Covid-19 hangin Europe gamsung ah asi atampen UK gam hitota

Covid-19 hangin U.K. gam-a si zah in Italy makhelh ta ahih manin Europe ah a si tam penna gam hi ta

May 6: United Kingdom government in Covid-19 virus hanga si zah a latest data pulakkhia a, Italy gam-a si zah sangin tam zaw ta hi. Tu-in Europe continent adingin UK gam-ah hih virus hangin mi tam si pen a, Italy gam makhelh ta hi.

Coronavirus natna hangin UK gam sungah a si 29,427 pha ta a, kamsiatna ahih kei leh tuahsiatna lianpi “massive tragedy” hi ci-in British Foreign Secretary Dominic Raab in gen hi. UK in a makhelh ma-in Europe adingin mi tam a sih penna Italy gam-ah Covid-19 virus hanga si latest data 29,315 pha hi ci-in kiciamteh hi. Ahih zongin mi siam experts kicite in leitung bup-a Covid-19 virus hanga si khempeuh tehkakna (full global comparisons) a kibawl ma-in kha bang zah hiam hun a kivei lai kisam ding hi ci uh hi.

Italy leh UK gam-a mi si in a kiciamtehna record ah a site pen a natna virus ngah (tested positive for coronavirus) tuak hi uh a, ahi zongin Italy gam-a Covid-19 pandemic figure pha zah sangin UK ah manlang zaw hi ci-in BBC head of statistics Robert Cuffe in gen hi.

“Tua bangin a kitehkak theihna dingin a caveats (warning or red flag) om a, tuate lakah Italy gam milip sangin UK gam milip pha zah 10% in tam zaw a, Italy gam-a khuapi golpen sangin Britain gam-a khuapi golpen a leh thum in gol zaw hi ci hi.

Italy leh UK in testing regimes tuam tuak nei uh a, UK sangin Italy gam-ah Covid-19 tests tam kibawl khia zaw hi. British Foreign Secretary Rabb in daily coronavirus briefing hun in a thugenna ah, “Cikmah hun in UK in a kimu ngei lo hih kamsiatna lian hangin mi 29,427 nuntakna kisuplawh khin zo a, hih bangin mi a tam sih lam kimu ngei lo hi,” ci hi.

Ahi zongin leitung bup tawh a tehkakna (international comparisons) ka bawl kei ding hi ci-in a genna ah, “Hih Covid-19 pandemic a bei siang mateng gam tuamtuamte in a dona uh leh a panlakna uh kua in hih hoih pen hiam cih thukhenna taktak kinei thei nai lo ding hi. A deuhkhol in hih virus hanga si (mortality) international data a huampi in a ki-et ma-in kitehkak thei nai lo ding hi,” ci hi. Source: BBC @ Thang Khan Lian #ZUNs