Egypt President lui Morsi thahloh dingin thukhenna kinei khongkhongta

Egypt President lui Morsi thahloh dingin thukhenna kinei khongkhongta

Nov. 22, 2016: Egypt gam-a democracy deihna tawh President kiteelcing masa pen leh a zaa panin galkap ten zawhthawh thu tawh 2013 in a paih khiat uh President Mohamed Morsi in Palestine gam-a Hamaste adingin thukan sim ngei hi ci-in ngawhna tuak a, hih ngawhna hangin sih dan (death penalty) piak dingin thukhenna tuak hi. Ahih hangin nung kal in Court of Cassation in hih thukhenna vai man lo hi ci-in thukhenna neih kik (retrail) ding hi ci ahih manin thukhenna kinei kik a, thah dinga daan kipia pen damsung thongkia ding ci-in thukhenna lui pen kilaih kik ta hi.

Morsi pen 2011 in President Hosni Mubarak a let lai-in thongkiate tampi suahtakna ah buaina bawl in kigolh hi ci-in zong ngawhna na tuak hi. Morsi pen Muslim Brotherhood kicite makai hi a, galkap ten thuneihna hong let ua kipanin hih kipawlna pen terrorist kipawlna hi ci-in daan pua leh thukham palsat hi ci-in kikoih a, mi tul tampi kiman in, thong sungah kikhum khin zo hi.

Morsi’ sitni (lawyer) Abdel Moneim Abdel Maqsoud in Court of Cassation in Morsi’ tungah Morsi in Iran leh Hamaste adingin thukan sim hi cih ngawhna zong la khia ta hi ci-in AFP news agencyte kiangah gen hi. Al Jazeerate’ Middle East analyst Yehia Ghanem in hih Court of Cessation ah politics kigolh a, Morsi kikhumna thonginn omna district pen mi tul tampi in thukhenna a tuahna mun hi a, Egypt kumpi langpang (opposition) khempeuh pen ‘terrorism’ case ngawhna kibawl khum pong hi ci-in gen hi.

Morsi tungah ngawhna dang tampi zong kingawh beh lai a, gamtuamte tungah Egyptte’ thusim pia sim hi (Qatar gam zong kihel hi) ci-in kingawh a, 2011 in zong thong panin tai khia hi ci-in kingawh hi. Morsi leh Muslim Brotherhood member tul tampi kimante tungah thukhenna ah politics kizang hi ci-in rights group tuamtuam ten ngawh a, tuate lakah Human Rights Watch leh Amnesty International zong kihel hi.

Appellate Court in Morsi kithat lo ding a, thonginn ah kum 20 kikhum ding hi ci-in thukhenna nei hi. Morsi in a president let ding a hun (term) ciangtan kum li lak panin kum khat bek na len man hi. Source: News Agencies/ Thang Khan Lian