Singapore inndawl 8 pan naupangno kum 5 aphapan khat kia in sipah
Singapore gamsung ah naupangno kum 5 aphapan khat inndawl 8 panin kiasuk in sipah cih Straits Times pan kiza hi. Hih thupiang pen nung Saturday ni in Woodlands Close Office Unit khatah thupiang hi a, tua naupangno pen inndei sungkhat ah kongkhak ki kalhkhumkha hi.
Inndei sungah aki kalhkhumkha naupangno pen apusuahkhiat nading zongkawikawi in, anunung ah tawlet (Window) panin apusuahsawm ciangin anuai ah akiasuk hiding kici hi.
Hih thupiang tawh kisai in Singapore Police te’n nitaklam 9am hunpawl in 11 Woodlands Close ah inndawn pan naupang akiasuk omhi ci’n hongki zasak ci uhhi. Tua naupangno pen Building ii anuai leilak ah agamtang nawnvetlo in alum leulau in kimu hi. Zato lampanin Paramedics thunei te genna ah tua naupangno pen aphual mahah sisuakpah hi ci’n genkhia uhhi.
Shin Min Daily News te’n hihvai apulakna ah tua naupangno pen anu apa te’n anasepna Office ah atonpih uh cihi. Anu apa te nasep laitak in naupangno pen ihmutsuak ahih manin, inndei sungah alupsak uhhi ci’n pulakkhia uhhi.
Tua naupangno ii anu apa tepen laihilhna sanginn (Education Centre) khat anei uh hi a, Saturday ni in sangkikahlo, Lesson omlo himahleh nasepding pawlkhat nei uh ahih manin, anupa un zumkah in ataneu uhzong atonpih kici hi.
Anu apa te zumpan in aciahding uhciangin apa in zumsung meite sumit in, anupa un mawtaw hawl in ciahkhia uhhi.
A inn uh atunkhit mawtaw koihna Car Parking atun uhciangin zumsung ah ataneu uh anutsiat khaklam phawkpan uh cimawk hi.
A inn uhleh azum Office pen mawtaw tawh Minute 5 bek akipai hi a, amauzong anupa un ata dawnkikding in taikikpah uhhi. Ahi zongin Office Building atun uhciangin ataneu uhpen leilak ah akiasuk, alum leulausa in kamu uhhi ci’n anu in genkhia hi.
More: Naupang kum 8 khat anu in tawng ahih manin inntungpan tuakin si
Office sungah a etkik uhciangin Window pen akihongsa in aomlam mukhia uh a, atapa pen ihmut athawh ciangin lunghimawh in apusuak nading zongkawikawi a, akiasuk hiding ci uhhi. Anu in hih ataneu uh asihna tungtawn in kaki suangtak mahmah uhhi, apa inzong Windows te hoihtak kalhkha hileh ataneu un kongkhak hongtheiloding ahih manin, hihbang dahna thu pianglo khading hi ci’n genkhia hi. Sawltak #zomidaily
Comment piaknop aomleh...