Mipa leh Singliim nuai a Tui

Mipa leh Singliim nuai a Tui

Khuazin gamvakte bek in a tawlngatna Singliim bek hilo Vasa namkim in
tua singliim belnuam uhhi. Tua Singliim nuai ah tui luang silsial hi.
Khat vei pasal khat khualzinin tua Singliim ah hong tawlnga in tui
hong dawn hi. A pai khiat ding ciangin tuitawl khat dimin a van sungah
guang hi.

Tua mun ah a paikik ngeilo dingin ki ngaihsun ahih manin a hih theih
tawpin Tuiluang silsial pen hong bawlsia gawp mawk hi. Mihing ganhing
tampite phatuamna ding hazatna lungsim a lungsim ah hong lutpha mahmah
laizang hi. A bawl siat tui pen a bawlsiat sung bek tui dawn theihloh
phial in om mahleh a denteh a ngei bangin hong ciim sitset kik hi.

Mipa zong a khualzinna lam na nawhin pai hi. Nikhat a paizawhteh a
bawlsiat Tuiluang silsial ngei ah a van hoih khat manggilh in lak kik
loh phamawh ci-in ki lehkik hi. Tua mun a tunteh avan zong masa lo in
tuiduh lua in tui dawn masa hi.

Singliim nuai ah mi 2 na tawlnga in tuate in mipa kiangah lawm aw hih
van kua ah hiam? A van neihten deihlua mahmah ding hi. Koi cihleng a
van neihpa in a ngah kiktam acihleh mipa in keima ah hi ei a cileh pia
pah uhhi. Koi lai-ah mu naivua acihleh tui sungah ci hi. Mipa in
aw…ka bawl siatsiat Tui pen kei mah hong tawldamsak Thupha khat hi
ei. Tua bek hilo mihing ganhingte ading Thupha khat hi ei. Eibek ki
khual in i ki tangsaploh khat peuhpeuh bawl siat leh gensiat ding hi
het kei ei ci-in a nuntakna ki puahpha kik hi.

Midik khat i bawl siat nop hangin ei adingin Thupha hong bawl veve mi
hi thei hi. Ih lang bawlbawl mite peuhin Thupha tampipi a bawlzo te na
hi gige thei hi. Mihing a bawlpa in mihingte a cimphawng maimai dingin
kuamah bawllo aa, deihna nei kimciat in bawl hi cih telsiamzo leng
Pasian lam ah a pang hi pah hihang. Lungdam.

Thawn Tuang
Nashville TN USA
Aug 19,2015