Mainawt ni ~ Dong Mung
1- Nang mimal nuntakna ah galdo na nei hiam? Na galte bangzah takin a thahat hiam? Bangzah takin thahat in a do hak phial zongin lungkia loin na do nakleh gualzawhna nithak hong suak pelmawh ding hi. Mainawt in.
2- Na innkuan ading galdona na nei kha hiam? Na do galte a thahat lua hiam? Bangzah takin thahat in a do hak phial zongin lungkia loin na do nakleh gualzawhna nithak hing suak pelmawh ding hi. Mainawt in.
3- Na khua le tui ading galdona na nei kha hiam? Na galte a thahat lua hiam? Bangzah takin thahat in a do hak phial zongin lungkia loin na do nakleh gualzawhna nithak hong suak pelmawh ding hi. Mainawt in.
4- Gam le minam ading galdona na nei kha hiam? Na do galte a thahat lua kha hiam? Bangzah takin thahat in a do hak phial zongin lungkia loin na do nakleh gualzawhna nithak hong suak pelmawh ding hi. Mainawt in.
Galdona khat peuhpeuh ah khua-ul luanna, sisan naisan luanna le nuntakna beilawhna om thei lua hi. Ahi zongin lungkia peuhmah ken; leitung ah gualzawhna a ngah mite nuntakna i et ciangin a lungkia theilote le a hanciam teitei hizaw hi.
Na nuntakna bup ading ahi zongin, na maban khempeuh ading ahi zongin, tulaitak na tuah thute galdona phualpi tawh kibang kha mah ding hi. Lungkia ken; tulaitak thuak hakin baih kei mah taleh khangsawn sawn donga kimang ding gal a do na hi hi. Tu-in na do zawh nakleh na khang tangthu hong kilamdang pelmawh ding hi.
Mihing hihang, baih hetkei mah; khitui luang, na kisa, i lungsim neu, lamet bei zong kisa, thazawm in lungneu kha mah ni. Ahi zongin hiteng i nawkzawh phot loh in, kipicing theilo kha ding hi. Sawtpi ading i do laitak in tu-a i thuaknate hangin lungneu kei ni. Thanem kei ni. Lungkia kei ni. Lamet bei kei ni.
Gualzawhna dial i sang khai ciangin tu-a i do i galte meikhup in tai ding uh hi. Gualzawhna dial i sang khai ciangin tu-a hong langpante i kiang hong ut ding hi. Gualzawhna dial i sang khai hun ciangin tu-a hong nawlkhinte i nai ah hong om nuam ding hi.
Gualzawhna dial i sang khai hun ciangin hong hemkhia, hong paaikhia nuamte ei panpih nuamin buai ta ding hi. Gualzawhna dial i sang khai hun ciangin ei adingin dahna khituite nuamna khitui, lungmanna khituite lungtaina khitui, lunglenna khituite lungdamna khitui, khasiatna khituite khamuanna khitui ah hong kihei ding hi.
Tua ahih manin Mainawt ni, Lungkia kei ni, Hanciam ni, Tawpsan kei ni, Lemet bei kei ni, Upna nei ni, Hangsan ni, Kalsuan ngam ni, Phu-ngam, thuak-ngam ni.
More: Kapzaw dingmaw, Nui zawding? ~ Dong Mung
Banghang Gualzawhna in ei hong ngak hi. Matutna in ei hong ngak hi. Lungtai maitaina in ei hong ngak hi. Lawhcin daupaina in ei hong ngak hi. Pumpi tawldam, Lungsim tawldamna in ei hong ngak hi. Lungkia loin i do nakleh gualzawhna nithak hong suak pelmawh ding hi. Mainawt ni, na khempeuh hong lemlel dinghi. Dong Mung
Comment piaknop aomleh...