Malaysia gamsung thuthang tungtawn in kikem ciatni Zomi te (Forewarn makes half avoid)
30 August 2017 (Wednesday) ni zingsang lam 11 hun pawl in Kawlgam sung ah Rohingya minamte bawlsiatna a khawl kei leh Malaysia gamsung a om kawlgam mi khempeuh zong hawl khia uhhen ci in Malaysia gamsung biakna kipawlna NGOs khat ahi “Malaysian Consultative Council of Islam Organisations (Mapim)” te in Malaysia kumpi thuneite kiang genkhia uh hi. Hih ‘Mapim’ te makaihna tawh mi 1,000 val in Kawlgam Embassy mai ah lungphona nei uh a, tua sungah “Kawlgam sunga om Rohingya te mihing ciatciat ki thahna, ki bawlsiatna pen thuaklahhuai lua mahmah ta hi.
No kawlgam mite zong hilai ah nong om ding uh kisam lo hi. No kawlgam miteng omkei le uhcin buaina omlo zaw ding hi. Ka gamsung uh ah nong paipai uh kullo hi” ci-in Mapim President Mohd Azmi Abdul Hamid in tua lungphona sungah genkhia hi. Lungphona a neih kawm un kawlgam Embassy te tungah Memorandum piakna zong nei hi.
Tua I gen buaina pen Malaysia kumpi ten biakna kibatpih khat hihna tawh nasakpih mahmah in,gam leh minam vai bek hilo in, biakna vai tawh hong kizop khak ding lauhuaimahmah hi. Malaysia gamsung a om Zomi ten, Kawlgam mi ihihna tawh hong mudah mahmah ahih lam phawk den in.
Theihding:
1. Malacca Kawlsai gei a, mithat pa, a nitakciang Palik ten thu asit leh kawlgam, Rakhine gamsung buaina hanga kathah hi ci-in genkhia hi. Tua ahihmanin kawlgam mi nahihna tawh tuabang natuahloh nading kidawm in.
2. Zomi ten na Zomi hihna Card leh Chirstian hihna van khatpeuh napum tungah vom/keng den in.
3. ZAM makaite, pawlpi siate, khua makai te phone No. na vakkhiat ma limtak ciamteh phot in.
4. Ahih theihleh Zomi a hilo kawlgam sung a minamdang te tawh zong kithuah/na semkhawm kei zaw in.
5. Kawlsai khawng ah zong mawk ciakciak kei in.
6. Nitak 10:00 khit zawh puapial non lo ding, zingsang zong lollua lo ding.
7. Hawhna ciahna ah kidawm in, nangbek vak khia kei in.
8. Khuasung vakciang kithawi sitset ding. Zuu kamnam te tawh kithuah loding.
9. Zomite haksatna tuak/ kimat thuak a om leh ZAM zum ah hong zasak pahpah un.
ZOMI IDOL MALAYSIA 2017 : Zomi Khuado Pawi 2017 ah Zomi Idol bek omding, Zomi Idol 2017 kidemna ah akidem dingte sungpan a tawmbei pen ding leh a hoihpen ding gelna tawh mikhat ciang RM150 kidong hi.Tuasum pen (Soundtrack) bawlna, Zomi Idol Award leh Fund sum hipah dinga, a cinglo teng a kisam bangin Khuado Committee in tavuan hongla ding hi.
Form a Fill up khin peuhin (Soundtrack) zong ngah pah pah ahih manin a masate in kigin hun tampi ngah zaw pah hi. Tukha sungbek min piak kisang ahih manin a manlang theipen in form hong fill up un.
KIDEMNA A ZAT DING LATE: 1. Naubangsang vaw (Phuak-Thein Khai, Sa-Niangpi) 2. Tuhun Zomi (Phuak/sa-Thawn Kham) 3. Zomi Mah Ngaizaw Ing (Phuak-Suum Mung, Sa-Stephen Mang) Angai nuampeuh mah in hih contact ah la kingen thei hi. Cii Cing – 0111 2828 482
ZOMI LEAGUE TAWH KISAI ZAKSAKNA : Khuado pawi muakna ih bawl zel ahi Zomi League pen a ngeina bangmah in kinei ding a, kimawl ding hun pen September 27, 28, 29 ni (3) sung hi ding hi. Lutman pen team khat ciangin RM 800 leh Deposit RM 400 hi ding a, min sazian pen September 18 ni a nungnung pen in piak ding ahihi. September 18 (Monday) ni in Group khenna zong kinei pah ding hi. Sazian hong ki piapia ta hi.
Design, Design, Design : KHUADO PAWI 2017 COMMITTEE te khensatna zui-in Malaysia ah ineih ngei nai loh ahi i ZOMI ngeina puan leh puankhuidan/design a tuamtuam lahkhiatna pen Khuado ni 16 October 2017 (Monday) in neinuam ihih manin Malaysia gam sunga om ZOMI puankhui thei teng kigawm khawm/mapang khawm ciatni cih i zumpi pan kong tangko uhhi. Kei zong Zomi kipawlna ah maa pang khat hi nuam ing ci-in a lunglut ten 28 August ma in hong zasak hamtang un. Kizop nading – Ngaih Hau: 018 220 0658
ZAM ZUM AH HONG HAWH : Pa Thang Lian Khup leh Nu Nuam Lian Cing, Sia Joseph Langh Sian Thang-Kahgen, You -th Pastor – Hosana AG, Yangon te Malaysia hong zin sungin ZAM zumah hong hawhin thu ngetna hong neihsak ahih man in kilungdam mahmah hi. Topa’n thupha hong piaksak semsem tahen.
ZAM PALAI THUNGET : ZAM Palai te khasim thunget kizom to thei a, Carmel International Charismatic Center pawlpi kem Rev. Zam Suan Kham in deihsak thungetna leh Pasian kammal tawh thapiakna hong nei a, kilungdam mahmah hi. Topa’n siapa nuntakna thupha tawh hong tuamin hong zatsak semsem tahen.
ZAM ZUM AH HONG HAWH : Sia Do Sian Mung – Valvum, Pastor Fuller Mission Center, Tahan, Kalaymyo in Malaysia hong zin sungin ZAM zum ah hong hawhin thungetna hong neihsak ahih manin kilungdam mahmah hi. Topa’n thupha hong piaksak semsem tahen.
ZAM ZUM AH HONG HAWH : Yangon, Full Gospel Assembly founder leh senior Pastor Rev. Dr. Dam Suan Mung, Malaysia, Full Gospel Worship Center pawlpi kem Rev. Cing San Neam te ZAM zum ah hong hawhin, thapiakna, thungetsakna hong nei uh a, Rev. Dr. Dam Suan Mung in ZAM zum a dingin US$500 hong piakhia lai ahih manin kilungdam mah mah hi. Topa’n thupha hongpia in hong zang semsem ta hen.
ZOMI BUP KHUADO PAWI AH MAPANG KHAWM NI Zomi Ngeina Khuado Pawi limtak a bawl dingin thukimna kinei hi. A mun Zomite Khuado Hall, Chin Woo Stadium mah kipsak hi. Khuado pawi nasiatak i bawl nading in sum leh pai tampi hong kisam ahih manin muanna leh lametna lianpi tawh Khuado Committee in anuai a bangin mapang khawm dingin kong zawn uhhi. 1. Khua kipawlna pan RM200 pan atungsiah, 2. Biakna pawlpi khat ciang RM300 pan a tungsiah leh Khuado ni dingin 16 October 2017 (Monday) ni dingin ki kipsak hi.
Zomi te kumkhen Khuado pawi ah Malaysia leitang tung a om Zomite khempeuh khatzong pelhem lo a, ih kihel kim theih ding deihna tawh kong theikhol sak uhhi. Tua sung ah Zomite maban ding thugenna, Zomi Idol Malaysia 2017, Laam tuamtuam, Fashion Show leh Lucky Draw te a kipan kivakna/talent show tuamtuam zong om ding ahih manin khuahun sia leh thusia tuamtuamte tawh kipelh na dingin thungen ciatni. By: Khuado Committee 2017
KHUADO PAWI A DING PANPIHNA HONG PIA TENG Thalmual Innkuan Malaysia RM200 Darkhai Unau-Malaysia RM200 3. Mualpi Innkuan– Malaysia RM200 Haupi Khua kipawlna RM200 Vongmual Khua Kipawlna RM200 Tuithang Innkuan-Malaysia RM200 Limkhai Bung Khua Kipawlna RM200 Saipimual Khua Kipawlna RM200 Tauleng Khua Kipawlna RM150 Zung Khua Kipawlna RM200 Cikha Innkuan Malaysia RM200 ZCCM RM300 13. Buanli Khua Kipawlna RM200 14. Mualnuam Khua Kipawlna RM200 15. Bapi Khua Kipawlna RM100 16. Chanthagyi Khua Kipawlna RM200 17. Taaklam Innkuan Malaysia RM200 18. Ngalbual Khua Kipawlna RM200 19. Suanghoih Khua Kipawlna RM200 20. Teeklui Khua Kipawlna RM100 21. Saizang Khua Kipawlna RM200 22. Tuimui Khua Kipawlna RM200 23. MZYA(Malaysia Zozang Youth Association) RM200 24. Zomi Innkuan-Rawang Pawlpi RM300 25. Dimpi Khua Kipawlna RM200 26. Kansua Innkuan RM200 27. Myanmar Beleivers Fellowship RM300 28. Sezang Vontawi-Malaysia RM200 29. Anlangh Khua Kipawlna RM200 30. ZEM Pawlpi RM300 31. Malaysia Laipian Pasian Pawlpi RM300 32. Selbungh Khua Kipawlna RM200
DAHPIH NA :Tuithang Khuami Pa Suan Khan Gen leh Nu Don Sawm Vung te tapa Tg. Zam Sian Piang-Ngaihte beh in 25 August 2017 ni in lamet loh pi in hong nusia vat a,
Passport tawh om ahih manin a luanghawm pen 31 August 2017 in Kawlgam ah kipuak kik hi. Tg. Zam Sian Piang hong nusiatna hang tawh adah akap khem peuh Topa’n a lamdang hong hehnem tahen. Tg. Zam Sian Piang pen Zomi khat a hihban ah ZSM member a hihna zui in ZAM pan a kisam bangin ki vansak hi.Zumpi pan in zong a nusiat a innkuan pih te tawh a kibangin dahpihna ih pulak hi.
ZYA SERIES VOLUME II DVD ZAM ZUM AH KI NGAH TA : I ngaklah mahmah Cimawh dongtuakte huh leh pan pihnna phualpi pan akibawl, Zomi te kipawlna leh a tangzai pen na sep khiatna zumpi a hih ZYA Myanmar, Series Volume II DVD a hoih mahmah Malaysia Zomite ading ZAM zum hong tungta ahih manin, ZAM zum leh pawlpi tuam tuam ah hong kipuak ciang RM 10 tawh na leisak ziahziah un. Zomi dongh tuak nasepna ah a panpih leh ki helkha nahihna dingin DVD na leisak hamtang un. Lungdam. Na sum omna ah na Lungsim om ding hi. Theihding: Youtube ah khah theilo ding leh Copy theilo ding.
MYANMAR BELIEVERS FELLOWSHIP’ CIALPI PAN SAPNA” : MBF Sunway Pawlpi in kum khat in khatvei ta Cialpi bawl ding kagelna uha, tukum 2017 adingin Speaker Rev. Thomas Pau Lian Tuang (Grace Baptist Church, Singunau) tawh 7-10 Sept 2017 sungteng Lungdamna Thusinna/ Tangko khiatna ah akua maciat nong kihel nadingun Itna le Zahtakna Lianpi tawh kong sam uh hi.
Zingsang 9:30AM pan 10:00AM( Kial lap) 10:00AM-12:00 NOON Thusinna 12:00PM -1:00PM Sun an 1:00PM—3:00PM Thusinna 3:15 PM—4:00PM Counselling 8:00PM -10:00PM Pasian Thu Tangkona Paidan : Grabcar – Drop off: Myanmar Believers Fellowship KL pan-Sunway U Bus No 270,272 Klang Bus Khempeuh ki zui thei. KTM : Setia Jaya Station Contact : Sya Thangbawk : 010 427 4567 Pa Thuam Lian : 016 264 5228
Kimat kihen na tuahkhak leh: ZAM member te kimat kihen na tuahkhak uh leh Contact Sia Tuangpu: 016 254 4093, Sia Go Mang: 018 202 1216
ZATO VAI BUAIPIH TENG Thang Ta(Tungzang) HKL Pau Huai Vung(Thalmual) Hospital Ampang Pau Do Mung(Saizang) UKM Zam Sian Tuang(Valvum) GHKL Zato lam tawh kisai Contact : Sia Khuppi 016 3838 014, Sm CiiCing 011 1282 8482
ZAM MEMBER TE A DING NASEP
STORE KEEPING :Khasum RM1300-1500 kikal, Nasep hun nai 8 sung. Omna pia ann pialo. UN card nei hi ding. Amun : Sri Rampai Nasep tawh kisai Contact : Sia Khuppi 016 3838 014
LUNGDAM KOHNA Sia Suanno (Tamu, khampat khua makai)RM200 MBF RM100 Rev. Dr. Dam Suan Mung US$500 Panpihna hongpia khempeuh tungah gen zawhloh lungdamna lianpi ZAM pan kong tangko uhhi. Topa’n Zomi te adingin mapang zo semsem dingin thupha hong pia ta hen.
Comment piaknop aomleh...