Penang ah Condo khat meikanggawp in asungah a awkcip mi 6 te ahunlap in ki honkhiathei
Malaysia, Penang State sung aom Condo (Condominium) khat meikang in asungah a awkcip mi 6 te ahunlap in ki honkhiathei cih NST pan kiza hi. Penang, Persiaran Gurney sungah tuni Saturday zingsanglam in meikang akipan ahihi.
The Bagan Jermal Fire and Rescue Department te genkhiatna ah zingsang 3:45am hunpawl in Condo khat meikang ci’n huhngetna Distress Call hongki zasak cihi. Asawtlo in Firefighters honkhat aphual ah ki delhsakpah hi ci’n thunei te’n genkhia hi.
Condominium ii inndawl 8 na aom Unit sungkhat ah mi 6 awkcip cih atheih uhciang in Firefighters te’n mei ahihtheihzah un phelh uh a, asungah a awkcip teng honkhiathei uhhi.
Inndawl 8 na ah a awkcip innkuan te lakah naupangzong 2 kihel in, adangte pen ulian 4 ahi uhhi.
Fire Department panin Operation Commander Hashim Ismail in agenkhiatna ah meikuang pen zingsang 5:40am hunin ki phelhsiang zopan hi ci’n genkhia hi.
Related: Penang ah Guardhouse khat meikang in naupang kum 8 khat meikanglum
Condominium pen limkat mahmah a, 90% bang meikangtum cimawk hi. Ahi zongin Condo sungah kuamah a awksuak omlo, asi aliam omlo cihi.
Meikat kipatkhiatna pen ki theician nailo ahih manin, Forensic Team te’n akancian laitak cih kiza hi. Sawltak #zomidaily
Comment piaknop aomleh...