Sawm a khat (Tithe)

Sawm a khat (Tithe)

Sawm a khat tawh kisai I gen ciangin ngaihdan tuamtuam om hi. Khenkhatten, Sawm a Khat pen Thukhun thak ah bang mah kigen khalo ahih manin piak kisam lo hi ci uh hi. Pawlkhat leuleu in piak hamtang ding ciin nakpitakin tangkopih uh hi. Bang teng hitaleh, I theih ding a kisam khat ahihleh, Jesu Gumpa leh Topa a I san khit ciangin, I kha, I Pumpi leh I neih leh lamteng Ama’ a hita a, ‘kei a’ cih ding bang mah om nawnlo hi. Tua ahih manin, I sum leh paite zong 100 a 100 Topa’ a ahi cih phawk ni. Pasian in I zek ding a hong piak sumte I bang ci zek hiam ngaihsut ding kisam hi.

Pasian in hong kepsak sumte a pat in Ama’ a ding a sawm a khat khenkhia a, biakinn ah pia na hileh Pasian in van tawlette hong hong in, thupha tampi tawh hong vuk ding cih Ama’ kamciam ahi hi. Ahih hangin, sawm a khat khateng a pia napi in, Pasian thuphate ngahlo cih om thei hi. Bang hang hi ding hiam?

Khatvei Rev. Kenneth E.Haggin kiangah, Pawlpi Upa khat hong pai a, “Pasian gupna ka san khit kum 13 sawt khin zo hi. Sawm a khat zong kum sawm leh thum sung mah pia den ing, ahih hangin bangmah a kilamdanna theituan lo hi ing”, ci hi. Hici bang Upapa pen eite’ lakah zong kitam kha thei hi. Bang ding a I sawm a khatte pia napi hang a, Pasian in a ciamsa thuphate hong tungsaklo ahi diam?Pasian in a ciamsa thuphate I ngah theih nading in:

1. Upna tawh pia in: Khenkhatten sawm a khat piak loh khak ding lauh manin pia uh hi. Sawm a khat pen lauhna tawh piak ding hilo in Upna tawh piak ding ahi hi. Pasian upna, muanna tawh I piak ding kisam hi.

2. Itna tawh pia in lungdam ko in: Sawm a khat it pipi in pia kei in la, phaltakin pia in. Na piak ciangin, Pasian kiangah Jesu Khris tungtawn a gupkhiatna ngah na hih manin lungdam ko in. Tua ciangin, “Topa aw, hih ka sawm a khat kong piak pen nang kong it man hi, kong lauh man hilo hi.

Kua hiam khat in pia in a cih man a pia hilo in, na thu sungah Nangma kammal om ahih manin pia ka hizaw hi. Tua ahih manin, hih sawm a khat Nang leh Na Pawlpi ka it man a ka piak ahi hi. Nang na kammalte nong supicing ding cih ka thei hi. Lungdam ing. Na thu sungah, ‘Kei hong thupi sim peuhmah ka thupisim ding hi,” na ci hi. “Lungdam ing”, ci in thum in.

3. Topa’n a kammalte tangtung sak ding hi cih lamen in: Topa’n, “Pia un piak in na om ding uh,” ci hi. Tua ahih manin, sawm a khat pen upna tawh lungdam ko kawm a na piak pen, “Pasian kammalte tangtung taktak ding hi”, cih lamen in.

Sanggamte, sawm a khat na piak leh, Pasian in thupha a ciamsa om hi. Tuate na ngah kei leh, ki enpha kik in. Na lungsim ngaihsutna enpha thak inla, Upna tawh khia in lungdamthu puak in. Topa’n a kammalte nang’ tungah hong tangtung sak ding hi ciin lamen in. Pasian in a kigenkhin zolo thupha tawh hong vuk ding hi. G Swan Za Lian, Fellowship News