Malaysia gamsung biakinn leh pawibawlna te ah Bomb asukkhapsawm IS migilo 3 kiman

Malaysia gamsung biakinn leh pawibawlna te ah Bomb asukkhapsawm IS migilo 3 kiman

Malaysia, Kelantan sungah nungkalsung in migilo mi 3 kimankhia a, apuakkhamthei hiamvan Bomb honkhatzong kiman cih theStar pan kiza hi. Kelantan, Pasir Puteh sung aom Restaurant khatpanin pasal 3 akimankhia hi a, hihte tungtawn in apuakkhamthei Bomb namkhat ahi IED akici “Improvised Explosive Devices” honkhat kiman cihi.

Tua apuakkhamthei hiamvanzat Bomb tepen apuakkham hizenzen leh Meter 30 kimkot huamsungteng susiatheiding ciliang hi.

Apuakkham hileh Meter 30 huamsung Radius sungteng aliamgawpding banah, 10 Meter Radius huamsung aomteng sihamtangding cimawk hi.

Tua hiamvan tepen Malaysia gamsung ah IS migilo tetawh akipawl te’n azatsawm uh cimawk hi. Adiakdiak in nung September khasung in akibawlsawm, aki Cancel kik ahi “Better Beer Festival” akici Beer pawi akibawl hileh tua apuakkham vante akizatsawm cimawk hi.

Tuabek thamlo, Malaysia gamsung aom Muslim biakna munte ahilo, biakna dangdang te kikhopna munte ah zong apuakkhap saksawm uh cihi.

Hih apuakkhamthei Bomb te asukhamding amakai Mastermind pen a ummawhhuai hetlo mi 2 ahihi. Tuate lakah khatpa pen sangnaupang kum 19 aphapan khat hi a, Form 6 akahlaitak ahihi. Adang khatpa pen galkaplui kici a, kum 35 aphakhin khat ahihi.

Tuate tawh akipawlkhawm, akisam bangbang apanpih adang khatpapen kum 25 aphakhin Contract Worker khat ahihi. Hihpa pen IS tetawh kinakzop mahmah in, abeisa nungkum June khasung in Puchong vengsung aom Movida Nightclub ah Bomb asumkhamzong hihpa tawh akizom hi ci’n Inspector-General of Police Tan Sri Mohamad Fuzi Harun in genkhia hi.

Hih IS migilo tetawh akilimzop mahmah mi 3 tepen kumpi thunei te’n ahunlap in amankhiathei uh ahihi.

Azenzen in ageelbang in tua Bomb te sukhamthei himawk leh mi tampitak in sihlawh theiding hi ci’n Bukit Aman ah Tuesday ni in Press Conference ah genkhia hi.

Hih IED akici apuakkhamthei Bomb namte banah, Gas Pipe Bomb, PVC Pipes tuamtuam, AA Carbon Batteries, Wire khau honkhat, Mobile Phone leh Fire Crackers, Gas bung leh avanzat honpikhat kiman khiakhawm hi.

Hihbangdan Bomb alauhuai te bangci bawltheihmawk uhhiam cihpen aki kansan laitak hi a, ahi zongin hihte lakah khatpapen galkaplui himawk ahih manin, tuapa tungtawn inzong tampi bawlthei uh hiding cihi. Tuaban ah akizoppih IS makai te’nzong panpih hiding kici hi.

Video: Police foil terror plot on beer festival and entertainment outlets

Klang Valley sung aom Muslim tezat ahilo biakinn pawlkhat leh gualnop thaangtatna Entertainment Outlets tepen IS migilo te’n ngimbel in anei khinkhianden uh himawk hi.

Tukumsung bekbek inzong Malaysia gamsung panin IS migilo tetawh akipawl Militants i 78 kimankhia khinta hi. Tuaban ah ngongtatsawmna Terror Plot zong akigawm in 8 bang ki khamcipthei, ahunlap in ki khawlsakthei hi ci’n Mohamad Fuzi in genkhia hi.

Related: US Airstrikes te’n Iraq gamsung ah ISIS migilo mi 250 kaplum

Tulaitak Malaysia gammi IS galkap pen Syria gamsung ah mi 53 bang omlai a, Philippines gamsung ah mi 5 bang omlaiding hi cihzong genbeh hi. Hihte pen ahunbit in aki encik gige hi a, Malaysia gamsung hongciahkhak zenzenleh kobel Ready sa in aki omden hi ci’n Mohamad Fuzi in pulakkhia hi. Sawltak #zomidaily