Tu hun in ~ Pau Khan Kap

• Nidang lai-in Ankuang khat pen li leh nga in uumkhawm a,
  Tu hun in ahih leh Khat i nek dingin kuangli-kuangnga pha ta!

• Nidang lai-in Sasin-salung Pi leh Pu te’n ne in,
  Tu hun in ahih leh Pi leh Pu te sahguh biilbawk peuh kheuh sak!

• Nidang lai-in Monu-mopa tawh mopawi ki bawl a,
  Tu hun in ahih leh Monu bek tawh mopawi ki bawl ta!

• Nidang lai-in Teek’nu teekpa tawh ankuang uumkhop ding ki maizum a,
  Tu hun in ahih leh Monu’ khamval teng teek te’n ne thiamthiam ta!

• Nidang lai-in Mo te zingtho in anbeel suang a,
  Tu hun in ahih leh Teek te zingtho in anbeel suang uh!

• Nidang lai-in Khua khat pen Pawlpi khat bangin kal suan a,
  Tu hun in ahih leh Innkuan khat ah Pawlpi nih leh thum om ta!

• Nidang lai-in Pawlpi pen Sia te in makaih a,
  Tu hun in ahih leh Sumhau te’n Pawlpi leh Siate peuh makaih zaw sop!

• Ni dang lai-in Tangval te in zawl hel in nitak zawlleng a,
  Tu hun in ahih leh Nungak te peuh ahawh va kineih in zawlleng!

• Nidang lai-in Zi ding ci-in Numei ki la a,
  Tu hun in ahih leh Nu-pa ci-in numei leh numei, pasal leh pasal peuh hi!

• Nidang lai-in Zudawn thei te mihoih lo-in ki ngaihsun a,
  Tu hun ciangin Zubek a dawn te mihoih cih ding hi ta!

• Nidang lai-in Zudawn te Pawlpi panin ki hawlkhia a,
  Tu hun in ahih leh hawlkhia ding ci leng Biakinnpi bek om ding dan hih tuak!

Pau Khan Kap
April 2, 2011