Meh lim kuang khat ~ Cin Sian Mung

Meh lim kuang khat ~ Cin Sian Mung

Inn kuan khat, nitak an ne dingin, hong ki thawi uh aa, a pa un thu a nget khit ciangin, an a nek uh leh, a pa un a ‘Meh’ uh lim sa a hih man in, “Hih meh lim si ae” a cih leh, a tapa in, ‘ka nu huan ai ve pa’.. na ci hi. Tua lai tak in, an nek dawhkan pam deuh ah, meh koih na tau tungah, Pu Lothaangsan, Pi Lothaangkang, Pa Siing, Nu Zasan, Taang Sathauthawl, Taang Cibung, Taang Aisanbung, Lia Mehza etc …. cih teng na tu phengphang uh hi..

Pu Lothaangsan in, ” Na za uh hia lawm te” ci-in a lawm te kiangah, ”Meh lim kuang khat” a pian na dingin kei om kei leng a hi thei vet lo thu hi ”’ ci-in ki sial phei mikmek hih tuak hi. Pi Lothaangkaang zongh, dawi tuan lo,..”Meh lim kuang khat” ih cih pen ”Kei hang hi” Nang hang hi kei”” na cih san leuleu hi..

PaSiing in zongh, ”Ken zongh them khat ongh gen ve vang aw” ci-in ” Meh lim ih cih tak ciang aa maw, ii tu kei ongh ki hel kei lengh, no teng peuhmah bel khua suak in ongh um hial keng ”’ na ci lailai ei guai……

Nu Zasan in zongh ” Kei zongh tawm ong soi sak vevua” ci.. ;; ” Meh lim ih cih pen kei mah kawlsiing om oo leng meh in lim na nei lo, phalbi ciang bang deuh kei om oo leng mi te’n khua lum sa lo in, a an kam uh lim lo, in tu ahih man in, meh lim kuang khat pian na’ng kei a supi pen hi ingh ei lawm te”’ na ci kheukhau vial…

TaangSathau in zongh, ” Me a ki vawt ciang sia, kei ka om ngawl aa piang ngawl hi ta nah, no teng sang kei thupi zaw khi hi”’ na ci kengkang leuleu…..

Taang Aisan zongh, om khong tuan lo…dingto vat in, ”No teng bang ki nialnial nai ta vua” ci-in ‘Ken ong gen vang ei na ngai vo guai Meh lim ih cih pen, kei om kei lenglengleng ,,,,,,,,,, ….. ,,,,,,,, bababababangmah suak kei ni uh teh he he he””’ na ci phei khengkhang mawk…

Lia Mehza in zongh, ” ken zongh tawm hawng ngen nuam veng aw…..kei bel bang mah ka hih loh hang, meh hum na ding kei bek mah hong ki zangh suak in, kei ka om leh pel mawh hi song vak ei”’ na ci phei dengdang …….

Khat in lah ‘Kei hang hi’ ci, hi lam aa te’n lah ‘kei hang hi’ ci, hua lam aa te’n lan ” kei om kei leng” ci ngeingai uh, tua leh, Pu Lothaangsan in, ” tua a hih leh ih vek in zingciang kidem na nei ding hi hang” ci,,. a vek un thu kim na sign ngeingai uh…….

A zingciangin, meh huan hun hong tung pet mah, a ki dem ding teng zongh, a mau om na ciatciat pan hong pai khia, meh bel sungah, a mau thu ciat in, a lomlom in hong tuak suak lialua uh aa, hong ki dem takpi ta uh hi…

Inn kuan te an nek hun hong tun tak ciangin, a pa un; ‘Kalaisai ih meh aisan nak nam si ae’ ci;;;… A nu un, ”Ih meh sathau tam lua” ci…a tuam tek in, ih meh al lua, thak lua namsia a ci tawh, lim kei lua in paai un, a ci tawh, a meh ki phat nawn loin, hong ki gen sia dikdek ta hi…

Meh lim na dingaa, ki dem na sungaa ki hel teng zongh, a mai tuk liauluau tawh, kap dedek aa, a men nena tawh, kawm lam heek aa, akunkun tawh, muk tuk liauluau aa a phunphun tawh, a ki ho mel om loin, a ut na tek uh ah tu tengtang uh hi….

Tua lai tak in, Pu Lothaangsan mah hong ki thu khual sak in, ”’ khai khai khai….guai,,,,, nungak te tangval te, dingvo dingvo,,.. hi dan in kha kunkun leng hoih ken ci’n ,,..khat le khat ih mawh na te ki mai sak in, mai lam ah, ei tenglo dang lah meh sungah ki hel ding om lo ih hih manin, khut ki len in, ki thu tuak tak in, ki niam khiat takin, mong khat tek pan ma ih pan khop ding hi zaw ei guai,,, ki tawng nawn kei ni ei;;””’ ci -in ki lem tuah kik uh hi…

Ei Zomi te ae leh, pawlpi sungah, ki pawl na khat peuhpeuh ah, ih Zogam aa ding ih sep na ah, mipi aa ding ih sep na ah, khan toh na tawm khat hong om ciang, aih kei leh, min ih ngah pian ciang, ” Kei hang hi” ” Kei om kei leng hi ciang tung ken teh ” ” Kei om nawn kei leng bei mang in teh” ih ci kha ngei zel hiam….?

”Kei” cih lungsim ih neih lai teng,”Ei” ih cih theih ma tengin, Zogam aa ding, Zomi aa ding, ih sep suk ih sep toh hang, gam le lei phat tuam na hi loin, ih kiam suk na a hih khak ding lau huai hi…mi hong gen siat na a hih khak ding, zongh lau huai hi. Cin Sian Mung (Mungpi) USA