Tukum 2016 kum Olympic Games kimawl ciangin meilahpi Torch a deding lakah Refugee khatzong kihel hi ci’n Thursday ni in International Olympic Committee in genkhia hi. Tukum 2016 kum Olympic Games kimawl nading pen Brazil gam ii khuapi minthang mahmahkhat ahi Rio de Janeiro khua ah aki bawlding ahihi.
Tua Rio de Janeiro khuapi ah Olympics pawipi ciangin akivakding meikuang Flame pipen Greece khuapi Athens panin mei kidesa in hongki puading hi a, Greece gamsung aom Refugee Camp khatzong nawksakding uh cihi.
Tua Olympic meikuangpi pen April 21 ni in Greece gamah kivakding a, tuazawh ni 12 khitciang in South American gam aom Brazil gam zuanin hongki paipihding hi. Brazil gamsung ah May 03 ni ciangin tungpanding cihi.
Greece gampen abeisa hunsung in Refugee micimawh galtai te tampitak in belhbuk in nazangthei uh a, adiakdiak in Syria, Iraq leh Afghanistan gamte panin gambeel tampitak in Greece gam nazuan uhhi. Nungkumsung bekbek inzong Europe gamsung teng ah Refugee mi Million khat valbang lutding in ki ciamteh hi.
Tua ahih manin Greece gam panin Olympic meikuangpi akipuak ciangin Refugee Camp ki nawksakding a, tuabek thamlo Refugee gambeel mi khatzong meikuang meilah tawiding in kizangding hi ci’n Olympic makai te’n genkhia uhhi.
Hihbang in Olympic meilah atawiding in Refugee khat azatsawmna ahang ahihleh leitung Refugee gambel te vaipen leitungbup in atheih nading leh alunglutpih nading uh cih ngimna ahihi. ZD Sawltak #zomidaily
Comment piaknop aomleh...