A natna mu khial (Wrong diagnosis) ~ Evan. Suangh Dal

A natna mu khial (Wrong diagnosis) ~ Evan. Suangh Dal

1. Music sangin Pasian’ Kammal mah – Pawlpi sungah khangnote a lawp nading ci-in a lawp sak lo i cihte pan a lawp sak dinga i up music le gamlumna cih zawdeuhte tawh i kipattah pen natna mu khial ihi hi. Khangnote a lawp sak lo i cihte lakah a Lian khatna in bang hiam cih leh Pasian’ Kammal tawh thu hilhna bekbek kining ta cih thu ahi hi.

A taktakin ci lehang Pasian’ Kammal tawh kithu hilhna i cih pen Lai Siangtho sinna (Bible Study), Naupang Sunday School, Ulian Sunday School, Nipi Ni sermon phatak-a hilhna cihte ding ahi hi. Pawlpi in Bible Study khawng hoih takin hong geel zo hileh, thu tawh hoih tak kimakaih zo hi lehang mi kim in Pasian’ thu theology i theih nadingin Lai Siangtho sang a kahkah mah a bang ding ahi hi.

Tu-in pawlpite mihing kilaitat programe teng tawh a ngei-na danin kikhawm zel bekin, Pasian’ Kammal ii tawsawn zawhna tawh biakinn lunggulh khangno hong kiam semsem hi. Tua bangin hong kiam semsem ciangin a natna pen Pasian’ kammal phatakin kipantah zo nai lo hi ei cih lamah mu loin music le gamlumna om leh i khangnote hong lawp ding hi ei cih lamin kimu zaw thong ta ahih manin music buai-in buai uh-a a taktak ciangin Pasian lunggulh hi loin music lunggulh hong suak zawta uh hi. A natna mu khial. Wrong diagnosis.

✓Khangnote maan takin kikhop ding a lawpsak le Christian nuntakna maan ah a na tawsawn pen music sangin Pasian’ Kammal phatak-a kihilhna mah hizaw hi.

2. A kitaan theih lohna thu phataka hilh ding mah hizaw

Gupna pen mihing’ hanciam zawhna le thalawh zawhna tawh kingah hi loin upna bek tawh kingah ahi hi cih pen Christian khempeuh in a up thu ahi hi. Hih thu pen Limsangte bangin nidangin upna vilvel hang bekbek cih na bulphuh mahmah ngei uh ahih manin “Upna bek, hehpihna bek” cih thu khawng pen Protestant khempeuh ii upna kisa nawn loin Limsang lamte upna bek peuh kisa hi. Piangthak takpi khit teh zong gupna kitaan kik nawn lo hi cih thu bang pen ei Protestant khempeuh ii tumdanna pi khat ahih gige lam kihilh ngei peuhmah lo ihih manin Limsang lamte bek ii a’ peuh kisa liang hi.

Tuhun teh lawm AG te in zong Gupna pen “Kitan Lo thei” hong cih kik se-na uh pen “kitaan thei lo” a kicihteh kipai khial lua ci-in gen uh kici hi. Hih pen a natna mu khial cihna hizaw uh hi. Wrong diagnosis. A taktak in paikhialhna pen gupna a kitan theih lohna phatak-a a kihilhcian theih loh man uh hizaw hi. A langkhat leuleu ah “Gupna kitan thei” cih thu in natna damsak cih malak-ah a lauhuaizaw thupomzia ahi gamtatna tawh gup ngah kisakna (Old Judaism le worked/earned righteousness) ah tun kik thei zawkan lai hi.

Limsangte sunga paikhialhna pen “gupna kitan thei lo” a kicih hang uh sangin, thusuakna, kamsanna, maangmuhna, kha ii sawlna, kha sunga kibualna ahi nuihna, lamna, tawnna, dianna, pukna, sawlna ngah, kha kingaihna cihte leh prosperity gospel kici piakkhiatna, lawhcinna, hauzo damzo cih lam bekbek tawh a kipattah hang uh hizaw hi. Hih pen Limsang sung bekah hi nawn loin Pawlpi tuamtuam hong lawh natna pi khat hi ta cih ka muhna ahi hi. I natna pen “gupna kitaan kik lo” pan “kitan lo thei” tawh a thulu i laih manin hong dam ding hi lo-a, a kitan theih lohna thu phataka hilh ding hi sem zaw hi.

Gupna kitan thei lo cih thulu nuai ah om napi-in a kitaan theih lohna thu hilhcian thei tuan kei lehang sazuk kii puak a bang kihi ding hi. Paikhialhna le ut banga gamtatna a piang sak pen “Piangthak takpi khin mi khat in Gupna kitan kik thei lo hi” a kicih man hi loin a tunga ka gen thusuakna, kamsanna, maangmuhna cihte pawlpi sungah a hon (open) hang uh leh a kitan theih lohna thu kihilhcianna taktak a om sak theih loh hang uh hi zaw hi.

✓ Ut bangbang-a a kigamtat loh nading le a kipaikhialh loh nadingin “Gupna kitaan lo thei hi” ci-a a thulu laih suk laih toh tawh a natna hong dam ding hi lo-a, “Gupna kitan kik thei lo” ahihna mah phataka kihilhna in damsak vet bek ding hi. A Natna mu khial kei ni. Don’t diagnose the sickness wrongly. Evan. Suangh Dal