Covid-19 Update XX: White House Press Briefing pan atheih huai thu pawlkhat leh tulai tak US sung thu tuamtuam te – (June 18, 2020)
1) US COVID-19 cases update (June 17) – “Stay-at-home order” aki lakkhiat zawh leh nasep te hon kik zawh aa kipan mun tampi ah COVID-19 natna nei khang tek tek aa, zani ciang dong state 21 te ah natna ngah thak khang mahmah hi ci uh hi. Ahi zong in COVID-19 natna asang pen state te ahi New York leh New Jersey te ah natna ngah thak leh asi kiam mahmah hi ci aa, states 21 ah natna akiam lam mah nawh hi ci uh hi. States 8 te ah COVID-19 natna ngah pongman (steady) hi ci uh hi. State teng lak pan Texas, Florida leh California, Arizona, leh North Carolina te ah natna ngah thak sang pen (tam pen) hi ci uh hi.
2) White House coronavirus task force sung pan “Doctors’ group” akici siavuan (doctor) teng kimuhkhopna nei uh aa, tua lak ah mi minthang teng ahi Dr. Deborah Birx, Dr. Anthony Fauci, Dr. Stephen Hahn and Dr. Robert Redfield cih te leh Vice – President Mike Pence zong kihel hi. Hih White House coronavirus task force “Doctors’ group” te pen nipi khat nih vei ahih kei leh thum vei bang kimu den uh hi ci hi. Tu lai tak US gam state tampi ah COVID-19 new cases khang mahmah ahih man in tua vai kikupna nei uh hi.
3) US Food and Drug Administration (FDA) in hydroxychloroquine zatui pen emergency aa zat theihna (emergency use authorization) pan la khia ta uh cih taangko khia uh hi. FDA director pan belh inn ah a zang nuam ten zang thei lai aa, doctor ten zong ci na te tung prescription pia thei lai ci hi. Tulai tak in Remdesivir zatui pen emergency aa zat dingin akikoih zatui hi lai hi.
4) Second round of coronavirus stimulus checks update:
US senate in nipi nih (July 3-17) sung zum khak (recess) dinguh aa, tua zawh ciang new coronavirus relief package ding kikupna nei pan dinguh hi ci hi. Tua sungah mipi ngah anih veina mipi huhna sum (second round coronavirus stimulus checks) zong kihel thei dingin kilamen hi. Abeisa in Senate Majority Leader Mitch McConnell in July kha sung kikupna kipat kik ding genkhia hi.
5) President Trump in zani (June 16) ni in “Executive order on safe policing for safe communities” a kici executive order khat letmat thu hi. Tua tawh kizui in Palik te leh Palik zum te kipuahphat kikna (police reform) kibawl ding ahi hi. Nung kha sung in mivom khat palik te khat in amatna pen si suak aa, gam sung mun tuamtuam ah lungphona leh buaina aom zawh ciang hih executive order hong piang khia ahi hi. Tua mivom pa pen $20 atuh khat tawh palik ten amat hi aa, abeisa hun te ah zong criminal records tampi zong nei kici hi.
6) New York in Phase Two reopening kipan ta aa, mi 25 ciang kikhopna kibawl thei ta ding cih New York Gov. Andrew Cuomo in taangko khia hi. Zani (June 17) ni in New York state ah natna ngah thak akiam pen ni pawl hi aa, zato lum leh asi zong akiam pen ni ahibhi. COVID-19 hang aa asi mi 48 bek om ta hi ci hi. Asawt loin zong Zato te ah cina veh (visitor) te kiphal ta ding ci hi.
7) US gam sung aaom Airlines khempeuh in maituam (mask) thuah lo te vangleng tung kah sak nawnlo uh hi. Maituam athuah nuamlo te zong tuang sak nawnlo uh ci uh hi. Tua ahih manin vanleng tawh khualzin ding ten kigin huai mahmah hi.
8 ) COVID-19 natna ngah thak (new cases) khang kik ahih manin Texas state sungaa om Austin khuapi in “Stay-at-home order” taangko kik aa, August 15 dong khan to cih Austin Mayor Steve Adler in tweeter pan genkhia hi.
9) West Virginia state aaom Graystone Baptist Church ah akikhawm teng COVID-19 natna kilawh mang uh aa, tu ciang ciang mi 28 in natna nei (positive) uh in adang tampi zong kilawh thei lai ding uh hi ci hi. National Guard galkap ten tua biakinn pen lungno za kap gawp uh ci hi.
10) World Health Organization (WHO) in tu ciang ciang USA gam pen WHO ii member khat hi lai hi ci in genkhia uh hi. President Trump in belh May kha sung WHO pan pai khiat ding genkhia hi. USA in WHO ah kum khat sung $400 million bang huhna pia den aa, ahi zongin China in kum khat $44 million bek pia hi ci hi.
11) Leitung gambup ah Tennis kimawlna ah aminthang mahmah pawipi khat ahi US Open Tennis Championship pen August 31 pan September 13 ni dong Queens, New York ah kimawl ding cih New York Gov. Andrew Cuomo in taangko khia hi. Ahi zongin a en mipi te om lo in kidem ding uh aa, kidemna khempeuh TV pan bek ki en thei ding hi ci hi.
12) COVID-19 kilawh dan athak khat mukhia uh:
Mipil scientists te in COVID-19 natna pen ekbuk pan kilawh thei cih athak in mukhia uh hi. Computer modeling zang in thu sinna (study) abawl uh hi aa, ekthak zawh akizang tui te pan virus kilawh thei cih mukhia uh aa, Coronavirus pen mihing te ii zun leh ek sungah zong mukhia uh hi. Tua hi aa, mi tam kikhopna mun khawngah ekbuk I pai ciang kidawp huai mahmah hi.
13) Coronavirus vaccine update:
Tulai tak akisam mahmah Coronavirus vaccine bawl khiat zawh nang leitungbup pan company tampi hanciam uh aa, US kumpi in company tampi lak pan 7 telkhia in sum leh pai tawh panpih uh hi. Tua company te pen US kumpi ii Agency te ahi US Department of Health and Human service leh National Institutes of Health (NIH) te tawh kithuah ding uh hi. Tua company te lak pan US kumpi in Johnson & Johnson’s company pen $456 million tawh panpih uh aa, Moderna company pen $ 483 million tawh pahpih uh hi. UK company minthang khat ahi University of Oxford tawh asem khawm AstraZeneca’s company pen US Kumpi in dollar billion khat (1 billion) tawh panpih uh aa, October kha sung in vaccine 300 million doses val bang US te aading bawlkhiat sak ding thukimna nei uh hi.
14) COVID-19 zatui khak khat kimu khia:
Steroid Dexamethasone akici zatui thak khat in COVID-19 natna ngah mi 8 pan sung pan mikhat in noptuam na ngah hi cih Oxford University pan thu nei te in UK kumpi thu kizasakna ah taangko khia uh hi. Tua zatui pen $50 bek man aa man awl mahmah hi ci uh hi. Hih zatui pen World Health Organization (WHO) in zong ahoih lam taangko khia uh aa, COVID-19 natna a nasia te tung bek ah kizang pan hi ci hi. Abeisa in zong tua tawh akibang Gilead company te thoh Remdesivir zatui kimukhia in tudong ciang tua zatui zong kizang to to hi. Tu ciang ciang COVID-19 natna dam sakna (cure) zatui kimu nailo ahih manin mi khempeuh in Coronavirus vaccine bawlkhiat zawh nang kilunggulh tek ahi hi. UK Health Secretary Matt Hancock in hih zatui pen damsiang sak (cure) na zatui hi lo aa, natna a nasia te noptuam sak na bek hi ci in genkhia pha pha hi.
15) Zomi tampi tenna Oklahoma state ah COVID-19 natna ngah thak nipi khat sung 3% bang khang hi cih Oklahoma department of health in tangko khia aa, zani (Tuesday) ni in natna ngah thak 259 kibehlap hi ci hi. President Trump in asawt lo in Tulsa khuapi ah pai in campaign rally bawl ding aa, tua lai ah akah ding in mi 1 million in min pia khin uh hi cih Oklahoma Gov. Kevin Stitt in genkhia hi. Tulsa health department director Dr. Bruce Dart in belh mipi kikhop vaihawm na pen lahuai mahmah aa, apai khempeuh in maituam thuah hamtang ding genkhai hi. Mipil tampi leh advisors te mahmah in hi dan aa, mipi kikhop bawl nai loh ding President Trump tung advice pia uh hi. Pawl khat in tua mihon kikhopna (campaign rally) pen khawl nadingin Court ah thu bawl uh aa, ahi zongin Judge te thu kimlo uh ahih manin athu zo lo uh hi ci hi.
More: USA, Maryland State sung Covid-19 hangin akikhakteng honkikzia
16) Johns Hopkins University & Medicines te report na tungtawn in tu ni June 17, 2020 ciang dong Leitung ah Covid-19 natna ngah mi 8,329,221 (8.3 million) pha ta in asi mi 448,474 pha ta hi. US gam ah natna ngah mi 2,162,851(2.1 million) leh asi mi 117,713 pha ta hi. Kawlgam ah natna ngah mi 262 pha ta in asi mi 6 om ta hi. US om ei Zomi te sungah zong Covid-19 anei tampi kibehlap toto ta ahih manin i om na ciat ah i kidawp ciat ding leh I innkuanpih te hoih tak I kepcing ciat nang thupi mahmah ding hi. Thomas On Sian Mung (Thomas Mung Guite) Washington D.C June 18, 2020
Comment piaknop aomleh...