Ihmut nuam ~ Lian Tuang

Ihmut nuam ~ Lian Tuang

2009 kum tukguah tam mahmah hun sunga ka tuakkha thu khat ahi hi. Ka nasepna mun Sawbua khua le Mawlaih khua kikal a Letsikan bual a cihna mun mual tungah kha khat sung keikia bek ka om hi.

Gammang tulak ahih banah lampi hamsa lua ahih manin lengla kuamah ong pai ngei khollo hi. Khangno khat ka hih mah bangin ka lung peuh leng ngaugau in ka nasep zong ka cimtak mahmah mai hi. “ Topa aw hih gammang tulak ah keikia bek banghang ong om sak peuhmah na hiam. Hih gamlak ah ka nitum pen ka nuntakna mahmah zong khiatna om sa kei mai ing”ci in khat veivei thu peuh ka gen zanzan hi.

Nitak khat ka zuminn mai ah Radio tawh la ngai kawm in ka tut hithiat leh Sawbua khua lam panin minih ong pai uh a, zum gei ong tun ciangin “ Tui ong dawn sak ve sia aw” ci in kawlpau tawh ong ngen hi. Numei khat le pasal khat hi a, a numei pen kum 30 gual le a pasal pen kum 20 gual ahi dingin ka mu hi.

Kei zong kelkong hong in ka zum huang sungah ka lut sak hi. Tui a dawn khit uh ciangin amau gel ong kihoho uh a, ”Mawlaih a pai ding hi ung. Aih hang gim lua mahmah ka hih manun tu zan hiah ong giak sak mai ve lam pai zo nawn mahmah kei ung” ci in a numei nu in huhna ong ngen hi.

Ka lungsim ah bel ka nuam giugiau lel hi. Pawl ngah ka kisa khinkhian hi. Amau gel a kiho ka ngaih phatphat leh zopau na hi mawk hi. Kei zong om theilo in no Zomi maw ka cih leh amau gel zong pau theilo liangin ong en lemlam uh hi. Anumei nu in “ Hi mah ung” ci in a aw ling deldel kawm khitui luang kawm sa in ong dawng kik hi. A pau zom zo loin ong kap phot zawzen hi.

Tawl khat khit ciangin a pau ong zom kik a “ Pasian in kei mahmah ahuh dingin nang hih lai ah ong koih hi in teh ka lung dam lua, Pasian mahmah hoih sa lua ing. Ko pen ka pasal Mawlaih ah thongkia ci aih cianga ka pano uh tawh a delh hi ung.

Nek theihlah bangmah pualo, meisah lah pualo, gilkial lua in lam nangawn pai zo nawn mahmah lo kaih ciang vua singphung khat peuh ah tawlnga in zingsang khauvak dong tucip mai ding I hia ci in ka kikupkup laitak un hih mun ong tung hi ung. Zum inn ka muh bek uh zong nuamlua kisa dai pualam ah guah a zuk hang om lel in khuavak ngak ni ci in a ngiahsun hi ung” cih ong gen hi.

Kei zong a nek ding uh bawlsak in ka ne sak pah a, nitak ciangin thucin thutang ka kiho uh hi. Amau zong nuam sa mahmah in ken zong khalum tuam ka kisa mahmah hi. Anumei nu in “ Pasian mahmah hoih sa lua ing” ci phapha hi.

Nitak ka lup ciangin ka lungsim tawngah “ Kei le kei lungleng in genthei mahmah ka kisak hang hih gammang tulakah ka na om manin mi khat le nih in Pasian tung lungdam koh lawh thei aihteh ka nasepna mannei mah e mawtaw” ci inka ngaihsun hi.

Tua ban ah kei hih lai ah ka om manin mawlaih le gunkhawm kikal khuamite in Telephone ( tua hun in cordless ) zang thei bek hi loin Khamphat pan Tamu dong ban ah India Myanma phoneline kizopna ah a mongneu khat pan, pangkha hi lo ka hiam ci in kei le kei tha kakipai hi.

Ka nasep thupi mahmah hi ci in ka ngaihsut khak ciangin ka lungsim nuam in ka thuaknate zong puaknop mahmah ka sa a, tua ni zan pen lungnuam takin ka ihmu hithiat hi. Lian Tuang