Itna bucing (Margarete Gawtier) Part 7
Ka innsapna ka tun akipan ka puan angip a Margarette hong koihsak Camillie pak cikciang a vul tam cih bebek ka ngaihsutna ah om a, ka ihmut zong suak thei lo in zingsang nai 8 pawlah ka ihmusip thei pan hi.
Ka khanlawh ciangin baangtunga kikhai naipi ka et leh nitaklam nai 7 bek na sat pan hi. Ka lwmnu hong piak Camillie pak vul hun ding nai 5 sungin kisam lai! Sawt lai mah si e maw!! Hun beisakna peuh ciin khualak ka vak khia a, ansai ah an peuh ne in, lamlaka mivak peuh en in ka hun ka mawk beisak hi. Zan nai 10 hong sat petmah ciangin ciahkik in ka kizem a, nailang sung ka kizem khop hi.
Nai khat leh a lang sung om lai mah taleh om thei nawn mahmah lo ka hihmanin Margarette omna innlam zuan in sakawlleng ka saap phei hi. Ka pak vul nai lo, vul thei nai mahmah lo ahihmanin Margarette zawlnu inah ka hawh masa leuleu hi. Ka tun phetin kongpi ong hawn pah bilbel hi.
“Duval lah na hizen a…kua inah hawh sawm na? Zanni na vai uh na lawhcing hia?” “Lawhcing gawp cih ding hi. Tuzan kimu kik dingin a kigen hive ungh. Tulai tak amah a om na?”
“Nitaklam nai 9 pawlin a lawmpa’n sakawlleng tawh vakkhiat pih hiven, ong tung nai mawk tam aw?”
“Vakkhiat pih..hon tung nai mawk tam aw” hih kammalten ka sinso sak pah lian hi. Heh lua ka hihman in ka zudawn lai koih suk in ka dingto a, innsung tengah ka kilehsuk ka kilehto hi. Ka lungsim hong theipah hiding hiven Maragrette zawlnu in “ Zawzen teh, Margarette tawh na kitheih uh nikhat zong pha nai lo in tuabangin hazatna lakkheh pah malam ding maw.
Na ngaklah mahmah leh kan phei ve” hong cih ciangin lungdam zong ko manlo in ka pusuak kheh pah hi. Kongpi pan ka puapial madeuh in hibang hong ci sawnsawn lai hi..” na lawmnu baih lo ding ai maw Duval, omdan hekdan kampaudan na siam kei leh hong nuse ziau ding ahi maw, kidawm o!!”
Margarette omna inn ka tun teh lutpah lo in ka kileh kik hi. Kongpi a kimuh theihna ding khuazinna munah Margarette hong ciah ngak in ka ensim hi. Sakawlleng hong ging ta ngei! Margarette bek hong kum ding kasak leh tangval khat hong kumsuk masa in tua tangvalpa in Margarette pisuk in a khut a tawpsak khit teh kongpi dong kha in ciah kik hi.
Ka bukna munpan in keibel heh lua kisa akuang ding ka bang keei hi. Tawmvei ka ngaklai khit teh keizong ka lut pah hi. Margarette in hong muhciangin nuam lua kisa in hong pomcip a ka biang hong tawpsak pah hi. Ka heh kam thei nailo ahihmanin ka thukkik kei hi.
“Hehna, lungkim lohna nei maw Duval? Bang hangin nang zong hong tawp lo na hia?” “Heh keng e anuam lo bek hi’ng. No nopsak bangin keizong nuam takin om thei leng ut ing a..”
“Kong thugente mangngilh khin maw, na kiciamnate thei nawn lo maw…” “Hitak mah ei maw” ciin aheh lo kineih in tuazan nuam takin lupna tungah ka kino uh hi.
Tuaci bangin akha asim ka omkhawm uh a, kei guak bek om thei nawn lo kahih manin asim atham in Margarette’ lawmpate theih loh kalin nupa bangin ka om khawm uh hi. Ka kitot hun uh tam mahmah hi. It lua ka hihmanin hehlo ding ka cih hangin hithei mahmah lo hi. Ahizong tuate kei khelhna vive hizaw hi. Keipen mihau hilo ka hihmanin Margrette kisapna khempeuh ka pia zo kei a, ka piak theih sunsun zong hong sang nuam lo lai hi.
Kei lampa’n itna lobuang bangmah hong kal vet lo hi. Ka nawngkaisak hun tam mahmah taleh hongmaisak a, lungduai takin hong thuak kenkan den hi. Ka ki itna uh ani ani in khang semsem a, lathu in “ Nikhat melmuh loh kum kivei bang e” ana cihmah bangin minute khat sung zong kikhen ding leh omtuam ding haksa kasa tuak mahmah uh hi. Ahizong tuabanga ko ki itna in Margarette summuhna nak kiamsak mawk hi.
Ama ka khual manin it pipi mahin “Kikhen mai ni” ka ci thei zel a ahizong amah ut ngei lo bek hilo heh lua pahpah hi. Tuabang mahin kei tangval bangmah thei nai lo khat leh amah numei kizuak khat ki it kingai cih pen na ong sakpi mahmah a, ka minsiat ding leh ka mailam ding hong khual luatmanin Margarette in zong kikhen ding hong genpih thei zel a keilam pan zong kikhen ding pen ka ngaihsun zo kei hi. Kikhen ding cih thadah lungsim leh pumpi ka kinai semsem zaw uh hi.
Khatvei Margarette zawlnu in hong vakpih in hibang thu hong gen hi. “Mr. Duval, kong thugen hoih tak na ngaihsak in maw. Nang leh Margarette na ki itna uh hangin Margarette nuntakna ah haksatna tampi om hi. Nidangin na lawmnu pen Paris khuapi sunga mihau minthang sagih in khawi huan uh a, tualai in sumlehpai lamah lungkham ngei lo hi. Tun ahileh nang hangin 4 bek in thangah zolai bek uh hi.
A dangten nusia khin uh hi. Tua mihaute dingin kibulh lecin nang zong na lawmnu, sumlehpai tawh na leisa khat midang tawh asima thamin na omkhawmden leh na lung akim diam? Nang hangin Margarette pen sumlehpai tawh lungkham in nitum ta hi. Hibanga mi neihsa khat gusim a kisuanna khat zong nei lo a aneih alam tenguh na neksak pen mihing ngeina hi lo hi. Margarette it takpi na hileh ama nopsakna ding na khualsak kul hi.
Na itna na kilatsak nop leh azekai taktak ma in, nang hangin Margarette khutdangen a suak ma in khen in. Tumahmah in khen in.Kong sanggam thuhilh hi Mr. Duval, hibang ki itna tawh nuamsa theiden ding na kisak uleh na siatna ding uh hizaw hi. HIh pen ki itna na sak uleh ki itna hi lo in hai luatna namkhat hi zaw hi” hong ci hi.
Hihnu hong thugen pen ka ngaihsut ciangin hi ka sa mahmah hi. Ahizong man ka sawm hial kei hi.
“Tualeh Margarette in kha khat in sum bangzah bei a hiam?”
“Hai lua kisa a silum lo deuh bek hiciai Mr.Duval. na sum napai tawh Margarette vak na sawm nini na kikhen ni uh hiding hi. Margarette in nang neihsa piakhat zong deih lo hi. Na itna bek hi a deih. A zenzen in Margarette in khakhat sunga asum zat zah pen kumkhat sunga na thalawh zah sangin tam zaw pekpek ding hi. Na khakhat sum in Margarette sakawl leh a leng zong puah in vak zo lo ding hi.
Anek a dawn, a khuasung vakna, a niklepuan leina, zansial a Zohshin etna man, kalkhat nihvei Party a bawldenna sumbei leh khualum khuavawt tawh kizuia gamtuam tuam a zin kawikawina sumbei teng gen vet loh hilai hi. Margarette pen mimaimai na sak leh ama sumzat zah in hih Paris khuapi sungah sum azang mi tam lo ding hi…”
“Tuabang hizen maw..nong gengen teh Margarette ka itna khang semsem, Margarette ka paktatna lian semsem. Amah zah a Itna picing anei hih Paris khuasungah numei om lo ding hi cingam ingh.” Hih ka dawnkikna in zawlnu lungkia sak mahmah ahitam thu hong kuppih nawn lo hi. Innlam tuak zuan in ka kikhen pah uh hi. Hihnu zaha Margarette khuasakzia a thei kuamah om lo hi. Bang hang hiam cileh Margarette leh hihnu pen kei ka omkei nak leh asun zanin a kithuah den uh hi….. (Bei nai lo) Francis Lamthang
Comment piaknop aomleh...