Leitung a kipei kawm a leng tautau, Zomite zong leitung tawh lengkhawm ni

Leitung a kipei kawm a leng tautau, Zomite zong leitung tawh lengkhawm ni

Leitung kipei a, lei maitang pen naikhat 1,668 km a hat in kipei hi. Tuabang a a kipei kawm mah in ni kimkot ah leng tautau a, nai khat Km 107,300 a hat a leng ahi hi.

Tuabang a leitung kipei, ni kimkot ah a len’ laitak, Ni zong ana khawl deda hi tuanlo in, a na leng tautau veve mah hi a, nai khat tai bangzah hat a leng cih kiteh theilo hi.

E’n i muh ni tawh kibang, ni vive tampi om a, tuate zong a leng ngeingai mah ahi hi.

Ni bekbek sim zawhloh a a om, lomkhat ciang glaxy kici tampi om in leng ngeingai hi. Tuaci bang glaxy bekbek tampi tak sim zawhloh ding a om lom tampi omlai a, milky way kici bek mawk in tuate zong a leng vive mah ahi hi.

Tua ahihman in tulian laitak a i omna mun cikmah ciang ki-tungkik ngeilo ding ahi hi. Leitung pen mun khat a kikhai lingleng a a kivei lengleng, i omna sa a ki-tungkik zel cihbang hilo hi.

Leitung kipei hi. I omna kikhel hi. Hun kikhel a, nakhempeuh kikhel hi. Mihing ngaihsutna zong kikhel a, nuntak zia zong kikhel hi.

I mimal ciat ahi a, i Minambup ahi zong in i omna, a mun leh a hun zui a i nuntak theih ding thupi hi. Ei’ i khawl leh leitung phakkik ding bel lam-et om nawnlo hi. Ong ngaklo ding a, ong kileh kik nawnlo ding hi. Zomite in Khuahun theitel in Leitung tawh lengkhawm ni.

2019 ciang a phunciak om nawnlo ding

A sawtlo a ong tung ding February 20, 2019 ciang “Zomi Nam Ni” pawipi pen ….

– tu masiah a pawi kibawl sim a amau makai leh vaihawm ning a cingei peuhmah lo, min deih leh metdok nuam bek a apang den,

– mi’ bawldan amau’ deihdan hilo a, a mau a lungkimsak ahihloh man ahi zong in,

– amau a-met a dawhtheih lohman leh mi’ sepsa tung ah tuang a angsung deihna tawh a kituahloh man,

– amau kihel sawm vetlo zawzen a mite’ sep le bawl tung ah mawhna leh khialhna ding a leizon’ den,

A phunciak denkeei mimal, kipawlna leh party teng pangkhawm in ong vaihawm, ong makaih ding uh ahihman in a kua-mapeuh in mit phelo in en gige a, bil tung letlat a i ngaih ding hiding hi.

Tua mahbang in Zo ngeina Sialsawm leh Khuado pawipite zong ong vaihawm suak ding uh hi.

2019 ciang Zomite kuamah phunciak nawnlo ding a nuam mahmah ta ding hi. Hungaih ciat ni.

A beisa mahbang in bangmah vaihawmna ong om tuankei leh mipi in leiphen, cilphih a zahko huan ding ong hiding hi. Amau’ deihbang leh minambup huaizo ding, a hoih pen a ong vaihawm, ong makaih ding un lam-en photphot ni. Pau Khat Suan