Finland te’ naupang laihilhzia

Finland te’ naupang laihilhzia

Kum 2000 pekin Finland gam naupang laisinsakzia pen leitungah a hoih pen pawl in kiciamteh hi. Kum 2009 ciangin sangnaupang 500000 kiimte performance survey kineihna pan Finland student ten science ah a nihna, reading ah a thumna leh maths ah a gukna ngah uh hi. UN te research bawlna ah zong Finland naupangte leitunga naupang lungnuam pen in kiciamteh hi.

Naupang pattahna lama Finland te lawhcinna thuguk thei nuamin kumsim in gam 56 kiim pan representative 1500 kiim zin den uh hi. Finlan te’ naupang laisinsakzia a tuam dan diaknate:

India gama Siavuante a ki thupi ngaihsut danin Finland gamah sangsiate kithupi ngaihsut in ki zahtak hi. Sangsia kithupi ngaihsutna gam ahihmanin mi tampi ten sangsia sem nuam uh hi. Kidemna sang ahihmanin sangsia nasep ngahna ding baihlo hi. Teacher training neih nadinga exam pen haksa mah mah hi. Applicant tampi lak pan tawm cik bek training thei dingin teel zel uh hi.

Teachers training pen kum nga sung sawt hi. Tua training na ah galkap lam tawh kisai, laihilhzia, dan leh policy, mei phelhzia, self defence leh first aid training te kihel hi. Tua training a zo khinte pen zat taak mah mah pah uh hi. Sangsiate dan leh policy bawlna ah major stakeholder ahi uh hi. Finland gamah sangsiate khasum tam hi. Finland gam naupang sang khempeuh pen kumpi sang ahi hi.

Private sang hawn phalna kipia lo hi. India gam danin sang minthang diak mihaute’ tate bek kah zawhna cih dan omlo hi. Sang khempeuh in sangsia hoih nei kim uh hi. Sang khat ah a tam pen sangnaupang 600 val admit ngeilo uh hi. Elementary education ciang pen mikim a mawkna in kah thei uh hi.

Finland gam naupangte kum sagih a phak ciang bek un sangkah uh hi. Sangkah a ni masa pen in laihilh pah lo uh hi. Kimawlna leh gualnopna a tuam tuam tawh hunzang uh hi. Sang khempeuh ah doctor om ciat uh a, sangnaupangte’ cidamna hoih maw hoihlo endik zel uh hi. Sangnaupang khempeuh sangah a mawkna in ann kivaak hi.

A kipa ann te zong taksa leh khuak a dingin hoih thei mah mah hi. A tangpi in zing sang nai 9:00 AM khitciangin sanglut pan uh hi. Minute 45 lai a hilh khitsim un minute 15 ta kimawlna hun pia zel uh hi. Nitaak nai 2:00 PM kiim in sang tuak zel uh hi. Sangah naupangte a gim uh ciangin tawlngakna mun zong nei uh hi.

Subject ngeina te banah tumging, khutsiamna leh kimawlna thupi ngaihsut mah mah uh hi. Finland te ngaihsutna naupangte adingin sang pen laisinna mun hi a inn pen lungsim pumpi talngakna mun hi. Tua ahihmanin sangsia ten home work pia ngeilo uh hi. Kum 13 a cin masiah uh exam kician tak neisak nailo uh hi.

Sangsia ten naupangte thu ngaihsun a telsiam ding leh amau leh a mau a thukaan thei dingin hanthawn uh hi. A sangsiate’ u dawn theihloh ding dotna ngaihsut khia thei dingin thapia uh hi. Tuabang dinmun ah a answer ding ngaihsun khawm zel uh hi. Sangnaupang ten creative thinking a neihtheih nangun siaten makaih uh hi. Lai-et teh cih peuhmah om ngei lo hi.

A thu bek hi lo in a practical in pilna sin uh hi. Class khat sunga tukhawm lakah a siam baih a siam hak om thei hi. Gamdangte ah a khangual te sanga a siamzaw te kipaisan thei zel hi. Tuabang ciangin inn lamah a nu leh paten tuition a laksak uh a kuul hun zong om hi. Finland gamah tua banga a tuantual diak sangnaupangte special takin sia ten hilhzel uh hi.

Sia ten naupangte phat uh a lawpsak uh hi. Sangnaupang khat leh khat tehkak ngeilo uh hi. Mi lawhcingte’ tangthu tam genpih uh hi. Sangsia te hoih ahihmanin nuleh pa adingin inn lamah hilhbeh kuul lo banah a pua lamah tuition laksak zong kuul lo hi. Pau Tun Thang