Christmas Message from Bishop Lian Khen

Christmas Message from Bishop Lian Khen ~ 2014

It leh Ngaih Zomi a kua mapeuh, Khua dam hiuhiau e, tung sun ni leh, tung sawl kha tawh et i cim theihlo i Zogam mualdawn/kuam te ah phuitong leh neisokte hong paak khawm silsel ta, i gam i lei hong et lawm sak, hong namtuisak e, lungdam lua hang, it leh ngaih lawm leh gual teng zong hong phawksah.

Jesu hong suak, gamsung gampua a om, lawm leh gual teng tawh hong lungdam khawm sak, hong ki-it sak, hong ki pawl khawm sak zel e.

Lei tung lungdam nang, ki-it kilem nang, leh ki pumkhat theih nang, Jesu hong pai a nuam lungdam pawi leh kumthak thuphate note khempeuh tungah hong tung kim ciat ta hen! Topa sungah itna leh phawkna lianpi tawh, Zogam Siampi (Siadaw Khen)

Happy Christmas & Happy New Year to you All!

Hih a nuai aa Bishop Felix Lian Khen hong lai at pen pilvai, ciimvai leh thumuh vai ka sa aa thupi kasa mahmah hi. A hang in, Zeisu hongsuah nilian a hih lohhang kumsim in Ei Tapidaw a kici te in Dec, 25 ni pen leitung bup in Zeisu hongsuah lungdam na lahna in a nuam theithei in pawi ih khaam aa, a nop thei pen in hun ih zang den hi. (Peace On Earth), (Joy To The World) cih la te ki sa ziahziah hi.

Ahizong in tu laitak netsung aa ki gelh lai tuamtuam te ih simkhak teh, adiak in Rev. & Dr. ki ci pawlkhat te lai at te ih simkhak teh BISHOP pa lai at leh BISHOP pa lungsim puak tawh VAN leh LEI in ki khai kasa mawk hi.

Hih bang in Lungdam bawl tunkuan leh lungdam bawl hunsung tengbeek netsung ah pawlpi vai, upna kibat loh na te, khat leh khat ki tel khialh na te, khat leh khat ki lungsim neih na te, khat leh khat ki lungsim nat sak na te suah khiaphot limlim in ZEISU SUAH LUNGDAM BAWl tawh lungdam khawmtek ni cih BISHOP pa hong laiat na tungtawn in ki mu thei hi.

A telsiam ding in Topa Khasiangtho in na lungsim tek uh hong lawng ta hen! Amen! “Vekpi Lungdambawl leh kumthak zatnuam” Sawmnang (Tulsa) USA