Midang Makhelhna Dingin ~ Hau Za Cin

Midang Makhelhna Dingin ~ Hau Za Cin

Taikidemna ah a taihat pen in midang khempeuh makhelh ahih manin a khatna ngah hi. Tai hat mahmah taleh a thaneihzah tawh a tai keileh a tai hatlo zaw pa in makhelh ding hi. Nuntakna zong tua bang ahi hi. Aesop Tangthu ah Bilpi leh Sumkuang tai kidem a, Bilpi taihat mahmah taseleh a kung dong a tai ma in ihmu se ahih manin a khanlawh ciang vil sa in a tai hang Sumkuang in a tawpna na tung man hi. Gentehna hi a, a tawp dong a tunma in khawl, tawlnga cih a lahnopna hi.

Leitung mihing khempeuh i tun theihna sangpen a kitung nuam ciat ahi hi. A hau nuamlo omlo, a pil nuamlo omlo, a melhoih nuamlo omlo, a lian nuamlo omlo hi. A nunung, a nuainung, a miphalo cih ding kuamah ki ut masalo hi. Tua manin kikalsuan ciat a, kihanciam ciat hi. Ahi zongin a tawp kitung khinlo a, i tup kitung khinlo hi. Pawlkhat ama utloh man hi a, pawlkhat cidamna leh hihtheihna in banlo hithei hi. Pawlkhat midang hang leh vai tuamtuam hang hithei a, pawlkhat a piang thei ding himah leh amah utlo cih bang zong om hi. Thu tuamtuam tawh i ensuk ding hi.

1. Hunlap in. Hun kikhelkhel ahih manin a hun zuiin nang zong kikhel siam in. Nasep zong na hih leh mite deih ding nam siamna leh theihna nei in. Kisinkhol inla, hahkat mahmah in. A siam pen na hi keizongin ‘siam’ in. Siam dingin zong kisin ngap in. Na siamnop lamsang a thei, a siamte lawm bawl inla, kikholhpih, kimuhpih, kitheihpih in. Mailam ah na kisap ding hun na thei kei hi.

2. Mi hong panpih bangin nang zong midang panpih in. Nang metna ding bek ngaihsun pak in midang nawlkhin kei in. Na maiet kik ding baihlo thei hi. Na kisap kik ding leh kisapkik loh ding na thei kei hi. Tua manin nanga dinga phatuam mi khat pen nang zong ama adingin a phatuam hihsawm in. Kihuhtuahna, kithapiaktuahna cihte in kilawmtatna leh kideihsakna piangsak hi. Kimuanna cihte nangawn in hong zui thei lai hi (muan theih dingin na om leh). Tua bek hilo haksatna tuak lecin hong huh ding, hong lamlak lai ding hi.

3. Mite deihsak theih dingin om in. Mite deihsakna na tan ciangin nang hoihna hilo a, nang hong deihsakte hoihna ahi hi. Mi khat in deihsakna tawh midang kiangah hong kimuhsak, meltheihna, kizopna hong bawlsak ciangin nang hoihna leh siamna hinawnlo in hong vaihawmsakte hoihna bek ki en hi. Tuapa in hong kizomsak ahih leh tuapa bangin nang zong kizoppihtaak cihna hong thei uh hi. Tua bang ciangin mite deihsak theih dingin om inla, nang zong na siamna tawp tawh thusiam, pilvang, gamtat siam in. Hopih nuam inla, nasep hahkat in, thanuam mahmah in. Hong kimuanna muan bangin om in.

4. Kamtam lua kei in. Gen ding na theih kei leh zong paulo in omzaw maiin la, kampauna pong in cih tawh thu nengkai khat peuh gen se dah mai in. Midang thu na gen khak leh bang kizel baih diak ahih manin na kisikna in van baan ding hi. Paulo a om hithiatna pen gamtat hoih hizaw hi.

5. Muan bang hi in. Mi hong muan bangin om inla, muan bangin hi in. Na innkuanpihte hong muan mah bangin na seppih, na kholhpihte in zong hong muang thei leh hoihpen hi. Pawlkhat in hong muang, pawlkhat in hong muang khollo cih pen muantak taktaklo cihna hi. Mi hong muanmawhna om hi in na theih leh amau kiangah gen in kuppih in.

6. Na hihkhialh leh zong kei khialh hi ci ngam in. Nangma sep khat pen kei sep hikei, kei hih hikei ciin peng sawm kei in. A hoih ciang ‘kei hi’ a hoihloh ciang ‘kei hilo’ cih bang lungsim leh gamtat na zat leh mite hong muhdan kidangpah ding hi. Nang hih peuhmah nang hih ahih lam a mawh pua ngam in. Mawhsakna na thuak phial leh zong kisikna ding omlo hi. Midang mawhpih ding zong tawm sese ken. Na khialh leh zong ‘khial ing’ ci ngam in.

7. Na gen bangin gamta in. Thanuam mahmah a kigen napi nasep muh ding om ngeilo. Sum hau mahmah a kigen napi sum neih lam lah kithei ngeilo. Midang khual mahmah a kigen napi mite huh in panpih ngeilo cih bang hikei in. Na kigen bangin gamta in. Na kampau leh na nasep kituak hen.

Mite hong muhdan pen nang hihna hilo hi. Mite in nang pen a thadah mahmah in hong mu thei hi, tua pen amau muhna leh amau ngaihsutna hi. Ahi zongin nang pen a thanuam mahmah na hi thei gige hi. Tua manin mite hong muhna thupi khollo a, nang hihna mah thupi zaw hi. Mite muh ah thupi mahmah in nang lah bangmah hilo cih zong kikhemna, zuau ahih manin a mawkna ahi hi. Mite muhna ah bangmah na hikei zongin nang sungah, na lungsim ah, na nasep ah kimuanna, kuhkalna na neih nak leh nang pen mi gina khat na hi hi. Mi’n bel amau ngaihsutna a neih theih mah uh hi. Ahi zongin ei tawh kisai kilkello hi. Hau Za Cin (Phuitong Liim)