Malaysia, Bangsar vengsung inntung khatpan in tutphah kipaisuk in mikhat dengkhadek

Malaysia, Bangsar vengsung inntung khatpan in tutphah kipaisuk in mikhat dengkhadek

Malaysia, Kuala Lumpur sungaom Jalan Bangsar vengsung Apartment tungpan in tutna “Steel Chair” khat ki paisuk a, anuai ah nasem in aom pasal khat dengkha dektak cih theStar pan kiza hi. Nungdiak mahmah inzong Kuala Lumpur, Pantai Dalam vengsung aom “low-cost flat” inntung panin tutna ki khiasuk in, anuai ah naupangno khat denglum hi.

Tuazawh asawt hetlo, ninih khitciangin Jalan Bangsar, Putra Ria Apartments tungpan in Steel Chair khat ki khiasuk in anuai ah nasemin aom pasalkhat dengkha dektak hi.

Tua anuai ah nasemin aompa pen amin Azmi kici a, amahpen kimawlna Futsal Court ahawhsiang in Ground Floor ah nasem in aom ahihi. Inntung panin Steel Chair khat aki khiasuk in alu nawkkha dektak cimawk hi.

Tua Steel Chair pen koipan aki khiatsuk cih kitheician lianlo a, ahi zongin Block 91 aom 10th Floor ahih keileh 12 Floor panin aki khiatsuk hiding in ki ummawh hi. Tua Putra Ria Apartments sungah akigawm in Building inngolpi Block 4 tak aom hi a, koipan cihpen kitheician lianlo hi.

Hih innsangpi “High-rise Flat” tepen hoihtak in akikep keileh sihtheihna thang akisiah “Death Traps” tawh kibang hi.

Putra Ria Apartments nuaiah nasempa Azmi in agenna ah hihbangin inntung panin ninthem hongki khiatsukpen kei adingin alamdang leh thuthak hinawnlo hi.

Abeisa inzong tuabangin innnuai ah nasem in ka omlaitak in inntungpan Shopping Trolleey, Bicycle, Napkin zatsa anin, Condom akizangsa cihte akipan naupangte tawdap ek kitunna Diaper cihte akipan hongki khiatsukden hi ci’n genkhia hi.

Hih Steel Chair hongki khiatsukma inzong asungah puansia leh ipsia honkhat akikoih Box golpikhat hongki khiatsuk in, kageilian ah hong tusuk cihi. Tuazawh asawtlo in atunglam panin a awngzeza khat kaza a, tuakhit ciangin Steel Chair khat kageilian ah hong kiasuk cihi.

Hih innsangpi high-rise flat tepen mizawng sumlut tawmte “lower-income demographic” te omna ahih manin ninpaihna hoihtak kibawllo hi. Tua ahih manin asungah ateengte’n inntung dawl 20th Floor pekpan in innnuai dongah kumsuk ciatciat in nin apaihding uh hamsa samahmah uhhi.

More: Singapore ah Myanmar innteeng khat inntungpan kiasuk dektak

Pawlkhat te’n atate uh hoihtak kemzolo in, tua naupangte akimawlna panin ninthem leh vanthem pawlkhat kiasukthei hi.

Tua hi a, hihbangin innsangpi high-rise flat ah aomkha te’n atungpan in ninthem leh vankia khatpeuh omthei ahih manin, kidop siamding thupi mahmah cih ihki zasaksawn hi. Sawltak #zomidaily