Tapa taimang tangthu

Tapa taimang tangthu

Tapa taimangpa tangthu enkik pak zal dih ni. A pa in a tapa it lua ahihman in a nopsak ding kham lo hi. Pa aw kei luah ding na gamh hong khen in acih lai takin apa in hunsa nai lo phial mah taleh pia veve hi. A tapa taimang dinga kithawi zong thei kha ding hi, ahizong in kham lo hi.

Nikhat ni ciangin aneih khempeuh hong bei ta hi. Aneih eu-au laitak a amah tawh ankuang um khawm, atui aha a dawn khoppihte in phawk kha nawn lo uh hi. Aneih eu-au laitak lungleng khuangai in om leh ahehnem nuam lawm leh gual amai ah kigual in kiciang keei uh hi. A khitui a nulsak nuam mi kituh liang uh hi. SMS bang sim zawh loh zawzen in ngah den hi. Online bang tu leh amah tawh a kichat nuam tam lua hi. Ho ngaih zawh ding hi lo hi. A innsapna bangah lengla kitatsat lo in alut leh a pusuak ki phamat den mai hi. Ahizongin tun aneih khempeuh hong bei ciangin khuasung ui vakvaite naleng inzong pelh hialhial ta uh hi. Saguh keugaw khin khat zong bang zo nawn lo cihna hizen hi.

Sum thalawh nading naleng hong mulah ta mawk hi. A zonsak ding lawm leh gual gen loh Agents te naleng in zong hih tapa taimangpa ading hun pia zo lo uh hi. Amah leh amah hong kipei bengbuang a, kamphatna tawh vokcin nasep hong ngah thei bilbel hi. Tuazong anpiak loh, innpiak loh hi sawnsawn lai hi. Vokte nek dinga kikoih ankhing leh meh uihte naleng cilvalh liangin hong duhgawh ta liang hi. Tua dinmun atun ciangin hong khanglo zo pan hi. Ama lam pang ding kuamah a om nawn loh lam hong tel ciangin atawp khakna ah “Inn ngai ingh” cih laa hong sa thei pan hi. Innlam zuan in ciahkik hi. A zom simto lehang ” A tapa hong ciah a galmuh phetin a pa in delh phei pah in angpom a, nam hi” cidan pian in kigelh hi. Bang gim tak anam diam theih pih keng, ahizong in apa in phamawhsa zo lo hi. Itna maan, Itna taktak cihpen hih sungpan kitel mahmah sa ingh.

Joel Osteen in hibang in tangthu khat na gelh hi. ” Ka pu in hoih asak mahmah car khat hong pia hi. Tua car pen siang gen in car ka muh ngei khempeuh lakah a hoih lo pen ahihi. Ahizong in ka pu in deihsak taka hong piak ahihman in lungdam takin ka sang a, college ka pai ciangin ka tonpih den hi. Ka lawmpa khat inzong car hoih mahmah khat lei hi. Amah tawh kithukimna khat ka bawl uh a, tuapen ka nih un ka car tawh kaalkhat sung sangkah dingin, amai kaal ciangin ama car zang leuleu dingin tuabang kilaih den ding cih thu ahihi. Khanih sung bang tuabangin ka kipua den uh hi. A sawtna ciangin ka lawmpa in ama car hoih loh paulam in kei car bek ka zang uh hi. Kha khat sung khit ciangin hibangin ka lawmpa hamsatna telsiam in puaden mawk leng aman ama car puahpha ngei lo ding cih thu ka mukhia hi. Tuani a kipan hong sap sialin ” Sorry” ka cihsan pahpah hi. Hih hangin ka lawmpa pen kei tungah heh lua hi. Mikim tungah miginalo ciin hong gensia hi. Ken bel phamawh ka sa kei lel hi. Ken lah ka lawmpa pua nuam nawn lo ka hihman in asawt lo in aman ama car puahpha hi. Car hoih neih lawh pah hi. ” ci hi.

Gennop bulpi pen hih hizaw hi. Na lawmte leh akuama peuh Itna taktak leh khualna taktak na neih leh hih tangthu tegel na tel kul masa hi. Tapa taimangpa pa in a tapa it hi. It ing ciin ukcip den mawk leh a tapa in siat lawh zaw thei ding hi. It ingh ciin innsungah khumcip den mawk leh apa innsungah a om den hangin apa kiangah lungsim thak tawh hong kilehkik ngei lo ding hi. Joel Osteen inzong a lawmpa it hi. It ingh ciin huhden mawk leh a lawmpa in ama car puahpha in bawlhoih ngei lo ding hi. Joel Osteen lungsim sunga om Itna hangin a lawmpa in amah pen sila bangin bawl hilhial thei mawk hi.

Theih dinga kilawm te:

– Na nuntak sung kuamah ki uk sak kei in.

– Na it na ngaihte ukcip sawm kei zaw inla, suakta takin om sak in. Na lawm ding ngiat a Pasian hong sehsaksa ahileh ahun lap in nang kiangah hong kilehkik lel ding hi. Hong kilehkik kei leh nang lawm ding cihna hi lo pah hi.

– Lawm tampi nei a sila na suah sangin lawm tawmcik bek tawh suakta taka na om ding thupi zaw hi.

– Mihingte pen eilam hong pang ding leh ei hong huh zo den ding kuamah a om nawn loh ciang bekin a ki puahpha zo pan ki tamzaw hi.

– It napi Itna lahkhiat dan siam lohna hangin mi a tamzaw in siat lawh thei uh hi.

A telsiam dingin Topa’n mikim thupha hong pia ta hen.

Francis Lamthang
….Zomi Quavadis….