Video: Singapore ah Myanmar innteeng khat inntungpan kiasuk dektak

Video: Singapore ah Myanmar Maid khat inntungpan kiasuk dektak

Singapore gamsung ah Myanmar Maid kici innteeng nasem in aomkhat inndawl 5 fifth-floor panin kiasukdek hi. Bukit Panjang, Housing Board Block sungah Wednesday zingsanglam 8am hunpawl in thupiang hi a, tua innteng nasemnu pen innsungah amahleh amah kongkhak ki kalhkhumkha hicimawk hi.

Inn kongkhak “Door” aki kalhkhumkhak ciangin, acihnading theilo a tawlet “Window” panin kumkhia in, apusuahsawm ahihi.

Innpualam kildungteng ah apailaitak agalkhat panin Video kizaihkha a, cikziat huai mahmah hi.

Innteeng nasemnu pen English zong hoihtak in azangtheilo, apautheilo ci a, innteeknu in amuh ciangin patau mahmah a, khawlin ci’n a otsan hangin agen theicianlo ahiam, innpualam kildungteng ah paiphei teitei cihi.

Innteeknu omna atun ciangin kaihtohsawm a, ki kiatsuah dekdek uhhi. Innteeknu in agenna ah ka thaneihzah in kalen teta a, ahi zongin ama pumpi pen keisangin golzaw ahih manin, ka khahsuahding ka patau mahmah cihi. Second 20 sungkhawng amahguak in aletkhit ciangin Police te tungman bilbel uh a, pasal honkhat in lenhuan in kaito uh a, kiatsuahlo bilbel uhhi.

Video azaihkha pen agalkhat aom nupikhat hi a, anhuan in ka omlaitak galmuh kahih manin Video kazaih hi ci’n genkhia hi. Video kaziah hangin kalauthawng mahmah a, kakhutzong linggawp cihi.

Video: Tenant recounts 20sec of trauma as she held on to maid trying to get back into fifth floor flat in Bukit Panjang

Innteeknu in agenna ah nidang hileh zingsang 8am hunin nasemding in innpan akuankhiaden kahihi. Ahi zongin tuani pen zingsang thohakkha kahih manin, tua ka thawhhakpen hih innteeng nasemnu adingin kamphatna khat hizaw bilbel hi ci’n genkhia hi.

Hihvai tawh kisai in Singapore Civil Defence Force te genkhiatna ah kuamah aliam abai omlo, zato akipuak omlo hi ci’n genkhia uhhi.

Ahi zongin hih innteeng nasemnu pen Thursday ni in Agency te kiangah ki puakkik a, tuani mahin Myanmar gamah ki ciahsak cih kiza hi.

More: Singapore ah Myanmar Maid khat innteekpa’n buan ahih manin kum 13 thongkia

Innteekte’n tua aomna, alumna kongkhak Doorknob pen hoihlo hi ci’n ahon hamsathei hi ci’n akihilh ci a, banghangin anuntakna beilawh dekliang in tawlet panin kumkhia mawk hiam, ahi zongin asi aliam omlo ahih manin phadawmlai hi ci’n innteekte’n genkhia uhhi. Sawltak #zomidaily