Myanmar gambup Tan 10 laivuanna ah Zolia 3 in All D ngah

Myanmar gambup Tan 10 laivuanna ah Zolia 3 in All D ngah

Aki tangkosa mahbangin Myanmar gambup ah Tan 10 laivuanna Exam Result pen tuni Saturday (June 02) ni in ki tangko khiata hi. Tan 10 laivuanna ah akidong Exam Question Paper pen Myanmar gambup akibang hi a, Myanmar gambup aom Tan 10 laivuan khempeuh pen aki gawtbawl zawdeuh, aki hamphat zawdeuh cihbang omtheilo hi.

Tua ahih manin Myanmar gambup Tan 10 laivuanna Result tungtawn in apil asiam pen aki gambup Level in aki etkaktheizong hipah hi.

Tukum Tan 10 laivuanna panin Zomi 3 in Subject khempeuh avekin Distinction (All D) hongngah cih kiza ahih manin, Zomi Daily panin kong lungdampih mahmah uhhi. Tuciangciang Zomi sungah All D ngah akiza pen mi 3 hi a, avek un Zolia vive hisawnsawn uhhi. Numei te gualtungtuang mahmah uhhi. (Zolia khat ii akhuapen Tungtuang hisawnsawn a, Tungtuang te gualtungtuang mahmah uhhi)

Zomi sungpan All Distinctions (All D) ngah Zolia 3 te:

Lia Ning Hau Ciin @ Hauciin

• Pa Min – Pa Cin Kap Hang
• Nu min – Nu Tuan Za Niang
• Pilsinna – Shwe Lah Min Private School, Kalaymyo
• Tenna – Tungtuang Khua, Tonzang Township

Lia Thawng Sian Tawi Cing @ Tawicing

• Pa Min – Pa Cin Khen Lian
• Nu min – Nu Zam Khan Vung
• Pilsinna – Shwe Lah Min Private School, Kalaymyo
• Tenna – Kalay Myo

Lia Chung Muan Kim @ Muanmuan

• Pa Min – Pa Ngo Cin Khup
• Nu min – Nu Zualte
• Pilsinna – B.E.H.S 2 Latha
• Tenna – Yangon

Hih Zolia 3 te tungtawn in Zomi te ihkipak mahmah hi. Topa’n hih Zolia 3 te maban hong zopsaksuak henla, Zomi te atawisang semsemding mipil misiam te hong suaksak tahen! Sawltak #zomidaily (Ref: Tedim Post)

Myanmar gambup Tan 10 laivuanna Result kithei tading

University kahtheih nading abeisa March khasung in Myanmar gambup Tan 10 laivuanna kinei hi. Tua Result pen hongtungding June 02 (Saturday) ni in kithei tading cih Department of Myanmar Examinations, Ministry of Education, Myanmar tungtawn in kiza hi.

Tan 10 Result pen June 02 ni ciangin zingsang 6am hun akipan Myanmar gambup State leh Region tuamtuam sungaom Myone laivuanna sanginn te ah ahun akibanglian in Result tangkona kisuangding hi.

Tuabek thamlo, Yangon khuapisung aom Insein Myone No. 1 Basic Education High School, Yankin Myone No. 1 Basic Education High School, Kamayut Myone No. 3 Basic Education High School, Lanmadaw Myone No. 1 Basic Education High School, Dagon Myone No. 2 Basic Education High School, Thingangyun Myone No. 1 Basic Education High School cih sanginnpi te ahzong Myanmar State leh Region gambup ii Tan 10 Result te kisuangding hi.

Myanmar State leh Region tuamtuam aom Ministry of Education zumte ahzong June 02, zingsanglam 6am khitzawh akipan kidongtheiding cihi.

Tuaban ah June 02, zingsanglam 6am khit akipan Ministry of Education te ii website ahi http://www.moe.gov.mm/ pan ahi zongin, laihuanna asitcian Department of Myanmar Examinations te ii website ahi http://www.myanmarexam.org/ pan ahi zongin Tan 10 Result te ki entheiding hi.

Myanmar gamsung ah Tan 10 Exam pen athupi penpen laivuankhat cihtheih ahihi. Tan 10 laivuan ciangin dotna “Exam Question Paper” pen Myanmar gambup ah khatbek akibang in kibawl in akivuansak ahih manin, Myanmar gambup aom Tan 10 laivuan khempeuh ii pilna siamna pen Exam Result tungtawn in aki mukhiading ahihi.

More: Kawlgam Tan 10 laivuanna ah sangnaupang mi 52,000 takin laivuanding pelh

Abeisa hunkhatlai in State leh Region peuh khenbawl in Exam Question Paper atuamtuam in kivuansak ngeihi. Tulamlam ciangin Myanmar gambup Exam Question Paper pen khatbek kizangta ahih manin, ki gawtbawldeuh cihbang omtheinawnlo in, Ministry of Education tezong hong “Fair and Square” zawdeuh tasam uhhi.

Myanmar gambup Tan 10 Result aki tangkokhiat hundingpen ni 3 bekbek kisamlai hi. Abeisa March khasung in Tan 10 laivuan ihta ihnau sangnaupang te thungetna ah phawkciatni. Sawltak #zomidaily