Tahum Khaici (a different gospel) bangci dalzawh ding?

Kuate in MC letmat tawi, bangpawlpi pan sawlna tawh kuankhia, kua’ phalna, kua ciapteh pihna ngah cih banga daai kaihna tawh zong tahum khaici a kidal zo ding hi nai lo hi. Ahangin tua a khahkhia, a sawlkhia kipawlnate mahmah zong tahum in a deepcip pawlpite na hi thei hi.

A sunglam mah panin Christian te’ galpa in nasem hi. Eite in a sunglam ih cih pen Lai Siangtho sunglam hi loin, eimau kipawlna sung teng a gen ih hi a, eimau kipawlna pualamte pen Christian pawlpi mah ahih hangin a pualam cihsak hi hang. Kipawlkhopna ci-a a hah gengen tengin midangte a’ peuhmah a thupi sim sak nuam lo, a theihpih nuam lote, mite a’ peuhmah dikin tang taleh a pua sehsehte hi hamtang uh hi. Thuhilhsyapa khat in “Mi tawh a kipawl nuam lote in zong kipawlna tuam khat nei veve uh hi” ci lanlan vial hi. Ken ahih leh, “Kipawlna a thupi sakte in zong kipawlpih theih loh mah nei veve uh hi” ka ci hi.

Tua ahih manin tuhun ciangin a sung le a pua kinialnial sak nawn lo zawin ei thu-um mimalte mahmah in LST tawh a sittel thei pawlpite ih hih ding hun hita hi. Ahi zongin tu-a ih LST simzah ciang lel tawh bel sit zo nai lo kha ding hi hang. LST ih nak sim mahmah kul ding hi. Ih kin mahmah kul ding hi. Ih bulphuh mahmah kul ding hi. A sunglam kicite bek ii phalna laidal (letmat) khat peuhpeuh lah ding hong nei zo a, hong nei zo kei phial zongin Lai Siangtho bulphuh thei in, thungetna tawh a kidim mipa hi-in pianthakna maan bulpi teng tawh hong kuankhia in, a gamtat a luhek Lai Siangtho kammal tawh kituak thu a hilh thei hiam ci-in na sittel theih nading un nomau mahmah Berea Pawlpite bangin LST thu theihna tawh a kantel thei mi na hih dinguh kisam pen hi.

LST sungah “Thesalonika khuamite sangin Berea khuamite in mipi lungsim nei zaw uh hi. Amaute in lawp mahmahna tawh Paul’ thugente ngai uh a, Paul’ thugente maan taktak hiam ci-in a theih nadingun nisimin Lai Siangtho a sim uh hi, na kici hi (Sawltak 17: 11). LST simna tawh ih kantel keileh um a, sanga, ih neih thu teng peuh tahum na hi thei a, ih sanlohte ih up lohte ih up ih san dingteng na hi zaw kha thei ding hi.

Evan. Suang Dal