Myanmar, Yangon khuasung aom Sule Square ah amasapen Starbucks Coffee sai kihongding

Myanmar, Yangon khuasung aom Sule Square ah amasapen Starbucks Coffee sai kihongding

American Coffee Franchise minthang mahmahkhat ahi Starbucks te’n Myanmar, Yangon khuasung ah Outlet khat hongtading cih MMTimes pan kiza hi. Tuciangciang Myanmar gambup ah Starbucks Coffee Shop khatzong aomnailo hizen a, Yangon ah kihongleh amasapen First Outlet hipanding hi.

Hihvai tawh kisai in Myanmar Investment Commission (MIC) te’n May 12 ni in Starbucks Coffee Shop hontheih nadingin phalna piata uhhi.

Myanmar gamsung ah Starbucks pen Coffee Concepts Myanmar Ltd (CCM) te tungtawn in kihongding a, CCM tepen Starbucks Operator suak uhhi. CCM pen gamdangte neihsa Company khat hi a, Myanmar gamsung ah Food and Beverage Services provider khat ahihi.

Myanmar gamsungah amasapenpen akihongding Starbucks Coffee Shop pen Yangon, Kyauktada Township aom Sule Square Mall ah kihongding hi.

Starbucks CEO asem ahi Howard Schultz in 2013 kumin Thailand azin hunlai in Myanmar gamsung ahzong Starbucks Coffee Shop honding kingim hi ci’n genkhia hi. ASEAN gamsung ah Laos gamlobuang adang ASEAN gamkhempeuh ah Starbucks pen omkhinta hi.

Starbucks Coffee pen alimpen cihzongbel hisamkei, Coffee athupipen cihzong hipah tuankei. Starbucks pen American Coffee Company hi a, Coffee aduhtaktak te’n Starbucks Coffee sangin Italian Coffee te limzawtham ci uhhi. Ahi zongin leitungbup in atheih mahmah International Brand minthangkhat Myanmar gamsung ah honglutding ahih manin, khantohna namkhat hi a, lungdamhuai mahmah hi.

Starbucks Coffee pen American Brand ihcih mahbangin amau ii Headquarters pen Washington State ii khuapi Seattle City ah aom hi a, 1971 kumpek panin akipankhia Coffee Company khat ahihi. 2017 kum ciangciang leitung muntuamtuam ah Starbucks Outlet bekbek akigawm in 26,696 Outlets omkhinta hi.

Gamdang Coffee Franchise lakah Starbucks pen amasa penpen hilo leuleu hi. Starbucks te lutmapek in Gloria Jean’s kici Australian Coffeehouse Chain te Myanmar gamsung ah omkhinta hi. Tulaitak Myanmar gamsung ah Gloria Jean’s te Outlet pen akigawm in 4 omkhinta a, avekin Yangon khuapisung vive ah ahihi.

More: Coffee dawndawn te Skin Cancer natna ngahhak ci ~ ZD

Nung February khasung inzong Singapore-listed Myanmar Investco (SMI) te’n tangkona khat neikhia uh a, The Coffee Bean & Tea Leaf (CBTL) brand pen 2018 First Quarter sungin CBTL Outlet amasapenpen kihongding hi ci’n genkhia uhhi. SMI te ii vaihawmna mahtawh Yangon International Airport ahzong Outlet 2 neikhin uhhi.

Taiwan-based Franchise Teahouse chain minthang khatmah ahi Chatime tezong Myanmar gamsung ah 2013 kum pekin alutkhin uh ahihi. 2017 August kha ciangciang Myanmar gamsung ah Chatime Outlet pen 14 omkhin a, tuate pen Yangon leh Mandalay khuapisung vive ah ahihi. Sawltak #zomidaily