Syria galkap te’n Terrorism siansuah nading in galkap thakkhat phuankhia, kidona nasia

Syria galkap te’n Terrorism siansuah nading in galkap thakkhat phuankhia, kidona nasia

Nov. 23, 2016: Syria galkap ten zan in terrorism zawh siang theihna dingin “final victory against terrorism” kici galdo dingin galdo nuam a kipia khiate (volunteer conscript) cial hi. Hih dingin galkap dingte pen commando force thak hi ding a, a galkap min dingin Fifth Corps cih min phuak uh a, ahih hangin koi mun-ah gal kidosak ding hiam cih gen lo uh hi. Syria galkap ten kum guk sung phial galdo ta uh ahih manin a si zong a tam banah thanem tuam mahmah uh ahih manin a gam kiim ua a lawmte’ galkapte (regional allies forces) leh Russiate huhna ah a kingak uh kul pian ahih manin galkap thak ding lak sawm uh hi.

Iran in zong zan in Syria gal kikap 2011 khit nung Syria galdona ah galkap 1,000 kisup lawh ta hi ci-in pulak hi. Syria galkap ulian ten hih galkap thak Fifth Corps kicite Syria galkapte leh a pawlte uh tawh kipawl in President Bashar al-Assad langpangte do dingin kizang ding hi ci uh hi. Syria galkap ten tu sawng ten gualzawhna a ngahna uh leh a mainawtna uh-ah a thuap ding leh terrorism siansuahna dingin galkap hon thak kisam hi ci-in Syrian army statement in pulak hi.

Fifth Attack Troops Corps of Volunteers kicite pen kum 18 mi tung lamte kila ding a, galkap panin a tai khia khin sate kideih lo ding hi. Military analysts ten buai ma-in Syrian army pen galkap 300,000 kiim hi a, ahih hangin tu lianin bangzah pha hiam cih kithei lo hi ci hi. Tu lianin Syria galkapte kipawlpihte pen Iran galkapte, Iran in huhna a piak galdo dinga kipia khiate (Iran-backed militias), Lebanon beel-a om Syria a galdo dinga kuan Shia-Muslim Hezbollah group kicite leh Russia ten tung lam panin huhna pia uh a, President Assad langpang rebelste leh ISte do uh hi.

Syria galkap ten kha tampi a umcihna uh rebelste ukna Aleppo nisuahna lak kik ding hanciam lai uh a, hih mun panin a kihem khia nuamte a kihep khiatsakna ding uh leh khua sung mite nek ding a piakna dingun rebelste kiangah kunh uh a, galkap hong lutte na pawl bawl un ci-in khuamite zong thu zasak uh hi.

Syria galkap ten khua mite muh dingin vanleng panin thu thehzakna laidal (leaflets) khia uh a, tua laidal sungah Syria galkap ten a khua lak kik khit sate panin rebelste leh khua mite a puak khiatna dingin a zat uh bus dum lim leh “Thau tawite aw, note sapna dingin ka khutte uh kong zankhia uh hi. A zekai luat ma-in na omna uh na nusiat san uh” cih tuang hi.

Syria kumpi Aleppo bup lak kik ding hanciam in Aleppo ah kidona nasia mahmah a, tu kal bekin Syria kumpi’n rebelste ukna Aleppo nisuahna lamah bomb a khiatna hangin mi 141 in sihna tuak a, tuate lakah naupang 18 kihel hi ci-in Syrian Observatory for Human Rights (SOHR) in zan in gen hi. Syria kumpi in Aleppo nisuahna lak kikna dingin nung Pithai (Tuesday) panin galdo pan uh hi. Syria galkap ten rebelste 87 that ta uh a, rebels ten Syria kumpi ukna Aleppo nitumna bomb leh thau thawh a kapna hangun khua sungmi 16 (naupang 10 kihel) in sihna a tuak banah mi tampi in liamna tuak hi ci-in SOHR in gen beh hi. Source: News Agencies/ Thang Khan Lian