtahlah Okkathah pa tawh aki muhma un Myo-ok, Kham Khan Pau in a mauteng na ki muhpih masa in, thu a niallohna dinguh, a nial uh leh tungsiahte thunial teng thong kikhia ding hi, cihna tawh tawwngin na lauthawn hi.

Amau zong tuabangaa aki lauthawn uh hangin lautuanlo in, “ Thunial teng thong hon khia ding na hih uhleh, ka khuazaang tatna dinguh thonginn nalam masa un,” ci’n a nial leekleek uh hi.

Tua in, tuabangin kiniallo in Kaaptel lam ki ziikpih hileh, tuciangdong Kaaptel lam tawnin aki zangsuak ding hia, Laaitui in tua bangin lam leh lei ngah ngeilo ding ih hi hi.

Tua tungtaangin tua a paiteng, Pu Vungh Kham in anuai aa bangin la aphuak in ah;

• (a). Vaangkhua ziinbang lin laitakin, vaimang abia kei hing e.
• (b). Tuanglam dawhin taam awee, kiillam suihaa ngilawe.

04.1967 – Lamzaang pan, gun ( Maansuang) dong mawtaw lam kito hi. (Laaituite a heh masak na uh).

Lamzaang panin Maansuang dongh mawtaw lampi 12’ taamin tai 4- asau ni 28 sungin kizo hi. Hihbangin lampi aki tawh zawhciangin, Laaitui tate akua mahpeuh, ateek akhang, numei naupang dong takin lungdamin
ki paaktek uh hi.

05.1967- 02-08 Athuap aa a lungdamte unau

Tuabang aa aki paak kimtek na ah, Pu Thawng Khua Khamte unau in, athuap leh aval akaan aa a lungdam na uh lahna in sial khat Maansuang gunpiau ah go in pawi akham’ uh hi.Tua lampi honna ah Mahtalah Chairman Major Thein Lwin leh Vuandok Hau Khua Paute in zong ahong zoo uh hi.

06.1968- Gun pan Laaitui dong mawtaw lamto leuleu. (Laaituite nihvei a hehna uh ).

07.1969- Laaitui khua ah mawtaw ahong pai masak belbelna. Maansuang lei aki puahkik zawhciangin Laaitui ah TZKBC(Thang Za Kam Baptist Church)kumcin ki khoppi(siivuaiipi)atun ciangin, tua khawmpi a zoo dingte lakah, Lt. Col Suan Do( Rtd), Rev.Thang Za

Thawng, Myo-ok Kham Khan Paute aa kipan siate leh ulian pawlkhatte in, Pu Thawng Khen Kham(Kawlpi)’mawtaw tawh ahong pai uh hi. Maansuang lei in aki puahthak ahih baanah, tua masang siah peuhmah gungal kaai in mawtaw ahong galkah ngei nailoh sitawh, a kuamah peuh in mawtaw in Maansuang lei tungah pai aa a galkah ding lamdang aki satek bek hikei, aki umthei kei hi.

Tuabang kawmkalah, Myo-ok Kham Khan Pau in, lampi leh lei tawh kisai, Kaaptelte aa ding a deihsak luatman tawhin, Laaituite thapia ngeilo bek hikei, a kaankuat tawntung ahi hi.Tua ahihman in,mawtaw in Maansuang lei a kantanh ding thukimlo, awilo in akham’ hi. Tuabang kawm kalah, PuThawng Khen Kham leuleu in, a pawlpi ahi TZKBC leh Laai-tuite mahmah zong a pahtawi nopluat manin, mawtaw tawh kuamah pai ngei nailoh na, kuamah totngei nailohna Maansuang lei kantanh aa a mawtaw ahawl ding, uuk cihtakin a uukthong hi.

Upna in zawhna ahihna

Aki khaamzawh tuanloh tak ciangin, Pu Thawng Khen Khamin atungaa tuangteng zong tuaktha saktuanlo in, upna mah a talah suang viuviau kawmin Maansuang leitung tawnin a galkah pihthei/zota hi. HaleluiYah Tua tungtaangin tuabek hipallo,TZKBCte in a khawmpi uh bawlin a-sann laitakin, Tedim aa Pi Lian Za Cing si ci’n hong kiko bek hilo, tua pawi-a a makaipi ahi, a makpa uh, Lt. Col. Suan Do theihkholh lohpi in Dalpi’ in a mawtaw tawh, tua lampimah tawnin hong samkik hi.

08.1976- Laaitui panin Lentaang (Suangphuh dong mawtaw lampi ki to. (Laaituite thumvei na a hehna uh).

09.1978- Gun pan Laaitui mawtaw lamthak kito. Union Highway ding.

10.1989- 01-10niin, Tedim-Maansuang-Laaitui-Hrih lam lianpi ding tawh kisai, Planning bawlaa ten ding, Bahoo te’n Pa Pau Za Mung asawl hi.

11.1989- 01-11 ni in tua planning Bahoo ah kipia pah hi. Appdx.1.

12.1989- 01-11 ni in, Bahoo in, Construction Minister tungah, amanlang theithei aa ahong hihsak pah dingin lai hong at sakpah hi. Appdx.2.

Construction Minister in Construction Corporation MD tungah a man lang theithei a Survey a bawlpah na dingin thu piapah hi. Construction Corporation MD in zong, Tedim-Maansuang-Laaitui-Hrih Union Highway bawlna ding akisam Reconnaissane Survey bawlaa aki samteng asem dingin

• Road & Bridge Design Excutive Engineer 1 makaisak
• Road Design Assistant Engineer 1
• Bridge Design Assistant Engineer 1
• Survey Engineer 1
• Survey Supervisor 2
• Survey Helper 2 apai dingin, a vaihawm pah hi.

13.1989- 01-25 tua vaitawh kisai, thu a kicing takin hausapa leh athei dingaa aki lawm teng laihak hi. Appdx. 3.

14.1989- 02-02 atung ateng Zangkung pan in vanleeng tawh Kawlpi tung hi. Hong lung hihmawhsak, Bahoo in hong deihsak lua ahih manin, tua lampi tawh kisai zumlai peuhmah, bangmahlo in lamkaal lakah a manhthong ding patau ahih manin a suallo ding cihna tawhin ih Zogam a ulian tengpersonal in lai hong khaksak lai hi. Lai ahong khaksakte in,

15.1989- 02-17Chin SLORC, Chairman Appdx. 4.

16.1989- 02-18Tedim Mahwahtah Okkathah. Appdx. 5.

Hong ki nawngkaai sak

17.1989- Kaaptelte in SLORC, Zangkungah, Laaitui lam sangin amau lam hawihzaw hici in, Theu Khan Dal makaihna tawh mi 40- in letmat thuhin thu maanlopi tawh Bahoo ah lai na at hi.

18.1989- 04-21 Construction Corporation MD in, lampi aki bawl ciangaa akisam dingteng thempeuh asem dingaa apai sak Survey pawlte muhnateng kicing takin Construction Minister tungah puak Appdx. 6.

Zekaai salua ahih man

19.1989- 08-04 Bahoo in, Construction Ministry ah, sauvei salua in ngaklah lua ahih manin, Ministry Administrator lai hon atsak leuleu hi Appdx.7

20.1989- 09-21SII in Chin State LORC Chairman khak hi. Appdx. 8.

22.1989-10-06 Kaaptelte laiat na hangin, SLORC in Construction Minister kiangah, Laaitui leh Kaaptel koilam hoihzaw cih, sittel dingin sawl leuleu hi. Appdx. 9.

23.1989- 10-19 Atungaa tawh kisai in, bangci ciang hihzo cihleh a geldan uh Construction Minister in Constr. Corporation, MD kiangah a dotna ahi hi. Appdx.10.

Lung himawh

24.1989- 11-09 Bahoo in, hih Tedim- Maansuang- Laaitui- Hrih lampi aki sepna a lungsim bangsa zolo in, Chin SLORC Chairman lai khak in, Bohmu Khup Cin Pau apia dingin paisak hi. Appdx. 11.

25.1990- 01-02-SLORCin, Construction Minister kiangah, Laaitui lam leh Kaaptel lam koihoihzaw cih a sittelna ding asawlna bangin, Construction Minister in a zaaksak kikna ahi hi. Appdx. 12.

Hong ki nawngkaai sak leuleu

26.1991- 01-31Kaaptelte in, Laaitui lam sangin amau lam hoihzaw hi, acih bekloh, amau lam leitawh ding amau Kaaptel khuazaang thatang tawh hihzo ding ahih nate, SLORC, Chairman tungah lai nana at leuleu hi.

A Mualsuang dingin

27.1991- 03-07. Lt. Col: Putpa (Rtd) a kici khatin zong, ama noptuamna dingmah ngaihsutna in, SLORC Chairman, Sr. Gen. Saw Mg. tungah, Laaitui lam sangin Kaaptel lam hoihzaw hi. cihna tawh a mualsuang Ding tupna tawhin lai nana khak hi. Appendix-13

NB:- Tua tungtaangin bangmah ki lamdanna om tuanlo hi.

28.1991- Tedim-Hrih aa ding, Bahoo in 1991/92 aa Preliminary Survey bawlna dingin K500,000 hong pia hi.

A ngetna banglian’ uh ngahtuak

29.1991- 01-09 Kaaptelte in, amau lam leitawh ding amau’ thatang tawh hihzo nung a cihciangin, SLORC te’n, amau lam, amau thatang tawh ana hihna ding leh, a kisam kaattazaa (Bitumen) leh suangsii kumpi ten sikh ding ahih na ahi hi.

Kaaptelte leh Mawahtah Okkathah mahmah aa kipan pawlkhatte in, hihin Laaituite lampi a tuhkhiat zawhna danin khiakhial uhhi. Atak takin, aki sim phatphat ciangin, tuabang ahi hetkei hi. Ih uliante, pillah pil, teiilah ateei, navaak lah a navaak mahmah uhaa, Kaaptelte lung kimna ding pilvaang takaa lai a thuhna a hihi.

Laaituite lampi peuhmah sukhalo hi. Laaitui leh Kaaptel in a ngetbang linnliann uh angah tuak a hilel hi. Appdx. 13.

NB:-Mahwahtah Okkathah pa in, kei cih hong mangg nuamlo in, aki genbangin leitawh ding teng, Kaaptel te’n tolo in, gungal kualaa khuateng aanaa tawh asawl leh kuamahin mangnuamlo in, tuciang dong ki tolo in a omlai hi.

Laaitui lammah kitel

30.1992- 01-22 SLORCte dotna bangin, Laaitui leh Kaaptel lamnihte asittel zawhuh ciangin, social, environment, commercial, geographical leh technical point of view tawhin, Laaitui lammah hawihzaw ahih manin, Tedim-Hrih lampi dingin Laaitui lammah a telzawh baanah, sem dingin aki patpah na ding thu a zaksak kikna.

31.1992- 10-15 Commander, Northwest Command in, Laaitui lam leh Kaaptel lam koi zaw kipsak cih a zaksakna ding, Construction MD pa tungah a ngetna ahi hi. Appdx 14.

32.1992- 11-06 Construction MD in, Laaitui lamin, aki sam point of view teng khempeuhin Kaaptel lamsangin hoihzaw ahihna, facts and figures tawh, SLORC in a kipsak zawhciangin a sepna ding a gelna danteng, Construction Minister tungah a zaaksak ana hihi. Appdx. 15.

33.1992- 11-24.Construction Minister in, SLORC in Laaitui lam hoihzaw ahih manin, a kipsak na ding leh, tuabang aa akip sakzawh ciangin a sepna dan dingteng a zaksak na ahi hi. Appdx. 16.

34.1992- Budget kipia

Tedim – Hrih Union Highway lampi bawlna dingin, kumpite in

35.1992- 93 fiscal year aa dingin budget K 3,500,000 pia hi. Hih sumteng tawh Tedim, Vansaangdim panin Lamzaang dong lamthak kito hi.

NB:- Bahoo takpan in Survey bawlte in, Tedim- Maangsuang- Hrih lam pi Road alignment, Tedim panin, Lawibual, Meiset nuai, Pu Pau Za Mung’ innmai panin kipan dingin abawl akip saksa kimlai,  Tedim khuasung upate in, Chief Engineer, Chin State U Kyi Wa tungah, Lawibual pan ki panlo in Vansangdim pan aa aki patna dingin lai ana khiasim uh hi. Tuabang aa ahih ciangin U Kyi Wa in ama thu tawh aa alaih ahi hi.

Ki kipsak taktak ta

36.1992-12-21. SLORC in, Tedim- Hrih lampi dingin, Laaitui lam akip sakna leh a kisam budget zong

37.1993- 94 aa dingin a gelpahna dingin, Construction Minister tungah a zasak hi. Appdx. 17

38.1993- Budget ki pia leuleu

Tua kumaa dingin Construction Ministry panin K500,000 kipia hi.

39. 1995- kumaa ki panin, Myanmar-India Border Trade ki hongin, tua aa ki panin Myanmar leh India kumpite in, kumsimin Revenue tampipi a ngahna ahi hi.

Laaituite hanciamna hang tawhin, hih lampi bek panin, Chin State buppi ah, panin Revenue aki ngahna ahi hi.

40. Byu-haa lan( Tactical Route )

Tedim-Maansuang-Laaitui-Leentaang-Hrih lampi in, Byuhaa lan hi nawnlo in,Pyethaungsuh lannmahgyi(Union Highway) a hihna zong, ih suut ding hi.

Hih lampi, Bahoo in kipsak(approved)in, order asuak zawhciangin, kumpite’n hong deihsaklua ahihmanin, a manlangtheithei in ahong bawlsakna dingin, Byu-haalan(Tactical Route) bangdan tawh Galkap Engineer Operation (BE) te’n hong hih sakna dingin gelna ahi hi. Tuabangin hong hihsak ding hileh, Settha (Machinery Power) vive  tawh hidingaa, kum 4- sungbangin ki zothei ding a hihna, kumpi lam panin genna nei uh hi. Tua aki panin hih lampi Tedim- Maansuang- Laaitui- Hrih lampi Byu- haa lan a kici ahi hi.

41.Ki uapnaap/ huaiham lualiang.

Byu-haa lan bangin Galkap Engineer te’n hong hihsak hileh manlang mah na vencin, eimi te’n, lampi kingah cihsimloh ih nop tuampakna a ngahkei ding uh hi. Aki lunggulhna ah, lampi lah ngah ding, tua lampi  nasep na panin, leitawh, suangsi sataa ki pan, mihing tha tawh septheih (unskilled manual labour) teng kisem leh, mi tampi takin nuntakpih lai ding ahih na ding ki tumh sawnsawn hi.

42. Pyithaungsuh lanmahgyi( Union Highway)

Tua a hihmanin, kumpite kiangah Byu-haa lan bangaa ahong hih sak lohna ding leh, Civil lam(Construction Coorperation) panin, ahong ki sepsak zawkna dingin aki ngetleh, aki ngahpah takpi hi.

Kumpite’n, hong deih saklua, hong puah nuamlua a hihman, a thu guipi khat (policy) sukha keipeuh leh, hong naupang bawllua zaw in, ih cihcih bangin a hong mangliang ahi hi.

Tua a hihmanin, Tedim-Maansuang-Laaitui-Leentaang-Hrih lampi in, Byu-haa lan(Tactical Route)hi nawnlo in, Civil lampan ki hih a hih man in, Pyethaungsuh Lanmagyi (Union High Way) ahi hi.Ahi zongin, pawlkhat khatte in tuciang dong Byuhaa-laan mah cilai veve uh hi.

43. Akta duhgawl ki lawhkhuph

Kumpite hong piak masak bangin ki sangpah lel hileh, tua lampi 1995-96 pawl bangin ki mansiangzo ding hi. Ih mipihte aa ding, ki huaiham, ki uapnaap lualiang na hangin, tuciang dong tua lampi aki zo nailo a suakthong hi.

44.2005- kumin, India kumpi in, Ciau- Leentaang- Laaitui- maangsuang- Tedim lampi omsa, a phuahphat(upgrade) kikna dingin Media tuamtuam ah hong suak hi.

45.2006- kumin, Kawl kumpi leh India kumpite ki thukimna tawhin, Border Trade Highway dingin, a omsa Ciau-Leentaang- Laaitui- Maan- suang -Tedim lampi puahphat (upgrade) na dingin (Road Alignment) zon ki panin,

46.2014- kum ciangin tua alignment thak zon a manuh hi. Tutuung a thubuai in, Laaitui lam tuabang lam alignment thak a zon a mansiang zawh ciangin ahong ki pan ahi hi.

THU KHUPHNA

Laaituite in lampi a deih mahmah uh hangin, kuama aa guuksak ngeilo, tuhsim ngeilo in, zong a nawngkai sak ngeikei uhaa, amau hanciam tawwmna tawh a hihtheih bangun, Pasian zia leh dan thuuktak tawhin ngaihsun kawmin a hanciam uh hi. Amau midangte aa tuh ngeilo, midangte in amau aa a thuhzaw; amau midangte aa nawngkai sak ngeilo, midangte in amau aa a nawngkai sakzaw ahi uh hi.

Tuabang thu aki telzawk kaanlai na dingin;

Lampi vai

Lampi vai ahih leh, a tungaa bangteng hileh, aki cing mahmah pahlel hi.

Myonee vai tawh kisai.

47. 1962- kum, Galkap in kumpi anaa a laakzawh ciangin, Kham tung Chin Oosii apuaih tawh hong uk hi. Tua ah,
Major Son Khua Lian (Rtd) Chairman, Lt. Col. Putpa (Rtd) Member, Capt. Cin Zam(Rtd) “

NB: Hihbang hinak pi’n, Col. pa in a galkap sung dan mah salai ahi taammaw, Chairman pa thusimlo ahih manin a thu mangg vetlo bek thamhloh, Chairman pa hihsate awlmawhsak hetlo kici hi. Hihbang dan tawhin, Col. pa khuaveengte in zawh cihtakin nana zo ahih manin, Laaituite in thuak cihtakin ka thuak ngeekngeek uh hi.

Tua kum mahin, Chairman pa in, kuama nget zong hilo, aman kilawm(qualified) bel a sak, Laaitui khua Myonee khuai(Sub-Township) dingin order a suaksak hi. Tuabek hilo lai, tua aa Myo-ok (ATO) a sem dingin University a mantuung, Pa Gin Khan Langh zong order a suaksak pah hi.

Tuabang ahi zo kimlai, lampi vai mah bangin, amau Col. pa nana kawi ahih manin, Col. pa in zong Chairman pa kumh tuan nawnlo in aman thu in Kaaptel aa dingin ana laih ziau hi. Tua ahih manin, Laaituite Sub-Township in, khuaveengte khuaah a tungthong hi.

NB:- Pa Gin Khan Langh mahmah in zong, khuapih aki tuakpihte kiang ah, Laaitui ah pai ding ahihna zong gen kawikawi zo ahihna zong ki genlai hi.

Station Hospital vai

48. 1989- kumin, Ministry of Health ah, Khamtung gam Station Hospital (3) tengaa ding order ka laak tung taangin zong, Adminstrator, Office of Ministry of Health pa in, Khuaveengte in, Laaitui khua sangin abang abangah amau khua in hawihzaw ahihna; amau khua ah, Station Hospital ki pia hileh, amau a innlamna ding a lei ziiksa in nei zo uh ahihna; Aki sam ding leiseek teng zong neikhin zo uh ahihna; aki sam ding singteng zong amau tawwmlai dinguh ahihna lai atna hong gen hi.

Ahi zongin Ministry of Health in, amau tupbang danin lai thukkik lo in, aki samteng manzo ahih uh leh Zato inn ana lamhna dinguh, aman zawh ciangin a zaaksak na ding leh, Ministry of Health in a hon sak na ding thu a zaksak kikna hong gen hi.

Maansuang Bailey Bridge Assembly Parts

49. 2002- kum pawl dingin, Phalaam Bailey Bridge Parts luuiteng, Maansuang leii aa dingaa ahong ki puak zong, Lawibual ahong tungsa zong, khuaveengte mahin, Kaaptel lei aa dingin na gu in mawtaw nih ding ana nawnzo hi. Tua zong Pa Kham Suan Mung hanciamna tawh in ki lakik hi.

A pahtaak huai, Khuaveengte

Khuaveengte in, Hydro Power Electricity a ngahna danuh bel thupi ka sa mahmah hi. Kuamah kollawh selo; kuama aa lah tuh se lo; kuama aa lah nawngkai sak se lo; taangtha tawh tawh ahi theih tenguh semin, sumtangh ki samh bel, gamdang a tungsa Dr. te innkuanin si ngeu ahih na ka theikha hi. Tuabangaa ahihna un, zong a etteh huai mahmah thu ahi hi.

Tuamah bangin tutungaate ah zong, Dr. pa in a khuapih a tuipihte lam leh dan a maanloh lamtakuh lakin hilh in makaih na tawh ama thupha bawl nate hong zom toto lai ding ki lawm hi.

Laaituite ahih uhleh,

Laaituite aa dingin, a tungaa thute bekbek tel ngaihsut mahmah lehang, hihbang danin a lamdang hilo in, ka tuak tawntung thu uh ahi hi.

Tua hiaa, Thumaan Thutak ahi Pasian zia leh dan tawh, ama hong awi na tantan, ka thumaanna uh ka lak dinguh hi. Na khempeuh aman a theihloh khat zong a omkei aa, ama theihloh aa apiang zong na khat beek a om kei hi.

Tuabang ka hanciam nasate khempeuh uh, asia apha AMA tungah ka apsa uh ahi hi. AMA deihna bangbang hi tahen!!! KA UPPA UH KA THEI UH HI.

NB: (a). Extracted from LAAITUI KHUA MUAL SUANG (b). Appendixes te in, lai tamlua ding cihna tawh in hong ki lak nawnlo hi. TRUTH SHALL PREVAIL AT THE END