Kawm tung aa Coffee ~ Peter Suumpi

Kawm tung aa Coffee ~ Peter Suumpi

Nikhat Los Angeles gei aa om Venice tuipi piau (Shore) aa om aminthang coffee sai khat ah ka lawm khat tawh coffee dawn in ka tu uh hi. Tua laitak in sai sung ah mi khat hong lut in ka gei uh ah hong tu hi.

Hih mi in saingak nasem te khat sam in ” coffee hai nih, hai khat kawm tung ah belh ding” ci in hong vaikha hi. Hi mipa ii coffee vaikhak dan pen tum dang hi. Ama dawn ding coffee hai khat hong tun hang in coffee hai nih man sum pia veve hi. Coffee adawn khit sai pan apusuah khit teh sia nasem pa in kawm tung ah laidal khat hong belh hi. Laidal tung ah “Coffee hai khat” ci in kigelh hi.

Aden deuh mahteh mi nih sai sung ah hong lut leuleu uh hi. Hih mi nih te in coffee hai nih dawm ding hai khat kawm tung ah ci in coffee hai thum vaikhak uh hi. Amau hai nih bek dawn uh hi. Coffee hai thum man ding sum a piak khitteh sai sung pan pusuak uh hi. Saingak nasem in den aa bang mah in kawm tung ah “coffee hai khat” ci in lai belh leuleu hi.

Hih daan pen hih sai ii ngeina ahiphial zong in ko aading in alamdang pi khat hi in ka telzo kei uh hi.

Ni tawm vei khitteh tua coffee sai ah coffee dawm in ka tu kik uh hi. Coffee dawn in ka om laitak un sai sung ah mi khat hong lut hi. Tua hong lutpa ii silh le ten te ahihleh hih sai aa tu ding in kilawm hetlo cih ding hi mai hi. Mizawng ahihlam ki thei pah hi. Sai sung hong lut in kawm tung hong en hi. Tua khitteh “kawm tung aa coffee hai khat” ci in hong vaikha hi.

Saingak nasem in zong nidang mah bang in tua mipa mai ah coffee hai khat hong tun hi.

Tua mipa in coffee anek khitteh sum pialo in sai sung pan pusuak khia hi. Hih pen lamdang satak in ka en gige kha uh hi. Tua pa paikhiat khitteh saingak nasem in kawm tung aa lai kibelh dal khat hawk khia in ninbung sung ah pai ziau hi. Aw… tua pan thu te ka tel thei pan uh hi. Hih khua sung mite in mizawng te tung ah ahehpihna uh hong mukhia thei sak hi.

Coffee pen nuntak nading akisam penpen hi hetlo hi. Ahihang in hih lai mun ah eite coffee dawn in lungnuam tak in ih om mah bang in midang te zong om nuam ding uh hi. Amau zong coffee a dawn nop uh hangin sum haksatna hang in adawn zolo mi om ding hi.

Saingak nasem endih lehang, ama pen hih mizawng pa aading coffee apiak hun ciang in zong mihau te coffee apiak daan mah in maitai hi. Mizawng pa in zong sai sung ah lut in maizum khual mawh liang in coffee nget kullo hi. Kawm tung a et ding bek hiziau hi.

Tua kawm pen ka ciamteh hi. Tua khua sung aa om mite ii thukhual zia, midang te tung hehpihna le itna aneihna te uh tua kawm tung pan kilang hi. Lailet – Peter Suumpi (Source: Kindsring)