Zomiten Copyright protection zahtak tek ni: Atheih huai US copyright act
Thu patna: Pasian in hong laamsang in ei Zomi te sungpan Sia Do Khup in “Sianmang’ hawmtel” acih Zomi movie hoih mahmah leh professional, standard nei mahmah khat hong bawlkhia, hong hawmkhia thei ahih manin kiangtang mahmah hi. Sia Do Khup in ahawmkhiat khit lian in online pan ahi zongin kam tawh ahi zongin original lei sak tek ding leh online, youtube leh facebook tungah khahkhiat loh ding thumna leh zaksakna hong nei khin aa, (Siapa in copyright bawl nai ta se kei leh) akuamapeuh in zong Siapa i zahtakna leh Paisian i zahtakna in i khahkhiat khak loh ding hong thupi mahmah ding hi.
Siapa in thumna hong nei kawmkal ah pawlkhat te in facebook tung leh youtube tungah “full movie” or “part movie” in hong khah khia tei tei cih i muh ciang dah huai mahmah aa, tua tawh kizawitawn in US te thukham zong i theih kul in um ing.
US copyright act & sentences:
US gam ah 1976 pan kipan “Copyright act” (copyright protection law) cih hong bawlkhia uh aa, tualai ah Music, picture, movie (motion picture) te anei, abawl te theihloh aa copy theihloh ding leh hawmkhiat theih loh nang thukhun (law) hong bawl uh hi. Abawl pa, anei pa ii phalna neilo pi aa i khahkhiat, hawmkhiat leh hong kiman in thu hong kibawl thei dingaa, kum 5-10 sung thong kikia thei in sum tampi zong hong kiliau sak thei hi cih theih huai mahmah hi. Tua US copyright protection law tawh akibang law pen adang gam ten zong nei ta uh hi.
Copyright Registration bawl ding dan:
US kumpi in United States Copyright office cih nei uh aa, tualai ah registration kibawl thei hi. Online pan Copyright registration pen www.copyright.gov ah kibawl thei a, registration certificate ngah nang ahun pen kha 1-6 sawt thei hi. Mail tawh zong kipuak thei aa, Washington DC zum ah zong pai in kisiau thei hi.
Intellectual property & US Patents protection:
Tua bek thamlo in “intellectual property protection” acih zong kinei aa tua pen patent invention protection law (ထီထွင်မှု ကာကွယ်ရေး ဥပဒေ) zong kici in van khat peuh peuh abawl masa pen te aading protection akibawl sak ahi hi. Tu laitak ka nasepna US Federal kumpi ii Department of Commerce nuai aa department khat ahi United States Patent and Trademark office pan zong Engineers te in tua patent protection kibawl sak aa, tua in US economy zong tampi control in khangto sak zo hi.
Thu khupna:
Tua hi aa, Zomiten zong copyright protection zahtak tek in mi bawlsa te i copy khak loh ding, i hawmkhiat loh ding thupi mahmah ding hi. Tu aa Sia Do Khup hong hawmkhiat Zomi movie zong online ah akhahkhia te in zong amanlang in lakhia kik in original DVD mah tha i piak tek ding itna tawh kong thum hi. Zomite khat leh khat kizahtak in tha piak dan i siam tek nang Pasian in hong siam ta hen. Thomas On Sian Mung (Washington DC, January 30, 2020)
Comment piaknop aomleh...