South Korea ah kimawlna Fitness Center innpikhat meikang, mi 29 si

South Korea ah kimawlna Fitness Center innpikhat meikang, mi 29 si

South Korea gamsung aom cidamnading kimawlna inngolpi “Fitness Center” khat meikanggawp in mi 29 takin sihlawh cih AFP pan kiza hi. Tua Fitness Center pen South Korea, Jecheon City sungah aom hi in, dawl 8 (8 storey) tak apha hi a, zanni Thursday ni in akanggawp ahihi. Asi 29 banah tuni Friday 10am ciangciang aliamzong mi 29 bangmah pha cih Korea Times te’n pulakkhia uhhi.

Hih Fitness Center meikat laitak in asungah aomte atamzaw pen Sauna Room sungah tuisahu tawh tawldam cidam dingin akidiah laitak uhhi ci’n thunei te’n genkhia hi.

Official te’n Reuters te tungah agenna ah meikat kipatna pen dawl khatna aom Car Parking panin akipan cihi. Local Fire Station panin thunei khat ii genna ah asi te lakah luang 13 khawngbek ami kuahiam cih kitelbek a, adangtepen limkatlua ahih manin, ami kua cihzong kitello cimawk hi.

Asi atamzaw pen Sauna Room sungah aki mukhia hi a, tuasung ah asi tepen meikatna taktak sangin husam in “suffocation” tawh asi uh hizaw hi ci’n thunei te’n genkhia hi.

Video: Fire in South Korean fitness centre kills 29

Asi aphazah pen ki behlapthei khading hi ci’n Fire Station Officials te’n genkhia uhhi.

Hih Fitness Center pen apualam Glass Facades tengzong vomcipgawp in, meiphelh Firefighter te’n asungah anungtalai khatpeuh aomkhadiam cih azongin buaimahmah uhhi.

More: London ah Apartment innsangpi khat meikanggawp in mi 30 val liam

Local News Channel khat ahi YTN te genna ah President Moon Jae-in inzong hih tuahsiatna hangin asite tungtang ah dahna pulakkhia cihi.

Jecheon City pen South Korea gam ii akhuapi Capital ahi Seoul City ii leitawlam ah aom hi a, mualtuamtuam leh buaipi te hangin khualzinmi atam mahmahna, Popular Tourist Destination khat ahihi. Sawltak #zomidaily