Hun khat lai-in a zawng mahmah Scottish lokho mi Fleming kici khat om hi. Ni khat, a lo nawl a gamlak ah naupang khat huhna ngen bang khatin a awng zakzak khat hong za hi. Fleming in a lokhawh maban nusia in, tua awging lam zuanin a va delh pah leh naupang no khat buannawi lakah na awkin, na tumsuk litlit mawk hi. Hamsapi mahin tua naupangno sihna ding panin lokhopa in hong hon khia hi.
A zingciangin, sakol leeng hoih khat Scottish lokhopa’ buk ngei ah hong khawl hi. Leeng sung panin puan hoih tak a silh zitzet a hauh mel papi khat hong tuak khia in, “zan ni a sihna ding panin na hotkhiat naupangno ii Pa hing” ci-in hong kigen pah hi. “Lungdam hong thuk nuam ka hih manin, bang deih na hi hiam?” ci-in mihaupa in lokhopa hopih hi.
Fleming in zong, “phamawh peuhmah kei ee! Ken thaman piak ding ka ut manin na tapa a honkhia hi laizang lo hing” ci-in nawlh hi. Tua laitakin lokhopa tapa buk sung panin hong puasuak khia hi. Mihaupa in zong “hih na tapa ahia?” a cih leh Fleming in “himah hi” ci-in kipaktakin hong dawng hi.
“Hoih lian ei, tua leh lungdam kong thukna dingin, na tapa pilna hoih takin a sin theihna dingin hong vaihawmpih ding hing, ni khat ni teh nang a Pa kipakna tapa pil a suah dong hong kep sak ding hing” a cih leh Fleming in zong a tapa ading a deih sak luat manin hong thukim pah hi.
Hunte hong paipai-in, lokho Fleming tapa zong pilna hong hanciam ahih manin, London a om St. Mary Hospital Medical School panin, Siahuan sin hong zo hi. A mah pen leitung buppi theih dong a minthang Sir Alexander Fleming kici, Penicillin zatui hong mukhia masa pa hong suak hi. Tua zawh kum a sawt lo-in, a mah pilna a sin sak mihaupa’ tapa in pneumonia natna ngah ahih manin hong si dektak hi. Ahi zongin Sir Alexander Fleming in a muhkhiat penicillin zatui zangin a Pu tapa hong dam sakkik hi.
Tua mihaupa min pen Lord Randolph Churchill hi-in, penicillin zatui tawh hong damkik a tapa ahih leh 1940-1945 le 1951-1955 te ah Prime Minister semin British gam a makaih Sir Winston Churchill ahi hi. Amaute khat le khat a kihuh diamdiam a etteh huai mahmah lawm hoihte ahi uh hi. “Ciimnuai a sa kibak, geltui ah kithuk”
Khat Thang
Comment piaknop aomleh...