Dektak aw ei ~ Lian Tuang
Khat veivei ka om muanin biakinn sunga I thungetziate ka lungngai theizel hi. I thungetzia pawlkhat siksan in I mitkha ah Pasian bangci muh I hi hiam cih kikum dihni.
Akpi tawh kibang
Akpi in aknote kisukhaleh patau leh hehlua kisa delh in tu gawp daidai hi. Ei zong thu I nget ciangin I thangpaihna khasiatnate Pasian in akpi bangin a na thukkikgawp dingin lunggulhna kinei mawk hi. Pasian in ei ong huaina hangin midangte vatgawp leh a ut pawlkhat ki om mai hi.
Pasian in eite ong it in ong angvan mahmah takpi hi. Ahi zongin eite ong it mah bangin midangte zong it mahmah ding ahihna kiphawklo thei zel hileh kilawm ka sa hi.
Inn nasem
Thungetnate ngaingai leng I kisapna teng a ban takin ong sep sak dingin Pasian a sawlsawl peuh kihi zaw hi. Nupi thadah ngelte in a tutna panin inn nasemte nasep a bansawl bangin mit sisa in deihna teng a sem dingin Pasian kisawl ziahziah hi. Khat veivei sawlna bek hi loin thupiakna zong kihel lai hi.
Mihingte vaihawmna sungah Pasian om hi zaw loin Pasian vaihawmna sungah mihingte om kihizaw ahihna kiphawk khalo zel hileh kilawm ka sa hi.
Dahpa khuang
Deih bangbang ngah theihna phualpi bangin kingaihsun tawh kibang hi. Tangthu sunga Dahpa khuang kigen bangin duh teng deih teng apiang sak atangtung sak ding bangin kingaihsun tawh kibang hi.
Duh teng deih teng apiang sak thei leh ong pia thei Pa hi mah hi. Ahi zongin eite duh le deihna teng bek hilo eite nuntakna le kisapna khempeuh a thei Pa le eite ong kem ong nei Pa ahih lam kiphawk khalo zel hileh kilawm ka sa hi.
Aituam neihna
Pasian in midangte sangin eimah a kipan i minam mahmah le kipawlnate midangdang kipawlna dangdangte sangin ong thupi ngaihsutzaw deuh in ong angvan zawdeuh ding khawngin lunggulhna kineileh kilawm ka sa hi.
Pasian le eima kikal ah aituam thu a om mah bangin midangdangte tawh zong thuk takin na kizon veve ding hi. Bang hang hiam cihleh amah pen leitung bup ni kha aksi singkung lopa piansak nate khempeuhte Pasian zong ahi hi.
Hih pen tu laitaka kei mimal ngaitsutna hi lel ei guai. (Mi khempeuh hi loin mi pawlkhat bek mah hi zaw) (29, 7,2018) Lian Tuang
Comment piaknop aomleh...